Sang Huebes, Septiembre 19, 2019, anom ka brother halin sa siudad sang Saratov sa Russia ang ginpamatbatan kag ginsentensiahan nga mapriso bangod lamang mga Saksi ni Jehova sila.

Ginsentensiahan ni Judge Dmitry Larin sang Leninsky District Court of Saratov si Brother Konstantin Bazhenov kag si Brother Aleksey Budenchuk nga mapriso sing tatlo ka tuig kag tunga; si Brother Feliks Makhammadiyev, tatlo ka tuig; sanday Brother Roman Gridasov, Brother Gennadiy German, kag Brother Aleksey Miretskiy, duha ka tuig. Dugang pa, kon matapos na sang mga brother ang sentensia sa ila, tanan sila wala ginatugutan nga mangin lider sang mga pangpubliko nga organisasyon sa sulod sang lima ka tuig. Nagaplano ang depensa nga iapelar ini nga desisyon.

Ginpasakaan sing mga kaso kriminal ining anom ka brother sa tapos nga ginhalughog sang mga awtoridad sang Russia ang pito ka balay sang mga Saksi sa Saratov sang Hunyo 12, 2018. May pamilya ining anom ka brother, kag si Brother Budenchuk may duha ka bata nga nagaeskwela pa. Si Brother Budenchuk, upod kanday Brother Bazhenov kag Brother Makhammadiyev, halos isa ka tuig na nga napriso bisan wala pa sila mabista.

Sa katapusan nga mensahe sa korte sining anom ka brother, ginlakip nila ang pila ka makapalig-on nga mga teksto halin sa Biblia kag nagsiling nga wala sila sing malain nga buot sa mga abogado nga nag-akusar sa ila.

Subong, pito na ka brother ang ginkasuhan kag ginsentensiahan nga mapriso sa Russia. Sobra 250 ka kauturan sa Russia ang ginpasakaan sing kaso, kag 41 sa ila ang napriso (antes pa sila nabista ukon napamatbatan) kag 23 ang naka-house arrest.

Ginapangamuyo naton nga ang tanan nga matutom kag maisog nga kauturan sa Russia ‘mapabakod sang kusog halin sa mahimayaon nga gahom [ni Jehova] agod makabatas [sila] sing bug-os nga may pagpailob kag kalipay.’—Colosas 1:11.