“Mẹdepope ma tindo owanyi he klohu ehe, dọ mẹde ni ze ogbẹ̀ etọn jo do ota họntọn etọn lẹ tọn mẹ.”—Johanu 15:13, Lẹdogbedevomẹ Aihọn Yọyọ Tọn.

 “Mẹde ma tindo owanyi he klohu ehe, dọ mẹde ze ogbẹ̀ etọn liai na họntọn etọn lẹ.”—Johanu 15:13, Biblu Wiwe lọ—Gun Alada.

 Jesu to alọgọna hodotọ etọn lẹ nado yọnẹn dọ owanyi he yé tindo na ode awetọ dona sinyẹn sọmọ bọ yé gán desọn ojlo mẹ bo kú do ode awetọ tamẹ.

 Whẹpo Jesu do dọ onú enẹlẹ na apọsteli etọn lẹ, e dọna yé dọ: “Ehe wẹ gbedide ṣie, dọ mì ni yiwanna ode awetọ kẹdẹdile yẹn ko yiwanna mì do.” (Johanu 15:12) Owanyi nankọ wẹ Jesu tindo na yé? Owanyi matin ṣejannabi wẹ, enẹ wẹ owanyi he nọ zọ́n bọ yè nọ ví do mẹdevo lẹ tọn mẹ jẹnukọn. To whenue e to yẹwhehodọ to aigba ji, e nọ dọ hodotọ etọn lẹ po mẹdevo lẹ po tọn hugan edetiti tọn. E gbọazọ̀nna mẹlẹ bo plọnnu yé gando Ahọluduta Jiwheyẹwhe tọn a go. E tlẹ wà azọ́n he mẹlẹ nọ yí nukunpẹvi do pọ́n lẹ na ale mẹdevo lẹ tọn wutu. (Matiu 9:35; Luku 22:27; Johanu 13:3-5) Amọ́ to Johanu 15:13 mẹ, owanyi he tlẹ sọ klohu enẹ wẹ Jesu to alọdlẹndo. Na nugbo tọn, ojlẹ vude to whenue e dọ ohó enẹlẹ godo, e do owanyi daho mọnkọ hia bo “ze ogbẹ̀ etọn jo taidi ofligọ de do ota mẹsusu tọn mẹ.” (Matiu 20:28; 22:39) Nuhe e wà enẹ dohia dọ e yiwanna mẹdevo lẹ hugan edetiti.

 Jesu yiwanna gbẹtọvi lẹ. Amọ́, mẹhe nọ setonuna nuplọnmẹ etọn lẹ wẹ e yiwanna hugan. E nọ mọ hodotọ etọn lẹ di họntọn vivẹ́ etọn lẹ, na yé nọ setonuna nuhe e dọ lẹ bosọ gbọṣi e dè to whlepọn etọn lẹ whenu wutu. (Luku 22:28; Johanu 15:14, 15) Enẹ wẹ tlẹ sọ sisẹ́ ẹ taun bọ e yí ogbẹ̀ etọn do sanvọ́ do ota yetọn mẹ.

 Klistiani dowhenu tọn lẹ setonuna nuhe Jesu dọ lẹ, bo nọ to gbesisọ mẹ nado kú do ode awetọ tamẹ. (1 Johanu 3:16) Na nugbo tọn, owanyi matin ṣejannabi, enẹ wẹ owanyi he nkọ Jesu dohia, wẹ na yin ohia tintan he yè na do nọ yọ́n Klistiani nugbo lẹ.—Johanu 13:34, 35.

 Ayinamẹ godo tọn he Jesu na apọsteli nugbonọ etọn 11 lẹ po odẹ̀ godo tọn he e hò hẹ yé po wẹ to weta 13 jẹ 17 owe Wẹndagbe Johanu tọn mẹ. E ma dẹn bọ e kú. To weta 15tọ mẹ, Jesu jlo na dohia devi etọn lẹ dọ yé dona gbọṣi kọndopọ mẹ hẹ emi nado dohia dọ yé yin devi emitọn lẹ, enẹwutu ewọ yí devi lọ lẹ jlẹdo alà he to sinsẹ́n detọ́n to vẹntin ji go. E na yé tuli dọ yé “ni nọ to sinsẹ́n susu detọ́n.” (Johanu 15:1-5, 8) Yé gán wàmọ, eyin yé nọ do owanyi hia bo nọ dọ mẹdevo lẹ tọn jẹnukọn, ehe nọ biọ dọ yé ni lá owẹ̀n he Jesu dọyẹwheho etọn lọ, enẹ wẹ “wẹndagbe Ahọluduta Jiwheyẹwhe tọn.”—Luku 4:43; Johanu 15:10, 17.

 Pọ́n video kleun ehe nado mọ nue to owe Johanu tọn mẹ delẹ.