preshiton ke kaam 21:1-40
21 hamne bhaari dil se unse vida li aur apni samudri yaatra shuroo ki. hum badi tezee se seedhe kos dveep pahunche, fir doosre din rudus dveep aaye aur vahaan se patra bandargah.
2 fir hamein ek jahaz mila jo seedhe samundar paar feeneeke jaa raha tha, hum us par savaar hokar vahaan se chal diye.
3 raaste mein hamein kuprus dveep dikhayi diya jo hamare baayin taraf* tha. use peechhe chhodte huye hum seeriya ki taraf badhte gaye aur sor ke bandargah pahunchkar vahaan jahaz se utre, kyonki vahaan jahaz ka maal utara jaana tha.
4 vahaan hamne dhoondhkar pata lagaya ki chele kahaan rehte hain aur hum saat din tak unhin ke yahaan thahre. magar pavitra shakti ne jo zahir kiya tha uski vajah se chelon ne paulus se baar-baar kaha ki woh yarooshalem na jaaye.+
5 jab vahaan thaharne ka samay poora hua, to hum vahaan se nikle aur apne safar par chal pade. magar saare bhaai, aurton aur bachchon ke saath hamein shehar ke baahar tak vida karne aaye. hamne samundar ke kinare ghutne tekkar prarthna ki
6 aur ek-doosre ko alvida kehne ke baad hum jahaz par chadh gaye aur woh apne gharon ko laut gaye.
7 fir hum sor se nikle aur samudri raaste se patuli-mayis shehar ke bandargah pahunche. vahaan hum bhaaiyon se mile aur ek din unke saath rahe.
8 agle din hum vahaan se nikaalkar kaisariya pahunche aur pracharak filippus ke ghar gaye. filippus chune huye saat aadmiyon mein se ek tha+ aur hum uske yahaan thahre.
9 us aadmi ki chaar kunvari betiyaan thi jo bhavishyavani karti thi.+
10 hamein vahaan rehte kaafi din ho gaye aur tab yahoodiya se agbus naam ka ek bhavishyavakta+ aaya.
11 usne hamare yahaan aakaar paulus ka kamarband liya aur usse apne haath-pair baandhkar kaha, “pavitra shakti kehti hai, ‘jis aadmi ka yah kamarband hai, use yahoodi isi tarah yarooshalem mein baandheinge+ aur doosre raashtron ke logon ke havale kar deinge.’”+
12 jab hamne yah suna, to hum aur vahaan ke log paulus se minnatein karne lage ki woh yarooshalem na jaaye.
13 tab paulus ne kaha, “tum kyon ro-rokar mera irada* kamzor kar rahe ho? yakeen maano, main prabhu yeeshu ke naam ki khaatir yarooshalem mein na sirf bandi banne ke liye balki marne ke liye bhi taiyar hoon.”+
14 jab woh nahin maana to hum yah kehkar chup ho gaye, “yahova* ki marzee poori ho.”
15 iske baad hamne safar ki taiyari ki aur yarooshalem ke liye nikaal pade.
16 kaisariya se kuch chele bhi hamare saath aaye taaki hamein kuprus ke manaason ke ghar le jaayen jiske yahaan hamein thaharna tha. manaason shuroo ke chelon mein se ek tha.
17 jab hum yarooshalem pahunche, to bhaaiyon ne khushi-khushi hamara swagat kiya.
18 magar agle din paulus hamare saath yakub+ se milne gaya aur sabhi pracheen vahaan maujood the.
19 paulus ne unhein namaskar kiya aur unhein poora byaura diya ki parmeshvar ne uski seva ke zariye gair-yahoodiyon ke beech kya-kya kaam kiye the.
20 yah sunkar woh parmeshvar ki mahima karne lage aur unhonne paulus se kaha, “bhaai, tu dekh raha hai ki hazaron yahoodi vishvasi ban gaye hain aur woh sab poore josh ke saath kaanoon maante hain.+
21 magar unhonne tere baare mein yah afvah suni hai ki tu doosre raashtron mein rehnevale sab yahoodiyon ko moosa ke kaanoon ke khilaf bagavat karna sikha raha hai. tu unse kehta hai ki woh na to apne bachchon ka khatna karein, na hi sadiyon se chale aa rahe rivazon ko maanein.+
22 ab is baare mein kya kiya jaaye? unhein pata chal hi jaayega ki tu yahaan aaya hua hai.
23 isliye hum jo tujhse kah rahe hain woh kar. hamare yahaan aise chaar aadmi hain jinhonne mannat maani hai.
24 tu in aadmiyon ko saath le jaa aur rivaz ke mutabik unke saath-saath khud ko shuddh kar aur unka kharch utha taaki woh apna sir mundvayen. tab har koi jaan lega ki tere baare mein unhonne jo afvah suni thi woh sach nahin hai, balki tu sahi chaal chalta hai aur kaanoon bhi maanta hai.+
25 jahaan tak gair-yahoodi vishvasiyon ki baat hai, hamne apna faisla unhein likh bheja hai ki woh moorton ke aage bali ki hui cheezon se,+ khoon se,+ gala ghonte huye jaanvaron ke maans se*+ aur naajayaz yaun-sambandh* se hamesha door rahein.”+
26 agle din paulus un aadmiyon ko le gaya aur kaanoon ke mutabik usne khud ko un aadmiyon ke saath shuddh kiya.+ woh mandir ke andar yah batane gaya ki kaanoon ke mutabik shuddh hone ke din kab poore honge aur kab unmein se harek ke liye balidan chadhaye jaane hain.
27 jab woh saat din poore honevale the, to asia se aaye yahoodiyon ne use mandir mein dekha aur bheed ko bhadkakar use pakad liya.
28 woh chilla-chillakar kehne lage, “israel ke logo, hamari madad karo! yahi hai woh aadmi jo har kahin, har kisi ko hamare logon ke khilaf aur hamare kaanoon aur is jagah ke khilaf shiksha de raha hai. aur-to-aur, yah yoonaniyon ko is mandir mein laaya hai aur isne is pavitra jagah ko dooshit kar diya hai.”+
29 aisa unhonne isliye kaha kyonki unhonne pehale, ifisus ke trufimus+ ko uske saath shehar mein dekha tha aur unhein laga ki paulus use mandir ke andar le aaya hai.
30 tab saare shehar mein hohalla hone laga aur log ikattha hokar mandir ki taraf daud pade. unhonne paulus ko dhar-dabocha aur use ghaseette huye mandir ke baahar le gaye. usi ghadi darvaze band kar diye gaye.
31 woh use maar daalna chahte the. tabhi romi paltan ke senapati ko khabar mili ki saare yarooshalem mein haahakar macha hua hai.
32 tab woh fauran sainikon aur sena-afsaron ko lekar neeche unke paas dauda. jab yahoodiyon ne senapati aur uske sainikon ko dekha, to paulus ko peetna band kar diya.
33 tab senapati paas aaya aur usne paulus ko hirasat mein le liya. usne hukm diya ki use do zanjeeron se baandh diya jaaye.+ fir woh poochhtachh karne laga ki woh kaun hai aur usne kya kiya hai.
34 magar bheed mein koi kuch chillata to koi kuch. jab woh is hangame ki vajah se paulus ke baare mein theek-theek nahin jaan paaya, to usne hukm diya ki paulus ko sainikon ke rehne ki jagah le jaao.
35 magar jab paulus seedhiyon par pahuncha, to bheed use maarne par utaroo ho gayi isliye sainikon ko use uthakar le jaana pada.
36 logon ki bheed yah chillati hui peechhe-peechhe aa rahi thi, “ise maar daalo!”
37 jab woh paulus ko lekar apne rehne ki jagah pahunchnevale the to paulus ne senapati se kaha, “kya main kuch kah sakta hoon?” usne kaha, “kya tu yoonani bol sakta hai?
38 kya tu vahi misri nahin jisne kuch samay pehale bagavat ki aag bhadkayi thi aur 4,000 kataarband aadmiyon ko veerane mein le gaya tha?”
39 tab paulus ne kaha, “main darasal ek yahoodi hoon+ aur kilikiya ke tarsus shehar ka naagrik hoon+ aur woh koi chhota shehar nahin hai. isliye main tujhse binti karta hoon ki mujhe in logon se baat karne ki ijazat de.”
40 jab usne ijazat di to paulus ne seedhiyon par khade-khade haath se logon ko shaant hone ka ishara kiya. tab sannata chha gaya aur paulus ibrani bhasha mein unse baat karne laga.+ usne kaha,
kai footnote
^ ya “bandargah ki taraf.”
^ ya “dil.”
^ ya “aise jaanvar ka maans jiska khoon achhi tarah nahin bahaya jaata.”
