“Mìwlẹ dona . . . yin mẹplọntọ lẹ.” (Heb. 5:12) Yí nukun homẹ tọn do pọ́n! Jehovah, yèdọ Mẹplọntọ dagbe hugan wẹkẹ lọ tọn biọ to mí si nado plọnnu mẹdevo lẹ gando ewọ go! Whedepopenu he mẹde mọ azọ́ndenamẹ de yí nado plọnmẹ nugbo lọ gando Jehovah go—to whẹndo mẹ, to agun mẹ, kavi to lizọnyizọn lọ mẹ—lẹblanulọkẹyi vonọtaun po azọngban pinpẹn de po wẹ e mọyi. Nawẹ mí gán tindo kọdetọn dagbe to e mẹ gbọn?

Gblọndo kanbiọ enẹ tọn tin to nuhe apọsteli Paulu kàn hlan Timoti mẹ dọmọ: “Zindonukọn nado nọ jo dewe na wehihia gbangba tọn, na tudohomẹnamẹ, na mẹpinplọn.” Paulu sọ yidogọ dọ: “Gbọn ehe wiwà dali, hiẹ na whlẹn dewe po mẹhe nọ dotoaina we lẹ po gán.” (1 Tim. 4:13, 16) Owẹ̀n gbẹwhlẹngán tọn de wẹ a tindo nado mahẹ mẹdevo lẹ. Enẹwutu, nujọnu wẹ e yin dọ a ni dovivẹnu nado hẹn wehihia po mẹpinplọn towe po pọnte dogọ. Alọnuwe ehe na gọalọna we nado wàmọ. Delẹ to adà he e bẹhẹn lẹ mẹ die:

Jehovah wẹ “Nuplọnmẹtọ Daho” lọ. (Isa. 30:20) Dile etlẹ yindọ alọnuwe ehe na gọalọna we nado hẹn nugopipe wehihia po mẹpinplọn tọn towe po pọnte dogọ, ma wọn gbede blo dọ owẹ̀n Jehovah tọn do mẹlẹ wẹ mí te podọ ewọ wẹ nọ dọ̀n yé. (Joh. 6:44) Enẹwutu, nọ hodẹ̀ whẹwhẹ nado biọ gbigbọ wiwe. Nọ yí Ohó Jiwheyẹwhe tọn zan to gigọ́ mẹ. Nọ dọ̀n ayidonugo wá Jehovah ji, e ma yin do dewe ji. Nọ dovivẹnu nado do owanyi sisosiso na Jiwheyẹwhe do ahun hosetọ towe lẹ tọn mẹ.

A ko yin azọ́ndena nado plọnnumẹ gando owẹ̀n titengbe hugan he ko yin zizedo alọmẹ na gbẹtọvi lẹ pọ́n lọ go. Mí deji dọ a na tindo kọdetọn dagbe dile a to ginganjẹ “huhlọn he Jiwheyẹwhe nọ namẹ” go.—1 Pita 4:11.

Mẹplọntọ hatọ towe lẹ,

Hagbẹ Anademẹtọ Kunnudetọ Jehovah Tọn lẹ Tọn