Sobra na 100 ka tuig ang mga Saksi ni Jehova sa Korea kag hilway sila sa ila pagsimba. Pero ang daku gid nga problema sang mga Saksi sa South Korea amo ang wala untat nga pagpasaka sang kaso sang gobierno sa mga nagapangindi nga magsoldado bangod sa konsiensia.

Wala ginakilala sang South Korea ang kinamatarong nga magpangindi nga magsoldado bangod sa konsiensia kag wala man ini sang kasuguan para sa alternative civilian service. Gani ang mga pamatan-on nga Saksi nga nagapangindi nga magsoldado masami nga ginasentensiahan nga mapriso sa sulod sang 18 ka bulan. Mga 40 asta 50 ka lalaki nga Saksi ang ginapriso kada bulan. Paggua nila, may problema gihapon bangod may criminal record na sila kag nagagua nga daw ginlikawan nila nga magserbisyo sa militar. Mahimo mabudlayan sa pagpangita sang obra ang isa ka Saksi kag madamo pa sia sang maatubang nga problema.

Bisan ang mga lalaki nga nakakompleto na sa ila pagserbisyo sa militar, pero nakatuon sang ulihi sa Biblia nga higugmaon ang ila isigkatawo kag indi magtuon sang inaway, may atubangon man nga problema. Kay man, bangod ara na sila sa listahan sang mga puede ipatawag bilang reservist, ini nga mga lalaki sulitsulit nga ginakasuhan kag ginamultahan bangod nagapangindi sila nga padayunon ang ila training sa militar.

Ang UN Human Rights Committee nagpapanaug sang sobra 500 ka desisyon kontra sa South Korea bangod sa pagsupak sang kinamatarong sang mga nagpangindi nga magsoldado kag nagdesisyon man ini nga ang pagpriso sa ila “indi makatarunganon.” Ginsambit man sa sini nga ang South Korea “may obligasyon nga indi na paghimuon ini nga pagsupak” sa palaabuton. Mapakita lang sang South Korea ang matuod nga pagrespeto sa kahilwayan sang konsiensia kag relihion kon solbaron nila ini nga mga isyu.