Ang Oktubre 6, 2022, amo ang ika-100 ka tuig sugod sang ginbuksan ang branch office sa Greece.

Ang pagbantala sang maayong balita sa Greece nagsugod sang 1905. Ang mga Saksi ni Jehova mapisan nga nagbantala sang mensahe sang Biblia sa pungsod, kag sang 1922, ginbuksan ni Brother Joseph F. Rutherford ang una nga branch office sa Athens. Si Brother Athanassios Karanassios amo ang ginpili bilang una nga branch representative. Ang branch nagsugod sa pag-imprinta sang mga publikasyon sa Greek sang 1936. Duha ka tuig sang ulihi, ang gobierno naghimo sang kasuguan batok sa pagpangumbertir. Bangod sini, gin-aresto si Brother Karanassios sang 1939. Ginpasira ang printery, kag ginkumpiskar sing pila ka bulan ang propiedad sang organisasyon. Sang ulihi, sang nag-entra sa World War II ang Greece, gindeklarar ang martial law, amo nga gin-ban ang aton mga publikasyon kag ginpasira ang mga pasilidad sang Bethel.

Pagkatapos sang inaway sang 1945, gin-untat ang pag-ban sa aton, gani gin-organisar liwat sang nagapanguna nga mga kauturan ang pagbantala nga hilikuton. Duha ka tuig sang ulihi, si Brother Nathan H. Knorr nagbisita sa mga kauturan sa Greece kag naghimo sing plano nga magbukas sang bag-o nga mga pasilidad sang branch sa Tenedou Street sa Athens. Ginpakamaayo gid ni Jehova ini nga mga panikasog. Sang 1951, may 3,368 ka manugbantala sa pungsod. Mga 26 ka porsiento nga pagtaas ini kon ikumparar sang nagligad nga tuig.

Sang Oktubre 1954, gindedikar sang mga kauturan ang bag-o nga Bethel sa Kartali Street sa Athens. Nag-uswag ang pagbantala bisan pa ginahingabot sila. Sang 1967, ginkontrol sang militar ang pungsod sang Greece, kag gin-ban liwat ang mga miting sa kongregasyon kag pagbantala nga hilikuton.

Si Brother Michalis Kaminaris kag ang iya asawa nga si Eleftheria, nag-alagad sa Bethel sa tion sang ban. Si Brother Kaminaris nagsiling: “Sa tion sang pag-ban, gin-untat ang aton pag-imprinta sa Bethel, gani ang balay nga ginaistaran namon ni Eleftheria sa gua sang Athens amo ang nangin printery. Gina-type ni Eleftheria ang mga kopya sang Lalantawan sa isa ka daku nga typewriter. Para maghorma ang mga letra, ginadungan niya butang ang pulo ka panid sang papel sa typewriter kag ginatum-ok sing todo gid ang mga letra. Ginatipon ko dayon ang mga pahina kag ginatahi ini. Amo ini ang ginahimo namon kada gab-i asta sa tungang gab-i. May nagaistar nga pulis sa idalom namon, kag natingala kami nga wala gid sia nagsuspetsa sa amon.”

Nagpadayon ang pagdamo sang mga kauturan bisan may ban. Sang ginkuha ang ban sang 1974, kinahanglan naman ang mas daku nga pasilidad. Sang masunod nga mga dekada, nagdamo na gid ang mga manugbantala sa Greece amo nga kinahanglan padakuan ang branch office. Ang pasilidad sang branch subong, nga makita sa Drapetsona, Piraeus, gindedikar sang Nobiembre 18, 2018. Subong, may 27,752 ka manugbantala sa Greece.

Ang padayon nga pag-uswag sa Greece sa nagligad nga 100 ka tuig bisan pa sang pila ka beses nga ban, mga inaway, kag mga paghingabot, nagapamatuod nga wala sing makapugong kay Jehova sa ‘pagpadasig sang hilikuton sa nagakaigo nga tion sini.’—Isaias 60:22.