To Biblu mẹ, nuhe hogbe Heblugbe tọn lọ na·vaʼʹ, he yin lilẹdo “dọ dọdai,” nọ dlẹnalọdo na taun tọn wẹ nado lá owẹ̀n, whẹdida, nuplọnmẹ walọ dagbe tọn, kavi gbedide gbọdo de he wá sọn Jiwheyẹwhe dè. E sọ sọgan dlẹnalọdo nulila de he wá sọn Jiwheyẹwhe dè gando nuhe to nukọn ja de go hinhẹn zun yinyọnẹn. Wẹndomẹ he wá sọn Jiwheyẹwhe dè wunmẹ ehe lẹpo wẹ dọdai Ezekiẹli tọn lẹ bẹhẹn.—Ezek. 3:10, 11; 11:4-8; 14:6, 7; 37:9, 10; 38:1-4.

• NUMIMỌ

• NUYIJLẸDONUGO

• WADOHIA

Owe Ezekiẹli tọn bẹ numimọ, nuyijlẹdonugo, oló po wadohia owẹ̀n dọdai tọn lẹ tọn po hẹn.

To whedelẹnu, dọdai Ezekiẹli tọn lẹ nọ mọ hẹndi hugan whladopo. Di apajlẹ, dọdai hẹngọwa tọn lọ lẹ mọ hẹndi jẹ obá de mẹ to whenue omẹ Jiwheyẹwhe tọn lẹ lẹkọwa Aigba Pagbe tọn lọ ji. Ṣigba, dile Weta 9tọ owe ehe tọn na dohia do, susu dọdai hẹngọwa tọn enẹlẹ tọn wẹ to hẹndi mọ to egbehe bo nasọ mọ hẹndi to sọgodo.

To dai, mí nọ pọ́n suhugan nuhe dọdai Ezekiẹli tọn bẹhẹn lẹ tọn hlan taidi ohia nuhe na wá jọ lẹ tọn. Ṣigba, owe ehe ma basi zẹẹmẹ dọ mẹde, nude, nọtẹn de kavi nujijọ he yin nùdego to dọdai Ezekiẹli tọn mẹ de nọtena nuhe na wá jọ to nukọn mẹ depope, adavo to fihe dodonu Owe-wiwe tọn he họnwun de tin nado wàmọ te lẹ. * Kakatimọ, e na zinnudo lehe susu dọdai Ezekiẹli tọn lẹ tọn na mọ hẹndi yetọn daho hugan lọ do ji. E nasọ de nuplọnmẹ he mí gán mọyi sọn owẹ̀n Ezekiẹli tọn mẹ lẹ tọ́n gọna nuhe gbẹtọ, nọtẹn po nujijọ he go e donù lẹ po sọgan plọn mí.