MAYO 18, 2022
POLAND
Isa ka Espesyal nga Pagbisita sa mga Boluntaryo kag sa mga Refugee Halin sa Ukraine nga Ara sa Poland
Halin sang Domingo, Mayo 1, 2022, ginbisitahan ni Brother Mark Sanderson sang Nagadumala nga Hubon sang mga Saksi ni Jehova, upod sa tatlo ka miembro sang Branch Committee, ang mga kauturan nga nagpalagyo halin sa Ukraine pakadto sa Poland. Sa bilog nga pagbisita, napamatian ni Brother Sanderson kag sang mga brother nga nag-upod sa iya ang istorya sang mga refugee kag ginpasalig sila sang gugma kag suporta sang Nagadumala nga Hubon.
Halin sa wala pa tuo: Si Tomasz Wolczko nga miembro sang Branch Committee sa Poland, si Mark Sanderson, si Vesa Väänänen nga miembro sang Branch Committee sa Poland, kag si Tommi Kauko nga miembro sang Branch Committee sa Finland
Ginaistoryahan nila ang hilikuton sa pagbulig samtang ara sila sa border
Sa sulod sang anom ka adlaw, ang ila grupo nagbiyahe sang sobra 2,500 ka kilometro, para mabisitahan ang mga refugee sa pila ka lugar. Lakip sa ila ginbisitahan ang apat ka Assembly Hall kag pila ka Kingdom Hall. Nakigkita man sila sa mga boluntaryo nga ara sa border sang Poland kag Ukraine.
Ang isa ka utod nga taga-Ukraine nagsiling, “Ang ila pagbisita daku gid nga pagpalig-on kag paumpaw sa amon. Daw pareho ini sang mabugnaw nga tubig sa mainit nga tiempo.”
“Nasorpresa gid kami sa sini nga pagbisita!” siling sang isa ka sister halin sa Ukraine. “Nakita namon kon paano kami ginaatipan ni Jehova.”
Ang isa pa ka sister halin sa Ukraine nagsiling, “Pag-abot namon sa Poland, wala gid kami sang dala, pero salamat kay Jehova kay subong kompleto ang tanan namon nga kinahanglanon.”
Isa ka grupo sang mga drayber kag sang iban pa nga mga boluntaryo sa gua sang Assembly Hall sa Stęszew, Poland
Ang grupo nakigkita man sa mga boluntaryo nga nagabulig sa mga refugee. Ginpalab-ot ni Brother Sanderson ang gugma sang Nagadumala nga Hubon para sa ila paagi sa pagsambit sang Hebreo 6:10 kag pagpaathag nga ‘indi pagkalimtan ni Jehova ang ila binuhatan.’ Nagsiling pa sia, “Indi man namon ini pagkalimtan.” Nagsiling ang mga boluntaryo nga nalipay sila sa pagbulig sa ila mga kauturan.
Pagbisita sa tigulang nga mga sister nga halin sa Ukraine sa gua sang isa ka Kingdom Hall sa Radymno, Poland
Si Brother Vesa Väänänen, nga miembro sang Branch Committee sa Poland, nagsiling: “Makapabakod gid sang pagtuo nga makita nga kontrolado ni Jehova ang tanan nga butang. Gin-aman gid ni Jehova kon ano ang kinahanglan paagi sa sibu sa tion nga giya halin sa Nagadumala nga Hubon kag sa mga kauturan nga handa gid magbulig sa iban.”
Mga boluntaryo sa Assembly Hall sa Stęszew, Poland, sa diin ginahanda ang mga package nga ipadala bilang bulig
Samtang padayon nga ginaatipan sang aton mga kauturan ang mga kinahanglanon sang isa kag isa bisan ano man ang sitwasyon, naeksperiensiahan gid nila ang ginpromisa ni Jesus nga kalipay sa paghatag.—Binuhatan 20:35.
Manamian Ka Man Sini
NEWS RELEASE
“Padayon nga Pabakura ang Inyo Relasyon kay Jehova”
NEWS RELEASE