Ua hoʻomaka ka ʻino i ka manawa a Sātana i ʻōlelo ai i ka wahaheʻe mua. He ʻānela hemolele ʻo Sātana, akā, ʻaʻole ʻo ia i kū ma ka ʻoiaʻiʻo. (Ioane 8:44) Ua hoʻopunipuni ʻo ia iā ʻEva e hoʻolohe iā ia, ʻaʻole i ke Akua. ʻAʻole i hoʻolohe ʻo ʻAdamu i ke Akua. Ma muli o kēlā, loaʻa mai ka ʻehaʻeha a me ka make.​—E heluhelu iā Kinohi 3:​1-6, 19.

 I ko Sātana hoʻolohe ʻole ʻana i ke Akua, ua hoʻomaka ʻo ia i ke kūʻē ʻana i ke ea o ke Akua. Ke kākoʻo nei ka nui o kānaka iā Sātana i ke kūʻē ʻana i ke Akua. Ma muli o kēia, ua lilo ʻo Sātana i “aliʻi o kēia ao.”​—E heluhelu iā Ioane 14:30; 1 Ioane 5:19.

 Ua hemolele nā mea a pau a ke Akua i hana ai. ʻO nā kānaka a me nā ʻānela a ke Akua i hana ai, ua hiki iā lākou ke hoʻolohe i ke Akua. (Kānāwai Lua 32:​4, 5) Ua hana ke Akua iā kākou me ka hiki ke koho i ka hana pono a me ka hana hewa. ʻO ka hiki ke koho, ʻo ia ka mea a kākou e hoʻohana ai no ka hōʻike ʻana i ko kākou aloha i ke Akua.​—E heluhelu iā Iakobo 1:​13-15; 1 Ioane 5:3.

 Inā ʻaʻole na ke Akua e alakaʻi mai iā kākou, ʻaʻole maikaʻi. (Ke Kahuna 7:29; 8:9) Ua hala he 6,000 makahiki o ke ola ʻana o nā kānaka a moākāka ka hopena o ke alakaʻi ʻana o kānaka iā lākou iho. ʻAʻole hiki i nā aliʻi kānaka ke hoʻopau i nā kaua, ke kalaima, ka hana ʻino, a me ka maʻi.​—E heluhelu iā Ieremia 10:23; Roma 9:17.

  ʻAʻole like ke Akua me nā aliʻi kānaka. ʻO ka poʻe kākoʻo i ke alakaʻi ʻana o ke Akua, e hauʻoli maoli ana lākou. (ʻIsaia 48:​17, 18) I ka wā kokoke, e hoʻopau ana ke Akua i nā aupuni kānaka a pau. ʻO ka poʻe koho i ke alakaʻi ʻana o ke Akua, ʻo lākou wale nō ka poʻe e noho ana ma ka honua.—ʻIsaia 11:9.​—E heluhelu iā Daniʻela 2:44.

 E nānā i ka wikiō No ke Aha E ʻAe Ai ke Akua i ka ʻEhaʻeha?

 Ua ʻōlelo ʻo Sātana, ʻaʻohe kānaka nāna e koho e hoʻolohe iā Iēhova ma muli o ke aloha wale nō. Makemake paha ʻoe e hōʻike i ka hewa o kāna ʻōlelo? Hiki nō! Ma muli o ke ahonui o ke Akua, hiki iā kākou ke hōʻike inā kākoʻo kākou i ke Akua, a i ʻole nā kānaka. Ma o ke ʻano o ko kākou noho ʻana, hōʻike kākou i kā kākou koho.​—E heluhelu iā Ioba 1:​8-12; Solomona 27:11.

 Hiki iā kākou ke koho,ʻo ke Akua ko kākou Aliʻi, inā hoʻomana kākou iā ia me ka ʻoiaʻiʻo i hōʻike ʻia i ka Paipala. (Ioane 4:23) Hiki iā kākou ke hōʻole i ke aliʻi ʻana o Sātana ma o ke kāko’o ʻole ʻana i nā mea politika a me ke kaua, e like me Iesū.​—E heluhelu iā Ioane 17:14.

 Hoʻohana ʻo Sātana i kona mana no ka paipai ʻana i nā hana hewa. I kā kākou hōʻole ʻana i kēia mau hana, hoʻohenehene mai a kūʻē mai paha nā hoaloha a me ka ʻohana. (1 Petero 4:​3, 4) No laila, he koho kā kākou. E launa pū ana kākou me ka poʻe aloha i ke Akua? E hoʻolohe ana kākou i kāna mau kauoha aloha? Inā hana kākou i kēia, e hōʻike ana kākou ua hoʻopunipuni ʻo Sātana i kāna ʻōlelo ʻana, ʻaʻohe kānaka nāna e hoʻolohe i ke Akua inā paʻakikī loa nona.​—E heluhelu iā 1 Korineto 6:​9, 10; 15:33.

 Aloha ke Akua iā kākou, no laila hiki iā kākou ke hilinaʻi i kona ʻōlelo paʻa e hoʻopau i ka ʻino a me ka ʻehaʻeha. ʻO ka poʻe hōʻike i ko lākou piliwi ʻana i kēia, e hauʻoli ana lākou i ke ola mau loa ma ka honua nei.​—E heluhelu iā Ioane 3:16.