Sang Hulyo 1, 2021, nagdesisyon ang Metallurgichesky District Court of Chelyabinsk nga guilty ang 75 anyos nga si Brother Vladimir Suvorov kag ginsentensiahan sia sing anom ka tuig nga pagkapriso.

Vladimir Suvorov

• Natawo: 1946 (Chelyabinsk)

• Biograpiya: Naga-operate sia sang mga makina sa pabrika kag aktor sia sa teatro. Nagtrabaho man sia bilang isa ka deputy director sa Soviet House of Culture. Nanamian sia magkomposo sing mga kanta kag maggitara

  Napangasawa niya si Valentina sang 1973. Nabawtismuhan sia bilang isa sa mga Saksi ni Jehova sang 1993. May bata sila nga lalaki nga si Igor nga napatay sa kanser sang 2014

Sang Enero 16, 2020, gin-imbestigahan sang mga awtoridad sa Chelyabinsk si Vladimir Suvorov nga 75 anyos nga brother. Gin-akusahan sang imbestigador sa Chelyabinsk Region si Vladimir nga nagaorganisar sang mga hilikuton sang iya relihion, lakip ang pagkanta sang mga kanta sang ila relihion, pagpangamuyo, kag pagbinagbinag sing Biblia.

Sang Pebrero 2020, ginsugdan sang mga pulis ang pag-interogar kay Vladimir kag gindumilian sia nga magbiyahe sa iban nga lugar. Sang Hunyo 17, 2020, pormal sia nga ginpasakaan sing kaso. Nagsiling si Vladimir nga ang mga kabudlayan nga iya naeksperiensiahan bangod sa sini nga paghingabot amo ang pinakamabudlay nga naagyan niya sa iya kabuhi. Pero nagsiling sia: “Wala gid kami ginpabay-an sang aton Dios nga si Jehova . . . Nagabakod pa gid ang amon relasyon kay Jehova. Nabatyagan gid namon ni Valentina ang iya bulig. Gingamit niya ang amon mga kauturan bisan ang halin sa iban nga kongregasyon para palig-unon kami, pabakuron, kag paumpawan.”

Sang Marso 11, 2021, ginsentensiahan si Valentina nga 73 anyos sing duha ka tuig nga suspended prison sentence sang korte nga amo man ang nagauyat sang kaso ni Vladimir. Nagasalig a gid sila nga padayon sila nga buligan kag suportahan ni Jehova.—Salmo 118:6.