Sang Disiembre 5, 2019, ang European Court of Human Rights (ECHR) nahiusa nga nagdesisyon pabor sa 22 ka mga Saksi ni Jehova sa Armenia. Suno sa ECHR, sala ang pagpriso sa mga brother kay nangindi sila nga magsoldado bangod sang konsiensia. Ang ECHR nagmando sa Armenia nga hatagan ang mga brother sing sobra $267,000 (EUR 242,000) bilang danyos. Amo ini ang pinakadaku nga kantidad nga ginpabayad sang ECHR sa isa ka gobierno para sa aton mga utod nga ginpriso kay nangindi sila nga magsoldado bangod sang konsiensia.

Sang 2012, ini nga mga brother ginpamatbatan nga nakasala kay nangindi sila nga magsoldado bangod sang konsiensia kag wala nila ginbaton ang alternative civilian service (ACS). Wala ginbaton sang mga brother ang ACS bangod sadto nga tion, ang mga hilikuton nga ginatanyag sang ACS ginadumalahan gihapon sang militar. Gani, 20 sa sining mga brother ang ginpriso antes sang 2013, kay sang 2013 lang ginsugdan sang Armenia ang ACS nga wala ginadumalahan sang militar kag gin-untatan ang pagpriso sa mga brother nga indi magsoldado bangod sang konsiensia.

Ginbase sang ECHR ang desisyon sini sang Disiembre 5 sa isa ka kaso sang 2017 sa diin nagdaug ang mga Saksi ni Jehova. Ini nga kaso amo ang Adyan and Others v. Armenia. Ang ECHR nagsiling nga kabalo gid ang Armenia nga ining duha ka kaso pareho. Gani ang Armenia dapat nangita sing maayo nga solusyon para sa 22 ka mga brother, imbes nga prisuhon sila. Sang nagligad nga tuig, madamo nga beses nga gintinguhaan sang mga brother nga mangita sing maayo nga solusyon sa ila kaso, pero wala gid nagpasugot ang gobierno sang Armenia. Gani ang ECHR nahiusa nga nagdesisyon pabor sa mga brother.

Nalipay kita nga sugod sang 2013, nagbag-o na ang pagtamod sang Armenia parte sa pagpangindi nga magsoldado bangod sang konsiensia. Ang aton mga brother indi na mapriso kag wala na sing criminal record bangod sa ila pagpabilin nga neutral. Sa nagligad nga pito ka tuig, ang ACS sa Armenia nangin modelo para sa iban nga mga pungsod. Pero sa desisyon sang ECHR sang Disiembre 5, ginpabayad sini gihapon ang Armenia kay wala ini nagtuman sang international law sang 2012.

Ini nga desisyon nagapakita nga ang ECHR handa gid magmulta sing daku sa isa ka pungsod nga wala nagatuman sang mga international human rights law. Nagapasalamat kita kay Jehova nga ginbuligan niya ang aton mga brother sa Armenia nga magdaug sa ila kaso. Ginapangamuyo naton nga ini nga desisyon magapalig-on sa aton mga brother sa iban nga pungsod nga mangindi sa pagsoldado bangod sang konsiensia, kag kabay pa nga mahatagan man sila sing alternative civilian service sa mga pungsod pareho sang Azerbaijan, South Korea, Turkey, kag Turkmenistan.