Sang Hulyo 26, 2023, si Brother Sergey Klimov ginpagua sa prisuhan sa Russia sa siudad sang Astrakhan, pagkatapos sang lima ka tuig nga pagkapriso. Una sia nga gin-aresto kag gin-detain sang Hunyo 3, 2018, kag ginbutang sa pretrial detention. Sang Nobiembre 5, 2019, ginsentensiahan sia kag sang ulihi ginsaylo sa isa ka penal colony.

Samtang napriso sia, wala gintugutan si Sergey nga makita ang iya asawa nga si Yuliya sing mga siam ka bulan. Dugang pa, wala niya nabaton ang kalabanan nga mga sulat nga ginpadala sa iya. Bangod indi maayo ang sitwasyon sa iya selda, nagmasakit si Sergey. Bisan pa sa sini, nangin positibo gihapon si Sergey paagi sa padayon nga pagpangamuyo kag pagbasa sang Biblia sing regular.

Ginkasuhan sang mga awtoridad si Sergey sang extremism bangod sa iya relihion. Pero sang gin-hearing sia, maisog nga ginpamatud-an ni Sergey nga sala ang akusasyon sa iya kag ginpaathag man niya kon ngaa ginasugid niya ang mensahe sang Biblia sa iban: “Ang akon Dios, nga si Jehova, mahigugmaon nga Dios kag wala sing pinilian.” Nagsiling pa sia: “Nagabulig ako sa iban bangod sa gugma, indi bangod sa dumot ukon extremism.”

Nalipay kita upod kay Sergey kag Yuliya kay updanay na sila liwat. Nagapasalamat man kita kay ginpakamaayo ni Jehova ang determinasyon ni Sergey nga magpabilin nga matutom.—Josue 24:14.