Sang Biernes, Enero 25, 2019, nawasak ang dam sang isa ka minahan sa siudad sang Brumadinho, sa estado sang Minas Gerais, Brazil, nga nagresulta sa mudslide. Indi magnubo sa 150 ka tawo ang napatay, kag mga 182 pa ang ginapangita.

May duha ka kongregasyon sa Brumadinho, nga may mga 180 ka Saksi, nga kalabanan nagaobra sa sini nga minahan. Napulo ka brother ang nagaobra sa dam sang nawasak ini. Siam sa ila ang wala mahalitan, pero ang isa nga nagaalagad bilang gulang, ginapangita gihapon. Dugang pa, indi magnubo sa lima ka pamilya nga Saksi ang nagbakwit kag isa ka balay sang mga Saksi ang naguba gid.

Isa ka miembro sang Komite sang Sanga sa Brazil kag mga manugtatap sang sirkito sa sini nga rehiyon ang nagbisita sa mga biktima para maghatag sing pagpalig-on sa espirituwal kag sing praktikal nga bulig. Ginapangamuyo naton nga padayon nga pabakuron kag buligan sang aton Amay sa langit ang mga biktima sini nga trahedya.—Roma 15:5.