Binli kuli, Jeova Siedinba ñandi ki go boagidi bi niba biibilinba leni a tila boncianla. Ama ti naa kuadi ti tila ba. Ti maa ki go kubi a Diemdiena leni Beteli diena. Ti go kubi yaaba n tuuni Beteli nni leni yaaba n ye missionnaire tuonli nni. Ti todi ti kpiiba li pakili yogunu. Ti baadi i ligi lee ki tuuni laa tuona?

Tii miadi dima, tii tiendi bu miabu ba. Baa tin bua i ligi boncianla u laabaaliŋamo kpaanma tuonli po yeni, ti naa miadi i ligi ba. Ŋali bina kobiga leni dinla Tour de Garde yendo den waani ke, ti bani cain ke Jeova n tie ti todika. Ti kan mia nisaalo ligi bi o todima ba. Ŋali leni dinla ti ŋua laa maama i momoani po.​—⁠Matie 10:⁠8.

Ti yanluadi paabu n todi-​ti ti tuonli nni. Bi niba boncianla puuni-​ti o yanluadi paabu ligi ti tuonli po kelima bi pala mani leni tin bangi bi niba biibili yeni. Jeova Siedinba kuani bi yula cain, bi lenli, bi ligi leni ban pia yaala kuli li tuonli nni kelima bi bua U Tienu yanbuama n tieni ŋanduna kuli nni. (Bi Badiba Jama Tikpiali 29:⁠9) Ti Diemdiena nni leni ti taancianma diena nni ti pia bu yanluadipaabu kpaku ke yua kuli baa fidi tieni wan pia yaala. Yaaba n maani ki tendi i ligi yeni, bi kuli ki tie piada ba. Bi tie nani Jesu n den pagi yaa kpepoluodo n den tieni falino lie U Tienu Diegu ligitiagu nni. (Luki 21:​1-​4) Yeni, yua kuli yen maani “bili o denpo wan fidi yaala nani o bonpiakaala n pundi maanma”.​—⁠Korenti Yaaba Tikpiali 16:⁠2; Korenti Yaaba Tilieli 9:⁠7.

Ti bani cain ke Jeova baa cedi, yaa niba n bua ki ‘kpiagi-o leni bi bonpiakaala’ n pa bi yanluadipaabu O Diema todima po, O yanbuama n tieni.​—⁠Mi Kpanjama 3:⁠9.

• Bee n gagidi-​ti leni i jaanbuoli toe?

• Ti tiendi bee leni bu yanluadipaabu?