N’yin jiji to Ciudad Obregón to agewaji Mexique tọn, podọ yẹn wẹ yin ovi atọ́ntọ to ovi ṣinẹnẹ he mẹjitọ mítọn lẹ ji lẹ mẹ. Gletòho tòdaho lọ tọn mẹ wẹ mí nọ nọ̀, fie baba ṣie nọ penukundo ogle pẹvi de go te. Lẹdo dagbe he mẹ yè gán nọ de wẹ, podọ pọninọ po ayajẹ po tin to whẹndo mítọn mẹ. Amọ́, e blawu dọ to whenue n’do owhe atọ́n poun, jẹhọn-ahizi de gbànú bo hẹn ogle mítọn gble pete, bọ mí to dandannu glọ nado sẹtẹn yì tòpẹvi devo mẹ.

 Akuẹ jẹ alọmẹ jẹ na baba ṣie ji. Amọ́ to ojlẹ dopolọ mẹ, e lẹzun ahànnumunọ. Ehe hẹnnugble taun to alọwle etọn mẹ podọ do míwu ovi lẹ go. Mí jẹ siga fìn do baba mítọn ji bo nọ nù. Whenue n’do owhe ṣidopo poun wẹ n’nùahànmú whla tintan. Ojlẹ vude to enẹgodo, mẹjitọ ṣie lẹ klan bọ n’wá peve to aṣa ylankan lẹ mẹ dogọ.

 Iya ṣie bẹ míwu ovi lẹ hẹn to whenue e bẹ agbàn jẹ owhé sunnu devo tọn gbè. Dawe lọ nọ tẹ̀ akuẹ onọ̀ mítọn, bọ akuẹ he ewọ kẹdẹ nọ mọ ma nọ pé nado penukundo mí go. Enẹwutu, yẹn po mẹdaho ṣie lẹ po, gọna nọvi ṣie lẹ nọ wazọ́n depope he mí mọ, etomọṣo akuẹ he mí nọ mọ ma nọ pé nado họ̀ dandannu lẹ. N’nọ súnsún afọpa na mẹlẹ, bosọ nọ sà blẹdi, linlinwe lẹ, ṣingumu po onú devo lẹ po. Podọ n’nọ danpé gbọn tòdaho lọ mẹ bo nọ to ogbó-hẹnnú adọkunnọ lẹ tọn mẹ keje pọ́n nado mọ núdùdù.

 Whenue n’do owhe ao, dawe de ylọ mi dọ ma wá wazọ́n hẹ emi to fie yè nọ kọ̀n ogbó lẹ do to tòdaho lọ mẹ. N’yigbena ẹn, bo jo wehọmẹ yìyì do bosọ tọ́n sọn whégbè. Akuẹ he e nọ sú mi to gbèdopo ma pé dọla Amelika tọn dopo (nudi 600 FCFA to egbehe), podọ núdùdù he yè ṣinyan sọn ogbó-hà mẹ lẹ wẹ e nọ na mi. Azava he n’yí nukija he n’ṣinyan to gbóta do gbá de mẹ wẹ n’nọ nọ̀. Mẹhe nọ zan hogbe gbigble lẹ po mẹhe nọ doalọ to walọ zanhẹmẹ tọn he ma sọgbe lẹ mẹ po lẹ ṣẹnṣẹn wẹ n’nọ. Susu yetọn wẹ peve to amasin adínọ lẹ nùnù mẹ bosọ nọ nùahànmú. Ojlẹ he ylan hugan to gbẹzan ṣie mẹ niyẹn, podọ ozán de ma tin bọ n’nọ gọ̀n avi ma ví, bosọ nọ to sisọsisọ na obu wutu. Na n’yin hẹntọnọ bo masọ yì wehọmẹ susu wutu, winyan nọ hù mi taun. N’nọ fie yè nọ kọ̀n ogbó do lọ na nudi owhe atọ̀n, whẹpo do wá sẹtẹn yì ayimatẹn devo to Mexique. To finẹ, n’wazọ́n to ogle lẹ mẹ bo nọ kẹ́n vounvoun lẹ, nọ gbẹ̀n sekanfun, nọ yì gbò leke lẹ bosọ nọ kùn wẹli lẹ sọn odò mẹ.

 To owhe ẹnẹ godo, n’lẹkọwa Ciudad Obregón. Dopo to tanyin ṣie lẹ mẹ he yin amanuwatọ, yí mi do owhé etọn gbè bo na mi họ̀nù dopo. N’jẹ odlọ ylankan lẹ kú ji to zánmẹ, podọ n’jẹflumẹ sọmọ bo nọ lẹn nado hù dee. To zánmẹ gbèdopo, n’hodẹ̀ hlan Jiwheyẹwhe bo dọ: “Oklunọ, eyin a tin, be n’jlo na yọ́n we, podọ n’na sẹ̀n we kakadoi. Eyin sinsẹ̀n nugbo de tin, n’jlo na yọ́n ẹn.”

 Sọn hoho gbọ́n wẹ n’ko nọ jlo nado plọnnu gando Jiwheyẹwhe go. Etlẹ yin whenue n’gbẹ́ to pẹvi, n’dán gbọn ṣọṣi voovo lẹ mẹ, amọ́ nuyiwa depope to yé mẹ tọn ma jẹ ṣie ji. Dopo tata to yé mẹ ma tlẹ nọ plọnmẹ onú kaka de do Biblu ji kavi tlẹ gọalọna mi nado mọ pekọ to gbigbọ-liho. Na delẹ to yé mẹ, akuẹ wẹ jẹnukọnna yé hugan, podọ to devo lẹ mẹ, sinsẹ̀nnọ lọ lẹ nọ doalọ to walọ zanhẹmẹ tọn he ma sọgbe lẹ mẹ.

 Whenue n’do owhe 19, dopo to yọnwẹn ṣie lẹ mẹ dọna mi dọ Kunnudetọ Jehovah tọn lẹ do nuhe Biblu dọ gando boṣiọ lẹ yiyizan to sinsẹ̀n-bibasi mẹ go hia emi. E hia Eksọdusi 20:4, 5 na mi. Wefọ lọ dohia dọ mí ma dona nọ basi boṣiọ pipà lẹ. Wefọ 5tọ dọ dọ: “Hiẹ ma dona dẹ́ do odò na yé kavi yin kiklọ nado sẹ̀n yé, na yẹn Jehovah Jiwheyẹwhe towe yin Jiwheyẹwhe de he nọ biọ mẹdezejo mlẹnmlẹn.” Enẹgodo, yọnwẹn ṣie kanse mi dọ, “Eyin Jiwheyẹwhe nọ yí boṣiọ lẹ zan nado wà azọ́njiawu lẹ kavi eyin e jlo dọ mí ni nọ yí yé zan to sinsẹ̀n-bibasi mẹ, naegbọn e nado dosẹ́n gando yé go?” Kanbiọ enẹ zọ́n bọ n’jẹ tlintlindo dín ji. Enẹgodo, mí sọ dọho susu do hosọ Biblu tọn devo lẹ ji. N’nọ yiwanna hodọdopọ enẹlẹ taun, sọmọ bọ n’ma tlẹ nọ yọnẹn dọ whenu to yìyì.

 To nukọn mẹ, e plan mi yì opli Kunnudetọ Jehovah tọn lẹ tọn de tẹnmẹ. Nuhe n’sè bosọ mọ to finẹ lẹ yinuwado ji e taun. Jọja lẹ lọsu tlẹ tindo mahẹ to tito opli lọ tọn mẹ bo nọ dọho sọn oplò ji po dẹ́didi po! N’dọna dee dọ, ‘Nuplọnmẹ dagbe nankọ die mẹlẹ to mimọyi tofi!’ Mahopọnna oda gblẹlẹ he to ota na mi po awusọhia ṣie he ma dọnmẹ sọmọ po, Kunnudetọ lẹ dokuavọna mi po zohunhun po. Whẹndo de tlẹ basi oylọna mi nado wá dù núdùdù whèjai tọn hẹ yé to opli lọ godo!

 To Biblu pinplọn ṣie hẹ Kunnudetọ lẹ whenu, n’plọn dọ Jehovah Jiwheyẹwhe yin Otọ́ owanyinọ de he nọ hò mítọn pọ́n mahopọnna ninọmẹ akuẹzinzan tọn mítọn, otẹn he mẹ mí te, akọ̀ he mẹ mí wá sọn kavi obá he mẹ mí yì wehọmẹ jẹ. Na nugbo tọn, ewọ ma nọ homẹnukuntapọn. (Owalọ lẹ 10:34, 35) To godo mẹ, n’wá mọ pekọ na nuhudo gbigbọmẹ tọn ṣie lẹ. Todin, n’masọ nọ mọ dee di nuvọ́nọ ba.

 Gbẹzan ṣie blebu wẹ jẹ pinpọnte ji to aliho ayidego tọn mẹ! N’masọ nọ nù siga, nùahànmú kavi yí hogbe gbigble lẹ zan ba. Numọtolanmẹ agọ̀ he n’nọ tindo dai whenue n’gbẹ́ to pẹvi lẹ jẹ bubusẹ ji, bọ n’masọ nọ kudlọ ylankan lẹ ba. Podọ n’ko duto numọtolanmẹ sinsinyẹn nuvọ́nọ-yinyin tọn ṣie ji, ehe n’lẹndọ oyà he n’ji to ovu whenu po wehọmẹ he n’ma yì sọmọ po nọ hẹnwa na mi.

 N’mọ asi dagbe de dà he yiwanna Jehovah podọ e nọ gọalọna mi taun. N’to sinsẹ̀nzọnwa todin taidi nugopọntọ tomẹyitọ Kunnudetọ Jehovah tọn lẹ tọn de, bo nọ dla agun lẹ pọ́n nado na tuli mẹmẹsunnu po mẹmẹyọnnu ṣie lẹ po, yèdọ whẹndo gbigbọmẹ tọn ṣie, bosọ plọnnu yé. N’dopẹ́ dọ huhlọn mẹwhlẹngán tọn Biblu tọn po nuplọnmẹ dagbe he Jiwheyẹwhe nọ na mí lẹ po zọ́n todin bọ; winyan dee tọn masọ nọ hù mi ba.