Ang isa ka bag-o nga eksibit nga nagasugid sang kaisog sang mga Saksi ni Jehova sa pag-atubang sa paghingabot sang mga Nazi ginbuksan sa Israel sang Marso 7, 2022. Ini nga eksibit makita sa Center for Humanistic Education sa Ghetto Fighters’ House Museum sa Western Galilee kag ginapresentar ini sa Arabic, English, kag Hebrew. Magapadayon ini nga eksibit asta sa Marso 2023. Para makahanda sa sini nga eksibit, nagbuligay ang mga musuem staff kag ang aton sobra 50 ka kauturan halin sa bilog nga kalibutan. Nagbulig ini nga mga kauturan sa pag-research, pag-design sang graphics, kag pag-translate.

Ang tema sining interactive nga eksibit amo ang “Wedontdothat,” nga nagakahulugan “wala namon ginahimo ina.” Gin-inspirar ini sang hayo nga ginhatag sang isa ka German nga soldado kay Brother Joachim Alfermann, nga isa sa mga Saksi ni Jehova nga ginpriso sang mga Nazi. a Bisan pa sang grabe nga pagpamilit, pagkastigo, kag pag-detain sa iya sa concentration camp, nangindi gihapon si Joachim nga mag-entra sa militar sang Germany, nga nagasiling: “Wala namon ginahimo ina.” Ang curator sang eksibit nga si Mrs. Yaara Galor, nagsiling: “Nahibaluan naton nga ginpamatay ang mga Judiyo bangod sang madamo nga mga rason. Pero minilyon nga iban pa ang ginpamatay man. . . . Ang kada isa sini nga mga grupo may ara gid pinasahi nga istorya.”

Si Dr. Gideon Greif, nga isa ka Holocaust expert kag Auschwitz historian, nagpamulongpulong sa programa sang pagbukas sang eksibit. Ginsugid niya nga ang mga Saksi ni Jehova nangindi nga magpirma sa deklarasyon nga ginapanghiwala nila ang ila pagtuo. Nagsiling sia: “[Ang mga Saksi ni Jehova] puede makagua dayon, ang pagpirma nagadugay lang sang isa ka minuto. Ginapakita sini nga bisan sa pinakamabudlay nga tion sa kasaysayan sang kalibutan, may mga tawo nga may ara gihapon mataas nga moral, sa ila ginahambal kag ginahimo. Gani, ang mga Saksi ni Jehova nagakabagay nga istoryahan, dumdumon, tun-an, kag isugid sa iban.”

Ang isa ka sister nga nagaobra sa branch sa Israel naka-attend sa pagbukas sang eksibit. Sia nagsiling: “Nagtulo gid ang akon luha sa pagpamensar nga may eksibit kita diri sa Israel sa isa ka museum nga bukas sa publiko . . . Indi ko gid malipatan sang nabatian ko ang mga miembro sang staff sang museum nga nagahambal sing ‘Saksi ni Jehova’ sa Hebrew nga lenguahe sa plataporma. Sigurado gid nga napadunggan ang ngalan ni Jehova sa sini nga okasyon.”

Nagasalig kita nga ang mga makakita sini nga eksibit mabuligan nga makatuon parte sa kaisog kag pagtuo sang aton mga kauturan sa Nazi Germany. Ang ila halimbawa sang katutom magapalig-on gid sa mga alagad ni Jehova subong nga padayon nga ‘magdalagan nga may pagbatas sa palumba.’—Hebreo 12:1.