Ang Bagyo Ambo nag-landfall sa isla sang Samar sang Mayo 14, 2020. Ang Category 3 nga bagyo, nga amo ang una nga bagyo sa tuig 2020 sa Western Pacific Ocean, nagwaswas sa Samar sa kabaskugon nga 185 kilometros por ora. Linibolibo ka tawo ang ginpabakwit, nga nangin mas mabudlay pa gid bangod sang ginapatuman sang gobierno nga social distancing.

Wala sing nasamaran sa aton mga kauturan, pero 59 sa ila ang kinahanglan magbiya sa ila mga balay. Nagtener sila sa mga eskwelahan, nga ginhimo nga evacuation center, kag sa mga balay sang iban nga mga Saksi. Dugang pa, 82 ka balay sang aton mga kauturan ang nahalitan ukon naguba. Lima ka Kingdom Hall ang nahalitan man, kag isa ang naguba gid. Ang Komite sang Sanga sa Pilipinas naghimo sang duha ka Disaster Relief Committee para maatipan ang pisikal kag espirituwal nga kinahanglanon sang aton mga kauturan nga nabagyuhan.

Padayon naton nga ginapangamuyo ang aton mga kauturan sa Pilipinas nga nagabatas indi lamang sini nga bagyo, kundi sang pandemic man. Nagasalig gid kita nga padayon nga hatagan sila ni Jehova, ang aton “Igang sa wala sing katubtuban,” sang ila mga kinahanglanon.—Isaias 26:4.