DISIEMBRE 11, 2024
RUSSIA

‘Nagadampig kay Jehova’

I-PLAY

Sang Disiembre 2, 2024, nagdesisyon ang Leninskiy District Court of Kursk nga guilty si Brother Dmitriy Chausov; ang iya asawa nga si Sister Oksana Chausova; kag si Brother Nikolay Kupriyanskiy. Si Dmitriy kag si Oksana pareho nga ginsentensiahan sang duha ka tuig kag anom ka bulan nga pagkapriso. Si Nikolay ginsentensiahan sang anom ka tuig nga pagkapriso. Gindala sila dayon sa prisuhan halin sa korte.

Impormasyon Parte sa Ila

Dmitriy Chausov

Natawo: 1988 (Kursk)

Nabawtismuhan: 2014

Biograpiya: Nagaobra bilang welder

Napangasawa niya si Oksana sang 2012

Gin-akusaran sang: Pagpakig-istorya sa iban parte sa Biblia kag pagdumala sang mga miting sang mga Saksi ni Jehova

Sobra anom ka bulan sia sa pretrial detention. Kag sa sulod sang sobra siam ka bulan nga pag-house arrest kay Dmitriy, indi niya kaupod ang iya asawa kay sa iban sia nga balay ginbutang

Sentensia: Duha ka tuig kag anom ka bulan nga pagkapriso

Ang Iya Ginsiling

Ano ang nakabulig sa imo nga makabatas sang ara ka sa pretrial detention center?

Ginsulatan ako sang isa ka brother kag ginpalig-on: “Kon mag-adjust ka dayon sa imo bag-o nga sitwasyon, mangin mas mahapos ang imo kabuhi.” Ining maayo gid nga laygay nakabulig sa akon nga dapat ako mangita sang mga rason para malipay ako kada adlaw. Gani nangita ’ko sing mga butang nga makapalipay sa akon pareho sang silak sang adlaw nga nagalusot sa bintana sang akon selda, ang huni sang pispis sa gua, kag bisan gani ang yuhum sang mga tawo sa akon palibot. Natun-an ko nga bisan diin man ako, may mga rason gid para mangin malipayon. Ang pagpabilin nga malipayon indi mahapos, pero kinahanglan ini para indi magluya ang akon pagtuo.

Oksana Chausova

Natawo: 1986 (Kazakhstan)

Nabawtismuhan: 2014

Biograpiya: Palangitan-an niya ang nail art

Napamana niya si Dmitriy sang 2012

Gin-akusaran sang: Pagpakig-istorya sa iban parte sa Biblia kag pagpakigbahin sa relihioso nga mga miting sang mga Saksi ni Jehova

Sobra anom ka bulan sia nga gin-house arrest

Sentensia: Duha ka tuig kag anom ka bulan nga pagkapriso

Ang Iya Ginsiling

Ano ang nakabulig nga indi magluya ang imo buot sa sining mabudlay nga sitwasyon?

Kami sang akon bana dungan nga ginpasakaan sang pareho nga kaso. Wala kami gintugutan nga mag-istar sa isa ka balay ukon magkomunikar sa isa kag isa. Para may ideya ako kon ano ang akon himuon, nagbasa ako sang mga sugilanon sang kabuhi sang aton mga kauturan nga nagbatas sang paghingabot sa Nazi Germany kag Soviet Union sadto. Ang ila mga eksperiensia nagpahanumdom sa akon nga indi maghimo sang milagro si Jehova para solbaron ang tanan ko nga problema. May mga tion gihapon nga ginabudlayan ako ukon ginasubuan, pero nagapahanumdom ini sa akon nga kadungganan sang amon pamilya nga magdampig kay Jehova kag suportahan ang iya pagkasoberano. Nalipay gid ako sa sini.

Nikolay Kupriyanskiy

Natawo: 1967 (Kursk)

Nabawtismuhan: 1999

Biograpiya: Napangasawa niya si Tatyana sang 1986. May isa sila ka bata nga lalaki kag isa ka bata nga babayi

Gin-akusaran sang: Pagdumala sang mga miting sang mga Saksi ni Jehova

Gin-house arrest sia sang halos isa ka tuig kag apat ka bulan

Sentensia: Anom ka tuig nga pagkapriso

Ang Iya Ginsiling

Ano ang imo natun-an sa halimbawa sang iban?

Pirme ko ginadumdom si Jose. Bisan ara sia sa prisuhan, ang Biblia nagsiling nga “si Jehova padayon nga nag-upod kay Jose kag nagpakita sa iya sing mainunungon nga gugma.” (Genesis 39:21) Nagasalig ako nga kaupod ko man si Jehova bisan diin man ako, gani wala ako sing rason nga mahadlok. Makapalig-on man mag-istorya sa iban nga nakaagi sing paghingabot pareho sa akon. Makita ko ang ila pagtuo kag nakabulig ini sa akon nga indi gid pagkalimtan nga mas importante ang pagsalig kay Jehova sangsa pagpangita sang hustisya. Nagalaum ako nga ang akon eksperiensia makabulig man sa iban.

Nagasalig kita nga padayon nga buligan ni Jehova si Dmitriy, si Oksana, kag si Nikolay, kay “wala ginadingot ni Jehova ang bisan ano nga maayo sa mga nagalakat nga may integridad.”—Salmo 84:11.

Manamian Ka Man Sini

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE