Be a yọ́n Ahọluduta he ji mí jlo na dọhodo lọ ya?— Mọwẹ, Ahọluduta Jiwheyẹwhe tọn wẹ. Ahọluduta enẹ wẹ na diọ aigba lọ zun paladisi de. Be a jlo na yọ́n nususu gando Ahọluduta enẹ go ya?—

Ahọluduta dopodopo wẹ nọ tindo ahọlu de. Podọ ahọlu lọ wẹ nọ dugán do mẹhe to otò lọ mẹ lẹ ji. Be a yọ́n mẹhe yin Ahọlu Ahọluduta Jiwheyẹwhe tọn lọ tọn ya?— Jesu Klisti wẹ. Olọn mẹ wẹ ewọ nọ nọ̀. To madẹnmẹ, e na yin Ahọlu do mẹlẹpo ji to aigba ji! Be a lẹndọ mí na tindo ayajẹ to whenue Jesu na yin Ahọlu do aigba lọ blebu ji ya?—

Mí na tindo ayajẹ taun! To Paladisi mẹ, gbẹtọvi lẹ ma nasọ nọ hoavùn kavi funawhàn ba. Mẹlẹpo wẹ na yiwanna ode awetọ. Mẹdepope ma na jẹazọ̀n kavi kú. Nukuntọ́nnọ lẹ na mọnú, tókunọ lẹ na sènu, podọ mẹhe ma sọgan zinzọnlin to egbehe lẹ na penugo nado họ̀nwezun bo lọ́n. Núdùdù susu na tin na mẹlẹpo. Gbọnvona enẹ, kanlin lẹ na nọ daihun dopọ podọ mílọsu na nọ daihun hẹ yé. Mẹhe ko kú lẹ na lẹkọwa ogbẹ̀. Sunnu po yọnnu po susu he ji a ko plọnnu do to alọnuwe ehe mẹ lẹ, taidi Lebeka, Lahabi, Davidi, gọna Elija na lẹkọwa ogbẹ̀ ga! Be a  na jlo nado mọ yé to whenue yé na lẹkọwa ogbẹ̀ ya?—

Jehovah yiwanna we bo jlo dọ hiẹ ni tindo ayajẹ. Eyin a zindonukọn nado to nuplọn gando Jehovah go bosọ nọ setonuna ẹn, a na nọgbẹ̀ kakadoi to paladisi whanpẹnọ de mẹ! Be enẹ jlo we ya?—