Jehovah de Jelemia taidi yẹwhegán de na omẹ Juda tọn lẹ. E dọna ẹn dọ ni dọyẹwheho na yé bo na yé avase dọ yé dona doalọtena nuylankan wiwà. Jelemia gblọn dọmọ: ‘Jehovah, yọpọ sunnu de poun wẹ n’ka yin maa. N’ma yọ́n lehe n’na dọhona mẹlọ lẹ gbọn.’ Jehovah dọna ẹn dọmọ: ‘A dibu blo. N’na dọ nuhe a na dọ lẹ na we. N’na gọalọna we.’

Jehovah dọna Jelemia dọ ni ylọ mẹho akọta lọ tọn lẹ pli bo gbà okòzẹ́n de to nukun yetọn mẹ bosọ dọmọ: ‘Mọ wẹ Jelusalẹm na yin gbigbà hányán do.’ Whenue Jelemia wà nuhe Jehovah biọ to e si lọ, mẹho lọ lẹ gblehomẹ taun. Yẹwhenọ de he nọ yin Paṣuli hò Jelemia bo ze e do osópò mẹ. To ozán lọ blebu mẹ, Jelemia ma gán whàngo. Paṣuli wá de e tọ́n to wunkẹngbe. Jelemia dọmọ: ‘N’ma gán sọ doakọnna ba. N’na gbọ bo doalọtena yẹwhehodidọ.’ Ṣigba, be e jogbe nugbo ya? Lala. Whenue e yiagbọji bo lẹnnupọn dogọ, e wá dọmọ: ‘Owẹ̀n Jehovah tọn taidi miyọ́n de to ohò ṣie mẹ. N’ma gán doalọtena yẹwhehodidọ.’ Jelemia zindonukọn nado to avase na gbẹtọ lọ lẹ.

Owhe susu wayi bọ ahọlu yọyọ de wá dugán to Juda. Yẹwhenọ lẹ po yẹwhegán lalo lẹ po gbẹwanna owẹ̀n he lá Jelemia te. Yé dọna ahọvi lẹ dọmọ: ‘Dawe ehe jẹna okú.’ Jelemia sọ dọmọ: ‘Eyin mì hù mi, be homẹvọnọ de wẹ mì hù. Ohó Jehovah tọn dọ wẹ n’te, e ma yin ṣie titi.’ Whenue ahọvi lọ lẹ sè enẹ, yé dọmọ: ‘Dawe ehe ma jẹna okú.’

Jelemia zindonukọn to yẹwhehodidọ etọn mẹ bọ ehe doadi na ahọvi lọ lẹ taun. Yé sọ biọ to  ahọlu si nado hù Jelemia. Ahọlu dọna yé dọ yé gán yí Jelemia do wà nuhe jlo yé. Enẹwutu, yé plan Jelemia bo ze e dlan dotọ̀ he siso bo gọ́ na ogbọ̀n de mẹ, po linlẹn lọ po dọ e na kú do finẹ. Jelemia sọ jẹ titlọ biọ ogbọ̀n lọ mẹ ji.

Whenẹnu, ahọluzọnwatọ họ̀nmẹ tọn de he nọ yin Ebẹdi-melẹki dọna ahọlu dọmọ: ‘Ahọvi lẹ ko ze Jelemia dlan dotọ̀ de mẹ! Eyin mí jo e do finẹ, e na kú.’ Ahọlu lọ sọ degbe dọ Ebẹdi-melẹki ni plan sunnu 30 bo yì de Jelemia tọ́n sọn dotọ̀ lọ mẹ. Be e ma jẹ dọ mí ni yinuwa di Jelemia, mẹhe ma dike nude ni glọnalina ẹn nado dọyẹwheho ya?