Sang Nobiembre 9, 2024, sobra 500 ang nag-attend sa espesyal nga programa sa branch sa Ghana para iselebrar ang ika-100 nga tuig sang pagbantala sang Ginharian sa Ghana. Nalakip sa programa ang mga video, mga reenactment, kag mga pamulongpulong nga nagapadaku sang importante nga mga natabo sa kasaysayan sang mga Saksi ni Jehova sa sini nga lugar.

Sang 1924, si Claude Brown, nga isa ka Estudyante sang Biblia halin sa West Indies, nag-abot sa Gold Coast (nga ginatawag subong nga Ghana) kag nagbantala sang mensahe sang Ginharian sa kapital nga siudad sang Accra. Madasig nga nabantalaan sang maayong balita ang madamo lugar, kag naporma ang mga grupo sang Bible study sa bilog nga pungsod. Tatlo ka tuig sang ulihi, nabawtismuhan ang pila ka tumandok sa Gold Coast. Sang mga dekada ’30 asta sa una nga mga tuig sang dekada ’40, madamo sang naeksperiensiahan nga mga problema ang aton mga kauturan. Ginhingabot sila bangod sang ila pagpabilin nga neutral. Pero, maathag gid nga ginapakamaayo ni Jehova ang ila mga panikasog para ibantala ang “maayong balita tuhoy sa mas maayo nga butang.” (Isaias 52:7) Pagkatapos sang World War II sang 1945, may ara na halos 600 ka Saksi ni Jehova sa bilog nga pungsod.

Sang ulihi, sang Hunyo 1947, nag-abot sanday Brother George Baker kag Sidney Wilkinson. Sila ang una nga mga misyonero nga gin-asayn sa Gold Coast nga nakaeskwela sa Gilead. Sa sulod sang lima ka tuig, ang kadamuon sang manugbantala sang Ginharian nakalab-ot sa halos 4,500! Sang 1948, ang una nga branch office sa Gold Coast ginbuksan para dumalahan ang pagbantala nga hilikuton sa sining mabungahon nga teritoryo. Sa masunod nga mga tinuig, linibo pa gid ang nagbaton sang mensahe sang Biblia kag nag-upod sa putli nga pagsimba.

Subong, halos 160,000 ka mga kauturan ang mapisan nga nagapakigbahin sa pagbantala kag pagpanudlo nga hilikuton sa bilog nga Ghana. Ang branch sa Ghana nagabulig man sa pag-translate sang base sa Biblia nga mga publikasyon sa 12 ka lenguahe didto.

Sa tion sang espesyal nga programa, si Brother Samuel Kwesie, miembro sang Branch Committee sa Ghana, ang naghatag sang panguna nga talk. Ginsambit niya sa iya nga pamulongpulong ang madamo nga kabudlayan kag pagpakamaayo nga naeksperiensiahan sang mga alagad ni Jehova sa Ghana sang nagligad nga isa ka gatos ka tuig. Sa pagdumdom sang matahom nga kasaysayan, sia nagsiling: “Sa nagligad nga 100 ka tuig, napamatud-an nga matuod gid ang ginasiling sang Pulong sang Dios: ‘Ang diutay mangin isa ka libo.’”—Isaias 60:22.