Jọja aflanmẹ de he nọ yin Elaine dọ dọ: “Eyin n’mọ bọ wehọmẹvigbẹ́ ṣie lẹ do gbẹtọ kanweko susu he nọ nọgodona yé to Intẹnẹt ji lẹ, n’nọ dọ etẹ nkọ yé diyin mọọ!’ Amọ́, nado dọ hójọhó, n’nọ whànwu yé.”

 Be e ko ṣí mọ na we pọ́n ya? Eyin mọ wẹ, hosọ ehe gán gọalọna we bọ ojlo lọ nado diyin to Intẹnẹt ji ma na nọ hẹn we jẹflumẹ.

•  Owù tẹlẹ wẹ to e mẹ?

•  “Yẹdoklọmẹ nado diyin to Intẹnẹt ji”

•  Be nujọnu wẹ dọ mẹlẹ ni nọgodona we bosọ yiwanna we to Intẹnẹt ji ya?

•  Ma nọ dọho di “gọyitọ he nọ wanu di whiwhẹnọ” blo

 Howhinwhẹn lẹ 22:1 dọ dọ: “E pọnte nado de oyín dagbe hú adọkun susugege.” Enẹwutu, e sọgbe dọ a ni jlo nado tindo yinkọ dagbe kavi jlo dọ mẹlẹ ni yiwanna we.

 Amọ́, to whedelẹnu ojlo lọ dọ mẹlẹ ni yiwanna we gán sinyẹn sọmọ bọ homẹ towe ma na nọ hùn adavo a mọdọ emi diyin. Be owù de tin to ehe mẹ ya? Onya he do owhe 16 yigbe dọ mọwẹ:

 “N’ko mọ bọ mẹlẹ wà nulunu delẹ, taidi nado lọ́n sọn petlezin awenọ ji wá odò to wehọmẹ ṣie, na yé jlo na diyin poun wutu.”

 Mẹdelẹ tlẹ nọ bayi video nulunu he yé wà delẹ tọn bo nọ zedo Intẹnẹt ji nado dọ̀n ayidonugo hagbẹ lẹ tọn. Di apajlẹ, jọja aflanmẹ susu lẹ nọ ze video he mẹ yé to adí avọ̀yinyan tọn dù te lẹ do Intẹnẹt ji—adí he bẹ nuhe ma dona yì onù paali lẹ hẹn—yèdọ nude he mẹde ma dona wà!

 Biblu dọ dọ: “Mì yí . . . glòlò-jijlá do wà nudepope blo.”—Filipinu lẹ 2:3.

 Lẹnnupọndo ehe ji:

•   Nawẹ yindidi to Intẹnẹt ji yin nujọnu na we sọ?

•   Be e jẹ dọ a ni ze agbasalilo kavi ogbẹ̀ towe do owù mẹ na hagbẹ towe lẹ nido yiwanna we bosọ kẹalọyi we ya?

 E ma yin whelẹponu wẹ mẹlẹ nọ wà nuhe do owù nado diyin. Erica he yin owhe 22 mẹvi doayi ayiha he mẹdelẹ nọ kàn go:

 “Mẹlẹ nọ ze fọto nuhe yé wà lẹ tọn susu do Intẹnẹt ji bọ e nọ taidi dọ yé do họntọn vivẹ́ susu he yé nọ saba zan whenu dopọ hẹ lẹ. Enẹ nọ zọ́n bọ mẹlẹ nọ lẹndọ yé diyin taun.”

 Cara he do owhe 15 dọ dọ, mẹdelẹ nọ doyẹklọmẹ:

 “N’ko mọ bọ mẹlẹ de fọto bo bayi taidi dọ agọ́ ji wẹ yé te nkọ, ṣogan whégbè wẹ yé te.”

 Matthew he yin owhe 22 mẹvi yigbe dọ emi ko wà onú mọnkọ pọ́n:

 “N’ze fọto de do Intẹnẹt ji bo bayi i taidi dọ Osó Everest ji wẹ n’de e te nkọ, dile etlẹ yindọ n’ma yì Asie pọ́n!”

 Biblu dọ dọ: “Mí jlo nado nọ yinuwa po ahundopo po to nulẹpo mẹ.”—Heblu lẹ 13:18.

 Lẹnnupọndo ehe ji:

•   Eyin a nọ zan nọtẹn gbẹdido Intẹnẹt ji tọn lẹ, be a ko ze nuhe ma yin nugbo de do e ji pọ́n nado sọgan diyin dogọ ya?

•    Be fọto he a nọ ze do e ji po nuhe a nọ kàn lẹ po nọ do gbẹtọ wunmẹ he a yin nugbo hia ya?

 Mẹsusu wẹ yise dọ nado sọgan diyin to Intẹnẹt ji, a dona do mẹsusu he nọ nọgodona we bosọ yiwanna we to Intẹnẹt ji lẹ. Matthew he go mí donù wayi, yigbe dọ mọ wẹ e nọ ṣí na emi dai:

 “N’nọ kanse mẹlẹ dọ, ‘Omẹ nẹmu wẹ nọ nọgodona we to Intẹnẹt ji’ kavi ‘Obá tẹ mẹ wẹ mẹhe nọ dohia dọ emi yiwanna we to Intẹnẹt ji lẹ sù jẹ?’ Na mẹsusu nido nọgodona mi to Intẹnẹt ji, n’nọ nọgodona mẹhe n’ma yọnẹn pọ́n lẹ bo nọ donukun dọ yelọsu na nọgodona mi. N’wá jẹ mimọ ji dọ n’dona diyin, podọ nọtẹn gbẹdidọ Intẹnẹt ji tọn lẹ yidogọna ojlo enẹ taun.”

 Maria he do owhe 25 doayi e go dọ, na mẹdelẹ omẹ sọha he nọ nọgodona yé bosọ nọ dohia dọ emi yiwanna yé to Intẹnẹt ji wẹ nọ magbe lehe yé yin nujọnu do sọ tọn:

 “Eyin yọnnu de ze fọto de do Intẹnẹt ji bọ mẹsusu ma dohia dọ emi yiwanna, e nọ mọdọ emi ma yọnwhanpẹ. Linlẹn enẹ ma sọgbe, amọ́ mẹsusu he to ninọmẹ enẹ nkọ mẹ wẹ na do linlẹn mọnkọ. To linlẹn de mẹ, yé to nukunpẹvi yí do pọ́n yede.”

 Biblu dọ dọ: “Mì dike mí dín gigo ovọ́, to agbàwhinwhlẹn finfọndote to ode awetọ mítọn ṣẹnṣẹn, to nuvẹun tintindo na ode awetọ mẹ blo.”—Galatianu lẹ 5:26.

 Lẹnnupọndo ehe ji:

•   Eyin a nọ zan nọtẹn gbẹdido Intẹnẹt ji tọn, be e nọ zọ́n bọ a nọ yí dewe jlẹdo mẹdevo lẹ go wẹ ya?

•    Be omẹ sọha he nọ nọgodona we to Intẹnẹt ji lẹ ji wẹ a nọ ze ayiha do hugan kakati nado jihọntọn he na hò towe pọ́n lẹ ya?