pehala raja 8:1-66
8 tab sulaiman ne israel ke sabhi aguvon ko, yaani sabhi gotron ke mukhiyaon aur pitaon ke gharanon ke pradhanon ko yarooshalem bulvaya+ taaki woh daavidpur yaani siyyon+ se yahova ke karar ka sandook le aayen.+ tab woh sabhi yarooshalem mein raja sulaiman ke paas aaye.
2 israel ke sabhi aadmi, etaneem* naam ke saatvein maheene mein tyohar* ke samay raja sulaiman ke saamne ikattha huye.+
3 jab israel ke saare aguve aaye to yaajkon ne karar ka sandook uthaya.+
4 yaajak aur levi yahova ke karar ka sandook, bheint ka tamboo+ aur usmein rakhi saari pavitra cheezen le aaye.
5 raja sulaiman aur israel ki poori mandli, jise usne bulvaya tha, karar ke sandook ke saamne haazir the. itni taadad mein bhedon aur gaay-bailon ki bali chadhayi gayi+ ki unki ginti nahin ki jaa sakti thi.
6 fir yaajak yahova ke karar ka sandook us jagah le aaye jo uske liye banayi gayi thi.+ woh use bhavan ke bheetri kamre yaani param-pavitra bhaag mein le aaye aur use karoobon ke pankhon ke neeche rakh diya.+
7 is tarah karoobon ke pankh us jagah ke oopar faile huye the jahaan sandook rakha gaya tha aur karoob, sandook aur uske dandon par chhaaya kiye huye the.+
8 sandook ke dande+ itne lambe the ki unke sire pavitra bhaag se dikhte the jo bheetri kamre ke saamne tha. magar dandon ke sire baahar se nahin dikhayi dete the. aaj tak ye cheezen vahin rakhi hui hain.
9 sandook mein patthar ki do patiyaon+ ko chhod aur kuch nahin tha jo moosa ne uske andar rakhi thi.+ moosa ne ye patiyayen horeb mein us vakt rakhi thi jab yahova ne israeliyon ke saath unke misra se nikaalkar aate vakt ek karar kiya tha.+
10 jab yaajak pavitra jagah se baahar nikaal aaye to yahova ka bhavan baadal+ se bhar gaya.+
11 baadal ki vajah se yaajak vahaan khade hokar seva nahin kar paaye kyonki yahova ka bhavan yahova ki mahima se bhar gaya tha.+
12 us vakt sulaiman ne kaha, “yahova ne kaha tha ki woh ghane baadlon mein nivas karega.+
13 main tere liye ek shaandar bhavan, ek mazboot bhavan banane mein kaamyab ho gaya taaki tu sada ismein nivas kare.”+
14 fir raja israel ki poori mandli ki taraf muda jo vahaan khadi thi aur logon ko aasheervad dene laga.+
15 usne kaha, “israel ke parmeshvar yahova ki taareef ho. usne apne munh se jo vaada kiya tha use aaj apne haathon se poora kiya hai. usne mere pita daavid se kaha tha,
16 ‘jis din main apni praja israel ko misra se nikaal laaya tha, us din se lekar ab tak mainne israel ke kisi bhi gotra ke ilake mein koi shehar nahin chuna ki vahaan mere naam ki mahima ke liye koi bhavan banaya jaaye.+ magar mainne daavid ko apni praja israel par raaj karne ke liye chuna hai.’
17 mere pita daavid ki dili tamanna thi ki woh israel ke parmeshvar yahova ke naam ki mahima ke liye ek bhavan banaye.+
18 magar yahova ne mere pita daavid se kaha, ‘yah achhi baat hai ki tu mere naam ki mahima ke liye ek bhavan banane ki dili tamanna rakhta hai.
19 par tu mere liye bhavan nahin banayega balki tera apna beta, jo tujhse paida hoga, woh mere naam ki mahima ke liye ek bhavan banayega.’+
20 yahova ne apna yah vaada poora kiya hai kyonki main apne pita daavid ke baad raja bana hoon aur israel ki raajgaddi par baitha hoon, theek jaise yahova ne vaada kiya tha. aur mainne israel ke parmeshvar yahova ke naam ki mahima ke liye bhavan bhi banaya hai.+
21 is bhavan mein mainne us sandook ke liye jagah taiyar ki hai jismein karar ki patiyayen hain.+ yahova ne yah karar hamare purkhon ke saath us samay kiya tha jab woh unhein misra se nikaalkar laa raha tha.”
22 fir sulaiman israel ki poori mandli ke dekhte yahova ki vedi ke saamne khada hua aur usne aasman ki taraf apne haath failakar yah prarthna ki:+
23 “hey israel ke parmeshvar yahova, tere jaisa parmeshvar koi nahin,+ na oopar aasman mein na neeche dharti par. tu hamesha apna karar poora karta hai aur apne un sevkon se pyar* karta hai+ jo tere saamne poore dil se sahi raah par chalte hain.+
24 toone apna woh vaada poora kiya hai jo toone apne sevak, mere pita daavid se kiya tha. toone khud apne munh se yah vaada kiya tha aur aaj use apne haathon se poora bhi kiya.+
25 ab hey israel ke parmeshvar yahova, tu apna yah vaada bhi poora karna jo toone apne sevak, mere pita daavid se kiya tha: ‘agar tere bete teri tarah mere saamne sahi raah par chalte raheinge aur is tarah apne chaalchalan par dhyan deinge, to aisa kabhi nahin hoga ki mere saamne israel ki raajgaddi par baithne ke liye tere vansh ka koi aadmi na ho.’+
26 hey israel ke parmeshvar, meharbani karke tu apna yah vaada poora karna jo toone apne sevak, mere pita daavid se kiya tha.
27 lekin kya parmeshvar vaakai dharti par nivas karega?+ dekh, tu to swarg mein, haan, vishal swarg mein bhi nahin sama sakta.+ fir yah bhavan kya hai jo mainne banaya hai, kuch bhi nahin!+
28 hey mere parmeshvar yahova, aaj tera yah sevak tere saamne jo prarthna kar raha hai us par dhyan de, uski kripa ki binti sun. tu uski madad ki pukar sun aur uski prarthna sweekar kar.
29 toone is bhavan ke baare mein kaha tha ki isse tera naam juda rahega,+ isliye teri aankhein din-raat is bhavan par lagi rahein aur jab tera sevak is bhavan ki taraf munh karke prarthna kare to tu us par dhyan dena.+
30 jab tera yah sevak aur teri praja israel ke log is jagah ki taraf munh karke tujhse kripa ki binti karein to tu unki sunnaa, apne nivas-sthan swarg se unki sunnaa.+ tu unki fariyad sunnaa aur unke paap maaf karna.+
31 agar ek aadmi ka sangi-saathi us par ilzam lagaye ki toone mere saath galat kiya hai aur use shapath dharayi jaati hai* aur woh aadmi shapath ki vajah se is bhavan mein teri vedi ke saamne aaye,+
32 to tu swarg se sunkar kaarravai karna. tu apne sevkon ka nyay karna, unmein se jo dusht hai use doshi* thehrana aur use uske kiye ki saza dena aur jo nek hai use bekasoor* thehrana aur uski neki ke mutabik use fal dena.+
33 agar teri praja israel tere khilaf paap karte rehne ki vajah se dushman se yuddh haar jaaye+ aur woh baad mein tere paas laut aaye, tere naam ki mahima kare+ aur is bhavan mein aakaar tujhse prarthna kare aur reham ki bheekh maange,+
34 to tu swarg se apni praja israel ke logon ki binti sunnaa aur unke paap maaf karna. tu unhein is desh mein lauta le aana jo toone unke purkhon ko diya tha.+
35 agar unke paap karte rehne ki vajah se aakash ke jharokhe band ho jaayen aur baarish na ho+ aur tu unhein namrata ka sabak sikhaye* aur is vajah se woh is jagah ki taraf munh karke prarthna karein, tere naam ki mahima karein aur paap ki raah se palatkar laut aayen,+
36 to tu swarg se apni praja israel ki sunnaa aur apne sevkon ke paap maaf karna kyonki tu unhein sahi raah ke baare mein sikhayega+ jis par unhein chalna chahiye aur apne is desh par baarish karega+ jise toone apne logon ko virasat mein diya hai.
37 agar desh mein akaal pade+ ya mahamari faile ya faslon par jhulsan, beemari,+ dalvali tiddiyon ya bhookhi tiddiyon ka kehar toote ya koi dushman aakaar desh ke kisi shehar* ko gher le ya desh mein koi beemari faile ya kisi aur tarah ki museebat aaye+
38 aur aise mein ek aadmi ya teri praja israel ke sab log is bhavan ki taraf haath failakar tujhse kripa ki binti karein+ (kyonki har koi apne man ki peeda jaanta hai),+
39 to tu apne nivas-sthan swarg se unki sunnaa,+ unhein maaf karna+ aur kadam uthana. tu unmein se harek ko uske kaamon ke hisab se fal dena+ kyonki tu harek ka dil jaanta hai (sirf tu hi sahi maaynon mein jaanta hai ki har insan ka dil kaisa hai).+
40 tab woh jab tak is desh mein raheinge, jo toone hamare purkhon ko diya tha, tera dar maante raheinge.
41 agar koi pardesi, jo teri praja israel mein se nahin hai, tere naam ke baare mein sunkar door desh se aata hai+
42 (kyonki pardesi tere mahan naam ke baare mein suneinge+ aur yah bhi ki toone kaise apna shaktishali haath badhakar bade-bade kaam kiye the) aur is bhavan ki taraf munh karke prarthna karta hai,
43 to tu apne nivas-sthan swarg se uski sunnaa+ aur uske liye woh sab karna jiski woh guzarish karta hai taaki dharti ke sab deshon ke log tera naam jaanein aur tera dar maanein,+ jaise teri israeli praja tera dar maanti hai aur woh jaanein ki yah bhavan jo mainne banaya hai, isse tera naam juda hai.
44 jab tu apne logon ko dushman se ladne kahin bheje+ aur woh tere chune huye shehar ki taraf+ aur is bhavan ki taraf munh karke, jo mainne tere naam ki mahima ke liye banaya hai, tujh yahova se prarthna karein,+
45 to tu swarg se unki prarthna aur unki kripa ki binti sunnaa aur unhein nyay dilana.
46 agar woh tere khilaf paap karein (kyonki aisa koi bhi insan nahin jo paap na karta ho)+ aur tu krodh se bharkar unhein dushmanon ke havale kar de aur dushman unhein bandi banakar apne desh le jaayen, fir chahe woh paas ka desh ho ya door ka+
47 aur vahaan jaane ke baad jab unhein apni galti ka ehsas ho+ aur woh bandhuai ke desh mein rehte tere paas laut aayen+ aur tujhse reham ki bheekh maangein+ aur kahein, ‘hamne paap kiya hai, hamne gunah kiya hai, dushtata ka kaam kiya hai’+
48 aur woh dushmanon ke desh mein rehte poore dil aur poori jaan se tere paas laut aayen+ aur apne is desh ki taraf munh karke tujhse prarthna karein jo toone unke purkhon ko diya tha aur tere chune huye shehar ki taraf aur is bhavan ki taraf, jo mainne tere naam ki mahima ke liye banaya hai, munh karke prarthna karein+
49 to tu apne nivas-sthan swarg se unki prarthna aur kripa ki binti sunnaa+ aur unhein nyay dilana.
50 tu apne logon ke paap aur unke saare apradh maaf kar dena jo unhonne tere khilaf kiye honge. tu unke dushmanon ko un par daya karne ke liye udhaarna aur tab dushman un par daya kareinge+
51 (kyonki woh tere apne log aur teri virasat hain+ jinhein tu misra se, loha pighlanevale bhatthe se nikaalkar laaya tha).+
52 jab bhi tera yah sevak aur teri praja israel tujhse kripa ki binti karein to tu unki sunnaa,+ woh jab bhi tujhe pukarein* tu unki taraf kaan lagana+
53 kyonki hey saare jahan ke maalik yahova, toone unhein dharti ke sabhi logon se alag kiya aur unhein apni virasat banaya,+ theek jaise toone apne sevak moosa se us vakt ailan karvaya tha jab tu hamare purkhon ko misra se nikaalkar laa raha tha.”
54 jab sulaiman yahova se prarthna aur kripa ki binti kar chuka to woh yahova ki vedi ke saamne se utha, jahaan woh ghutne teke aur swarg ki taraf haath failaye prarthna kar raha tha.+
55 fir usne khade hokar buland aavaz mein israel ki poori mandli ko yah aasheervad diya:
56 “yahova ki badai ho, jisne apne vaade ke mutabik apni praja israel ko vishram ki jagah di hai.+ usne apne sevak moosa ke zariye jitne bhi vaade kiye the, woh sab-ke-sab poore huye, ek bhi vaada bina poora huye nahin raha.+
57 hamara parmeshvar yahova hamare saath rahe, theek jaise woh hamare purkhon ke saath raha tha.+ woh hamein kabhi na chhode na kabhi tyage.+
58 woh hamare dilon ko apni taraf khinche+ taaki hum uski sabhi raahon par chalein aur uski aagyaon, uske kaayde-kaanoonon aur nyay-siddhaanton ka paalan karein jo usne hamare purkhon ko diye the.
59 ab tak mainne yahova se daya ke liye jo-jo bintiyaan kin, unhein hamara parmeshvar yahova din-raat yaad rakhe taaki woh apne is sevak ko aur apni praja israel ko har din uthnevale haalaat ke mutabik nyay dilata rahe
60 jisse dharti ke sab deshon ke log jaanein ki yahova hi sachcha parmeshvar hai,+ uske siva koi aur parmeshvar nahin!+
61 isliye jaise aaj tumhara dil poori tarah hamare parmeshvar yahova par laga hai usi tarah hamesha laga rahe+ aur tum sab uske kaayde-kaanoon aur uski aagyayen maante rehna.”
62 fir raja aur poore israel ne yahova ke saamne badi taadad mein balidan chadhaye.+
63 sulaiman ne yahova ke liye 22,000 bailon aur 1,20,000 bhedon ki shaanti-baliyaan chadhayin.+ is tarah raja aur poore israel ne yahova ke bhavan ka udghatan kiya.+
64 us din raja ne yahova ke bhavan ke saamnevale aangan ke beech ka hissa pavitra thehraya kyonki vahaan par use hom-baliyaan, anaj ke chadhave aur shaanti-baliyon ki charbi chadhani thi. usne ye saare balidan vahaan isliye chadhaye kyonki yahova ke saamne jo tambe ki vedi+ thi, woh itni taadad mein hom-baliyon, anaj ke chadhavon aur shaanti-baliyon ki charbi+ chadhane ke liye chhoti pad jaati.
65 is mauke par sulaiman ne israeliyon ki ek badi bheed ke saath milkar hamare parmeshvar yahova ke saamne tyohar manaya.+ is bheed mein lebo-hamat* se lekar misra ghaati*+ tak ke saare log shaamil the. sulaiman ne un sabke saath milkar 7 din tyohar manaya. iske baad unhonne 7 din aur tyohar manaya. kul milakar 14 din tak yah chalta raha.
66 agle* din raja ne logon ko vida kiya aur unhonne raja ko aasheervad diya. yahova ne apne sevak daavid aur apni praja israel ki khaatir jo bhalai ki thi, usse unka dil khushi se umad raha tha+ aur woh sab aanand manate huye apne-apne ghar laute.
kai footnote
^ yaani chhapparon ke tyohar.
^ ya “atal pyar.”
^ ya “sangi-saathi use shaap deta hai.” yaani aisi shapath jismein us insan ko shaap milta tha jo jhoothi shapath khaata hai ya apni shapath poori nahin karta.
^ shaa., “dusht.”
^ shaa., “nek.”
^ ya “dukh de.”
^ shaa., “uske faatkon ke desh.”
^ ya “jo kuch tujhse maangein.”
^ ya “hamat ke pravesh.”
^ shaa., “aathvein,” yaani unhonne jo 7 din aur tyohar manaya tha, uska agla din.
