Dile ojlẹ to yìyì, gbẹtọ lẹ wá sù to aigba ji. Suhugan yetọn wẹ nọ wà nuylankan lẹ. Angẹli he to olọn mẹ delẹ lọsu tlẹ lẹzun mẹylankan. Yé tọ́n sọn fihe yé nọ nọ̀ to olọn mẹ bo jẹte wá aigba ji. Be a yọ́n nuhewutu yé do wàmọ ya? Na yé nido ze agbasa gbẹtọ tọn do bo dà asi wutu wẹ.

Angẹli lọ lẹ nọpọ́ hẹ yọnnu lẹ bo ji ovi lẹ. Whenue ovi lọ lẹ wá whẹ́n, yé dohuhlọn taun bo lẹzun nukunvandomẹtọ lẹ. Yé nọ gbleawuna mẹlẹ. Jehovah ma na dike bọ nulẹ na to yìyì domọ. Enẹwutu, e basi dide nado yí singigọ de do và mẹylankan lẹ sudo.

Ṣigba, dawe de tin bo gbọnvo. E yiwanna Jehovah. Oyín etọn wẹ Noa. E tindo asi po visunnu atọ̀n po, yèdọ Ṣẹmi, Ham po Jafẹti po, podọ visunnu lọ lẹ dopodopo wẹ tindo asi. Jehovah dọna Noa nado gbá aki daho de, na ewọ po whẹndo etọn po nido sọgan lùn Singigọ lọ tọ́n. Aki yin apotin daho de he sọgan fò to osin nukunmẹ. Jehovah sọ dọna Noa dọ ni bẹ kanlin susu biọ aki lọ mẹ, na yelọsu nido gán.

To afọdopolọji, Noa jẹ aki lọ gbá ji. Nudi owhe 50 wẹ Noa po whẹndo etọn po yí do gbá aki lọ. Lehe Jehovah dọ yé ni gbá aki lọ do pẹpẹ wẹ yé basi i do. To ojlẹ enẹ gblamẹ, Noa na avase gbẹtọ lẹ gando Singigọ lọ go. Amọ́, mẹdepope ma dotoaina ẹn.

To godo mẹ, ojlẹ sọ̀ nado biọ aki lọ mẹ. Gbọ mí ni pọ́n nuhe jọ bọdego.