SEPTIEMBRE 12, 2019
ANGOLA
May Ginhiwat nga Asembleya sa Angola Refugee Camp sa Lenguahe nga Lingala kag Tshiluba
Sang Mayo 25 kag 26, 2019, ginhiwat ang programa sang “Magpakabakod!” nga sirkito nga asembleya sa lenguahe nga Lingala kag Tshiluba sa Lóvua refugee camp. Ini nga refugee camp may kalayuon nga 1,022 ka kilometro halin sa Luanda, ang kapital sang Angola. Sang ginhiwat ini nga asembleya, may 177 ka manugbantala upod sa ila mga pamilya nga nagaistar sa Lóvua camp. Pero, mga 380 ang nagtambong sa Lingala nga programa kag may 3 nga nabawtismuhan. Sa Tshiluba naman nga programa, 630 ang nagtambong kag 6 ang nabawtismuhan.
Ang kalabanan sang kauturan nga ara subong sa Lóvua nagpalagyo halin sa Democratic Republic of the Congo bangod sa kinagamo didto. Bangod ginadumilian sila sang mga awtoridad nga makagua sa Lóvua, ang aton mga kauturan indi makatambong sa espirituwal nga mga pagtilipon sa iban nga siudad. Gani, nagdesisyon ang branch nga maghiwat sing mga asembleya sa sulod mismo sang Lóvua camp. Nagpatindog man sila didto sing duha ka temporaryo nga Kingdom Hall. Ining mga Kingdom Hall ginagamit sang apat ka kongregasyon—tatlo sa Tshiluba nga lenguahe kag isa sa Lingala.
Sang Mayo 24, 2019, ang manugtatap sang sirkito kag ang isa ka branch representative nagkadto sa Lóvua camp para magbulig sa pagplastar sang sound equipment kag stage. Bisan pa mabudlay ang kabuhi sang aton mga kauturan bilang refugee, nag-amot sila sang mga trapal, kahoy, lubid, lansang, kag iban pa nga mga materyal nga kinahanglanon.
Pagkatapos sang programa, si Honoré Lontongo, nga isa ka ministeryal nga alagad sa isa sa mga Tshiluba nga kongregasyon sa refugee camp, nagsiling: “Nabatyagan namon nga palangga gid kami ni Jehova indi lang bilang isa ka grupo, kundi ang kada isa gid sa amon, bangod sang mga asembleya nga ginhiwat sa sulod mismo sang refugee camp bisan pa mabudlay ang sitwasyon diri. Nalipay gid ako!”
Padayon naton nga ginapangamuyo ang aton mga kauturan nga kinahanglan magbakwit sa iban nga lugar bangod sang kinagamo sa pulitika. Kabalo kita nga padayon sila nga amanan ni Jehova sang espirituwal nga pagkaon kag hatagan sila sang tanan nila nga kinahanglanon para magbakod ang ila pagtuo bisan diin man sila.—Roma 8:38, 39.
Mga brother nga nagahimo sang stage kag nagaplastar sang sound equipment
Anom ka kandidato sa bawtismo nga nagatindog para magsabat sang mga pamangkot sa bawtismo sa sirkito nga asembleya sa lenguahe nga Tshiluba
Mga kauturan nga nagahambal sing Lingala nga nagalakat pakadto sa suba nga duha ka kilometro ang kalayuon halin sa refugee camp para magtan-aw sang bawtismo
Si Brother Johannes De Jager, nga miembro sang Komite sang Sanga sa Angola, upod sa mga kauturan nga nagahambal sang Lingala pagkatapos sang asembleya
Basi Manamian Ka Man
NEWS RELEASE
Update sa Venezuela: Pag-uswag sang Hilikuton sang mga Saksi ni Jehova Bisan Pa Padayon nga Nagabudlay ang Sitwasyon
Bisan pa mabudlay ang sitwasyon, ang mga Saksi ni Jehova sa Venezuela maisog nga nagapadayon sa ila pagministeryo.
ANG LALANTAWAN—TULUN-AN NGA EDISYON
Paglaum Walay Sapayan sang Kabudlayan—Isa ka Asambleya sa “Refugee Camp”
2014 TUIGAN NGA LIBRO SANG MGA SAKSI NI JEHOVA
Determinado sa Pag-alagad kay Jehova
Si Phillip Tengbeh kag ang iya asawa nalagyo sang ginsalakay sang mga rebelde ang ila lugar, ang Koindu. Determinado sila nga alagdon si Jehova, gani nagbulig sila sa pagpatindog sing lima ka Kingdom Hall.