Para malab-ot ang mga lugar sa Gabon nga talagsa lang mabantalaan, ang branch sa Cameroon nag-organisar sang isa ka pinasahi nga kampanya sang Hunyo 1 asta Agosto 31, 2019. Tulumuron sang kampanya nga mabantalaan ang mga nagaistar sa napulo ka siudad nga may pinakamadamo nga mga tawo: ang Franceville, Koulamoutou, Lambaréné, Libreville, Makokou, Moanda, Mouila, Oyem, Port-Gentil, kag Tchibanga. Nagbulig sa sini nga kampanya ang 400 ka mga kauturan nga nagboluntaryo halin sa Canada, France, kag United States.

Sobra duha ka milyon ka tawo ang nagaistar sa Gabon. Ginabulubanta nga 80 porsiento diri ang nagahambal sing French, nga amo ang opisyal nga lenguahe sang lugar. Mga 30 porsiento naman sang mga tawo ang nagahambal man sing Fang bilang ila namat-an nga lenguahe. Gani sa sini nga kampanya, ginbantalaan ang mga tawo nga nagahambal sining duha ka lenguahe.

Isa ka tawo nga nagahambal sing Fang nga lenguahe ang interesado sa Biblia. Nagaistar sia sa Bissegue, sa Libreville. Nagsiling sia: “Subong ko lang nabatian ang mensahe sang Dios sa akon gid ’ya nga lenguahe!”

Ang isa ka sister nga nag-upod sa kampanya, nagsiling: “Makita mo gid sa sini nga kampanya ang gugma kag paghiusa sang organisasyon ni Jehova. Mainabyanon, maabiabihon, maalwan, makapalig-on, kag mahigugmaon gid ang mga kauturan. Pareho sa ginsiling ni Pablo parte sa kongregasyon sa Filipos, ‘nagahiliugyon kami kag nagahigugmaanay, nahiusa sing bug-os, kag isa sing panghunahuna.’”—Filipos 2:2.