May kabilugan nga 49,040 ka tawo sa Belgium ang nagtambong sa 2021 nga pagselebrar sang Memoryal sang kamatayon sang Cristo. Amo ini ang pinakaimportante nga okasyon sang mga Saksi ni Jehova kada tuig. Sugod sang 1995, subong nga tuig ang may pinakamadamo nga nagtambong sa sini nga okasyon sa Belgium. Halos doble ini sa kadamuon sang mga Saksi sa sini nga pungsod.

Ang kalabanan nga tawo sa Belgium indi relihioso. Gani, makalilipay gid nga madamo ang nagtambong sa sini nga okasyon subong nga tuig. Halimbawa, sang 1970, sobra 90 porsiento sang mga taga-Belgium ang nagsiling nga Cristiano sila, kag sobra 6 porsiento lang ang nagsiling nga indi sila relihioso. Pero base sa mga report sining karon lang, mas manubo pa sa 60 porsiento sang populasyon sa Belgium ang mga Cristiano. Kag sobra 40 porsiento na ang nagasiling nga indi sila relihioso.

Sang nagligad lang nga mga tinuig, ang media sa Belgium nagpagua sing indi matuod nga mga report parte sa mga Saksi ni Jehova. Bisan pa sining negatibo nga mga balita, mas madamo nga mga tawo sa Belgium ang nangin interesado sa mga Saksi ni Jehova. Gusto nila mabal-an kon ano gid ang matuod. Bangod sini, nakita sini nga mga tawo nga nagapalanggaanay ang mga Saksi ni Jehova. Bisan ang ila mismo kabuhi nagbag-o kag nangin mas malipayon sila sang ginsunod nila ang mga ginatudlo sang Biblia.—Juan 13:35.

Sang Pebrero 2021, ang branch office sang mga Saksi ni Jehova sa Belgium nagreport nga 11,804 ka tawo ang nagatuon sing Biblia. Mas madamo ini sing mga 1,000 sangsa average sang nagligad nga tuig. Kag kada tuig, sa nagligad nga lima ka tuig, may average nga 450 ka tawo nga nagapabawtismo bilang isa sa mga Saksi ni Jehova.

Makalilipay gid ang pag-uswag sa Belgium. Pila lamang ini sa mga halimbawa nga makita gid sang mga Saksi ni Jehova sa bilog nga kalibutan ang katumanan sang tagna sa Biblia: “Ang diutay mangin isa ka libo kag ang gamay nga pungsod mangin gamhanan.”—Isaias 60:22.