ENERO 29, 2019
PERU
Ginhiwat sa Peru ang Katapusan nga Special Convention sang 2018
Gin-abiabi sang mga Saksi ni Jehova sa Peru ang 3,400 ka mga delegado halin sa siam ka pungsod sa katapusan nga “Magpakaisog”! Special Convention sang 2018, nga ginhiwat sang Nobiembre 23 asta 25. Ginhiwat ini nga kombension sa Monumental Stadium sa Lima nga amo ang kapital nga siudad. Ang kabilugan nga nagtambong sa stadium kag sa apat pa ka lokasyon naglab-ot sa 66,254. Dugang pa, may 719 ka bag-o nga mga utod nga nabawtismuhan. Ang programa ginpresentar sa English, Peruvian Sign Language, Quechua Ayacucho, kag Spanish.
Bata nga babayi sa Monumental Stadium nga nagababay sa katapusan nga adlaw sang kombension.
Ang talalupangdon sa sini nga okasyon amo ang pag-updanay sang mga delegado kag sang lokal nga mga manugbantala sa ministeryo. Nalipay man ang mga delegado kay natilawan nila ang pila ka pagkaon didto kag naeksperiensiahan nila ang lokal nga kultura kag naka-tour sila sa sanga talatapan sa Peru.
Si Ezequiel Porras, isa ka representante sa sanga talatapan sa Peru nagsiling: “Daku gid ang epekto sang Special Convention sa Peru. Indi gid ini malipatan nga hitabo para sa mga kauturan, kag maayo man ini nga panaksi sa mga tawo didto. Ginapasalamatan naton si Jehova sa sining espesyal nga kahigayunan nga madayaw ang iya dungganon nga ngalan.”—1 Pedro 2:12.
Ang mga pool para sa bawtismo nga ginbutang sa Monumental Stadium, diin 483 ang nabawtismuhan. Kag may 236 pa nga ginbawtismuhan sa apat pa lokasyon.
Mga delegado nga nagagua sa ministeryo upod sa lokal nga mga manugbantala.
Si Brother Samuel Herd, nga miembro sang Nagadumala nga Hubon nga nagahatag sang katapusan nga pamulongpulong kada adlaw.
Mga kauturan nga nagaabiabi sa mga bisita pag-abot nila sa Jorge Chávez International Airport sa Lima.
Nalakip sa tour sa sanga ang isa ka Bible exhibit parte sa pagpreserbar sa ngalan sang Dios sa Kasulatan.
Ginapakita sang mga kauturan kon paano maghimo sang sarisari nga pagkaon sa Peru sa tion sang isa ka group activity sa Assembly Hall. Makita diri ang pagpreparar kag pagserbe sang ceviche para sa mga delegado.
Ginpakita ang tradisyunal nga paagi sang paghabol sang hilo. Sa masami ini nga wool ginalugom paagi sa natural nga lugom halin sa tanom.
Nalipay gid ang mga delegado nga nag-tour sa sanga sa isa ka pinasahi nga gab-i sang pagtilipon nga may mga musika kag may tema nga “Magpasangkad sa Pag-alagad.” Nalakip sa sini ang mga tradisyunal nga musika, instrumento, kag saot halin sa tatlo ka panguna nga rehiyon sang Peru: ang desyerto nga malapit sa baybayon, ang Andes Mountains, kag ang kagulangan sa Peru.
Ang isa ka tradisyunal nga saot halin sa Trujillo, ginsaot sa tion sang pinasahi nga gab-i sang pagtilipon.
Ang sarisari nga senaryo sang pagbantala, ginpakita sa musical sina nga gab-i. Ginpakita man diri ang balay nga human sa adobe kag ang tradisyunal nga bayo sang Quechua nga mga tawo nga nagaistar sa kabukiran sang Cuzco.
Ang tanan nga nag-entra sa programa nagababay sa katapusan sang programa sina nga gab-i.