Johanu ko to yẹwhehodọ dọmọ: ‘Mẹhe klohugan mi de ja to godo ṣie.’ Whenue Jesu tindo nudi owhe 30, e tọ́n sọn Galili bo yì Tọ̀sisa Jọdani tó, fihe Johanu to mẹlẹ baptizi te. Jesu jlo dọ Johanu ni baptizi emi, amọ́ Johanu dọmọ: ‘Yẹn ma dona baptizi we. Hiẹ wẹ dona baptizi yẹn.’ Jesu dọna Johanu dọmọ: ‘Jehovah wẹ jlo dọ hiẹ ni baptizi mi.’ Enẹwutu, yé biọ Tọ̀sisa Jọdani mẹ bọ Johanu ylọn Jesu do otọ̀ lọ mẹ mlẹnmlẹn.

To whenue Jesu tọ́n wá aga sọn otọ̀ lọ glọ, e hodẹ̀. To whenẹnu, olọn lẹ hùndonuvo bọ gbigbọ Jiwheyẹwhe tọn jẹ do e ji taidi apoe de. Enẹgodo, Jehovah dọho sọn olọn mẹ dọmọ: “Hiẹ wẹ Visunnu ṣie, mẹyiwanna lọ; yẹn ko kẹalọyi we.”

To whenue gbigbọ Jehovah tọn jẹ do Jesu ji, e lẹzun Klisti kavi Mẹsia lọ. Todin, e na bẹ azọ́n he Jehovah do e hlan aigba ji nado wà lọ jẹeji.

Tlolo to baptẹm etọn godo, Jesu yì danfafa ji bo nọ finẹ na azán 40. Whenue e lẹkọ, e yì Johanu dè. Dile Jesu to sisẹpọ, Johanu dọmọ: ‘Lẹngbọvu Jiwheyẹwhe tọn he na ze ylando aihọn tọn yì die.’ Gbọnmọ dali, Johanu to didohia mẹlẹ dọ Jesu wẹ Mẹsia lọ. Be a yọ́n nuhe jọ do Jesu go to whenue e to danfafa ji ya? Gbọ mí ni pọ́n.