HULYO 26, 2022
RUSSIA

Pagbatas nga may Kaisog kag Kalipay

I-PLAY

Sa indi madugay, ipahibalo sang Surgut City Court of the Khanty-Mansi Autonomous Area—Yugra ang desisyon sini sa kaso sang 17 ka brother kag isa ka sister. Lakip sa ila amo sanday Brother Vasiliy Burenesku, Brother Viktor Fefilov, Brother Igor Kobotov, Brother Igor Petrov, Brother Leonid Rysikov, Brother Igor Trifonov, kag Brother Pavel Romashov kag ang iya asawa nga si Sister Viola Shepel. a Wala pa sing may ginsiling ang piskal kon ano nga sentensia ang gusto niya sa sini nga kaso.

Time Line

Pebrero 15, 2019

Gin-raid sang mga pulis ang madamo nga mga balay sang mga Saksi ni Jehova sa Surgut kag sa malapit nga mga siudad. Pito ka brother ang nagsiling nga gin-torture sila sang gin-interogar sila. Tatlo ka brother ang ginbutang sa pretrial detention kag ang isa pa ka brother ginmanduan nga magpa-eksamin sa psychiatric hospital
Oktubre 3, 2019

Si Viktor, si Igor Kobotov, si Igor Petrov, si Leonid, si Igor Trifonov, si Pavel, kag si Viola gindugang sa listahan sang mga extremist
Oktubre 10, 2019

Si Vasiliy gindugang sa listahan sang mga extremist
Hulyo 23, 2020

Gin-raid ang balay ni Igor Petrov sa ikaduha nga bes, kag mas madamo nga pagkabutang niya ang ginkompiskar
Oktubre 29, 2021

Ginsugdan ang hearing

Impormasyon Parte sa Ila

Vasiliy Burenesku

Natawo: 1958 (Bălţi, Moldova)

Biograpiya: Ginpadaku sia sang iya nanay nga isa ka single mother. Nag-istar sia sa isa ka boarding school para sa imol nga mga kabataan. Nag-obra sia bilang mekaniko

Napangasawa niya si Nataliya sang 1977. May duha sila ka bata. Nagtuon sia sa Biblia upod sa mga Saksi ni Jehova sang 2000 kag nakita niya ang mga sabat parte sa mga pamangkot sa kabuhi. Nabawtismuhan sia sang 2009

Ang Iya Ginsiling

Ano nga teksto ang nakabulig sa imo nga makabatas?

Ang Roma 12:16 nagasiling: “Indi kamo magpakaalam sa inyo kaugalingon.” Ginabuligan kita ni Jehova nga mapakita ang pagkamapainubuson kag sia mismo mapainubuson man. Ako “ulipon lang” sang akon Manunuga, pero palangga niya ako. (Lucas 17:10) Sang ginpamensar ko ina, napabakod gid ako. Nakabulig ini sa akon nga magbatas kag magpadayon sa pag-alagad.

Igor Kobotov

Natawo: 1973 (Apsheronsk, Krasnodar Territory)

Biograpiya: Naggradweyt sia sa isa ka music school. Nagsoldado sia sa sulod sang duha ka tuig. Nagaobra sia sa isa ka kompanya sang oil kag gas

Sang 23 anyos sia, nakita niya ang katuyuan sang kabuhi paagi sa pagtuon sa Biblia. Nabawtismuhan sia sang 1996. Napangasawa niya si Yuliya sang 2005. May isa sila ka bata nga lalaki

Ang Iya Ginsiling

Ano ang nakabulig sa imo para mangin husto pirme ang imo pagtan-aw sa imo sitwasyon?

Ginadumdom ko ang halimbawa ni Daniel kag ang iya sitwasyon sang ginhaboy sia sa lungib sang leon . . . Wala sia sang abogado, wala sang appeal court, kag wala sang mga kauturan sa bilog nga kalibutan nga magapadala sang mga sulat sa iya. Ang pagpamalandong sa mga rekord sa Biblia nakabulig sa akon nga makita nga wala sing garantiya nga makabaton ka sing hustisya sa sini nga kalibutan. Ang importante nga makita naton nga ginabuligan kita ni Jehova bisan pa sang tanan nga nagakatabo subong.

Igor Petrov

Natawo: 1969 (Turdakovo, Chuvash Republic)

Biograpiya: Nagdaku sia sa Kazakhstan. Nag-obra sia bilang heavy equipment operator

Nanamian sia sang kaalam sa mga prinsipio sa Biblia kag nakita niya ang kaayuhan kon sundon niya ini sa iya kabuhi. Napangasawa niya si Larisa sang 2001, kag nabawtismuhan sila nga duha sina man nga tuig. May isa sila ka bata nga lalaki

Ang Iya Ginsiling

Ano ang maayo nga epekto sa imo sang mga naagihan mo nga mga pagtilaw?

May mga tion nga naluyahan man ako sing buot. Ang paghingabot daw pareho sang kalayo nga nagpagua sang akon mga kaluyahon. Wala ’ko nanamian nga mabal-an ang akon mga kaluyahon, pero mas maayo ini kay makita ko kon ano ang akon pauswagon. Pamatyag ko gintugutan ni Jehova ini tanan nga mga pagtilaw para sa akon kaayuhan kay para mabag-o ko ang dapat ko bag-uhon.

Pavel Romashov

Natawo: 1974 (Tomsk, Tomsk Region)

Biograpiya: Ginpadaku sia sang iya nanay nga isa ka single mother. Nagaobra sia sa building maintenance sang isa ka kompanya sang oil kag gas. Napangasawa niya si Viola sang 2003. May isa sila ka bata nga babayi

Dungan nga nagtuon sa Biblia upod sa mga Saksi ni Jehova si Pavel kag si Viola. Nakita ni Pavel nga may positibo nga epekto sa iya pamilya ang mga kamatuoran sa Biblia. Napalig-on gid sia sang pagpalangga kag pagkamainabyanon sang mga kauturan sa kongregasyon. Nabawtismuhan sila ni Viola sang 2004

Ang Iya Ginsiling

Ano ang nakabulig sa imo nga mangin kalmado sang gina-raid ang imo balay?

Nag-obra ako bilang transport guard sa Ministry of Internal Affairs sing halos lima ka tuig antes ako nangin Saksi ni Jehova. Gani, pamilyar ako sa mga pag-raid, interogasyon, kag mga kaso.

Pero bisan madamo nga beses nga ginpamensar ko ini nga hitabo ukon gin-imadyin kon paano ako mag-react, sang nagapamulpog na sa akon puertahan ang mga lalaki nga may tabon sa guya, daw indi ako makapati nga nagakatabo ini. Sa sina nga tion, . . . nagpangamuyo ’ko para sa duha ka butang: indi mag-panic kag kon paano ko mapakita ang gugma sa sini nga mga tawo. Kay man, ginahimo lang nila ang ila obra, kag wala sila makahibalo sang kamatuoran.

Leonid Rysikov

Natawo: 1950 (Srednie Mangareki, Krasnoyarsk Territory)

Biograpiya: Isa sia sa walo ka mag-utod. Nag-obra sia bilang elektrisyan kag mekaniko

Napangasawa niya si Yevgeniya sang 1982. Ang iya asawa ang una nga nabawtismuhan. Sa umpisa nagapamatok si Leonid, pero bangod sang gugma kag pagkasinsero sang katawhan ni Jehova, nakumbinsi sia nga ara sa mga Saksi ni Jehova ang kamatuoran. Nabawtismuhan sia sang 1996

Ang Iya Ginsiling

Ano ang nakabulig sa imo nga magpabilin nga positibo sa tion sang mga pagtilaw sa imo?

Gusto ko gid buligan ang iban sa sining mabudlay nga mga tion. Padayon man ako nga nangin palalahog. Nahibaluan ko kon ngaa ginahingabot ako, kag mas nakumbinsi pa gid ako nga ginapakamaayo kita ni Jehova kon ginahimo naton ang insakto. Bangod sini, nangin malipayon pa gid ako.

Viola Shepel b

Natawo: 1976 (Stepnogorsk, Kazakhstan)

Biograpiya: Nag-obra sia bilang nurse sa isa ka pediatric unit. Napamana niya si Pavel sang 2003. May isa sila ka bata nga babayi

Dungan nga nagtuon sa Biblia upod sa mga Saksi ni Jehova si Viola kag si Pavel. Nanamian si Viola sa praktikal nga mga sabat sang Biblia sa mga pamangkot parte sa pagluntad sang Dios, sa katuyuan sang kabuhi, kag kon paano makahimo sang maayo nga relasyon sa iban nga tawo. Nabawtismuhan sila ni Pavel sang 2004

Ang Iya Ginsiling

Paano ka ginbuligan ni Jehova?

Madamo nga tuig nga may depresyon ako. Kon ginaatake ako sini, ang una ko gid nga ginahimo amo ang pagpangamuyo kay Jehova kay indi ko madaug ini nga balatyagon kon ako lang. Ginatawgan ko dayon ang akon pinalangga nga mga kauturan nga babayi kag ginakamusta ko sila. Tanan sila may mga problema man nga ginaatubang, gani basi kinahanglan sang isa sa ila ang akon bulig. Ukon kon kaisa basi gusto lang nila may maistorya. Kon nagaistorya ako sa ila, nagaayo ang akon pamatyag. Makabulig gid pirme sa akon kon dumdumon ko nga wala ako nagaisahanon kag bahin ako sang isa ka daku nga pamilya.

Kumbinsido kita nga bisan ano man nga ‘kapipit-an, kasisit-an, paghingabot, ukon katalagman’ ang maeksperiensiahan sang aton mga kauturan, bangod sa gugma kag suporta ni Jehova ‘madaug nila ini tanan.’—Roma 8:35, 37.

a b Wala niya gindala ang apelyido sang iya bana.

Manamian Ka Man Sini

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE