Sang Mayo 2019, ginpasakaan sang kaso kriminal sang mga awtoridad halin sa mga rehiyon sang Arkhangel’sk kag Volgograd ang aton duha ka tigulang nga sister. Si Sister Kaleriya Mamykina, 78 anyos, nga makita sa ibabaw, kag si Sister Valentina Makhmadgaeva nga 71 anyos, ginaimbestigahan sa paghimo sang hilikuton nga “batok sa gobierno” bangod lamang mga Saksi ni Jehova sila.

Sang Abril 2018, ang mga awtoridad sa siudad sang Vladivostok nagpasaka sang kaso kriminal batok kay Sister Yelena Zayshchuk nga 84 anyos, upod sa apat pa ka Saksi. Subong, napulo na ka kauturan nga sobra 70 anyos ang nagaatubang sing kaso kriminal sa Russia bangod lamang sa ila mahidaiton nga pagsimba.

Bisan pa wala ginpriso ini nga mga tigulang, ini nga sitwasyon mabudlay gid para sa ila. Kon magpadayon ang imbestigasyon kag sentensiahan sila sang mga korte nga nakasala, mahimo nga pabayaron sila sing daku nga multa ukon prisuhon.

Sang Hunyo 17, 2019, ang kadamuon sang kauturan nga ginpasakaan sang sayop nga mga kaso kriminal naglab-ot na sa 215. Kag padayon pa ini nga nagadugang. Kabay nga ilakip naton sa aton mga pangamuyo ang aton kauturan sa Russia, kag kon mahimo sambiton naton ang ila mga ngalan. Nagasalig kita nga padayon sila nga pabakuron ni Jehova “sang kusog halin sa iya mahimayaon nga gahom agod makabatas [sila] sing bug-os nga may pagpailob kag kalipay.”—Colosas 1:11.