Sang Septiembre 2018, mga isa ka tuig sa tapos nga gin-igo sang Bagyo Irma kag Bagyo Maria ang Puerto Rico, natapos na sang mga Saksi ni Jehova ang daku nga proyekto sa pagbulig sa nahalitan sang kalamidad sa sini nga isla. Nagkinahanglan ini sang linibo ka boluntaryo halin sa sarisari nga lugar nga sakop sang sanga sang United States.

Ang Disaster Relief Committee, nga gintukod sang sanga sang United States, nag-organisar sang 10,000 ka lokal nga manugbantala sa Puerto Rico para magbulig sa sini nga proyekto. May dugang pa nga 8,000 ka kauturan, nga ang iban halin pa sa Alaska, Bahamas, kag Hawaii, nga nagbulig man sa sini nga hilikuton.

Sa tion sang proyekto, ginkay-o sang mga boluntaryo ang 106 ka Kingdom Hall kag 2 ka Assembly Hall nga ginguba sang mga bagyo. Dugang pa, 783 ka balay sang aton kauturan ang ginkay-o kag 73 ang ginpatindog liwat. Madamo man nga kauturan nga nahalitan sang bagyo ang nakabaton sang bulig halin sa ahensia sang gobierno ukon halin sa kompanya sang ila homeowners insurance.

Si Lorne Kowert, nga nagaalagad sa Disaster Relief Desk sa sanga sa United States, nagsiling: “Subong nga tapos na ang obra, ang pagdumdom sa aton mga hinimuan padayon nga magapalig-on indi lamang sa aton kauturan nga nahalitan sang bagyo kundi pati man sa mga nagbulig sa hilikuton sang pagpatindog liwat.”

Kaupod sa aton mga kauturan sa Puerto Rico, ginapasalamatan naton ang gugma kag pag-atipan ni Jehova paagi sa bilog kalibutan nga paghiliutod.—1 Pedro 5:7.