Jesu ṣẹṣẹ dọna todoaitọ etọn lẹ to Pelea dọ “mẹsusu he yin tintan na lẹzun godotọ podọ godotọ na lẹzun tintan.” (Matiu 19:30) E zinnudo hodidọ enẹ ji gbọn apajlẹ pakanọ he to vẹngle mẹ lẹ tọn nina dali dọmọ:

“Ahọluduta olọn tọn tin taidi klunọ whédo tọn de, he tọ́nyi to afọnnu fuu nado dà pakanọ lẹ do vẹngle etọn mẹ. To whenuena e ko kọngbedopọ hẹ pakanọ lọ lẹ nado na yé denali dopo gbèdopo godo, e do yé hlan vẹngle etọn mẹ. Dile e sọ tọ́nyi to nudi gànhiho atọ̀ntọ mẹ, e mọ mẹdevo lẹ to ote to ahimẹ he ma mọ azọ́n de nado wà; e sọ dọna yé dọmọ, ‘Mìlọsu ga, mì yì vẹngle lọ mẹ, yẹn nasọ na mì nudepope he jẹ.’ Enẹwutu yé yì. E sọ tọ́nyi whladopo dogọ to nudi gànhiho ṣidopotọ mẹ podọ to gànhiho ṣinẹnẹtọ mẹ bo wà nudopolọ. To godo mẹ, to nudi gànhiho 11tọ mẹ, e tọ́nyi bo mọ mẹdevo lẹ to ote, bọ e dọna yé dọmọ, ‘Naegbọn mìwlẹ do to ote tofi na azán lọ blebu bo ma mọ azọ́n de nado wà?’ Yé gblọn dọ, ‘Na mẹdepope ma dà mí di pakanọ wutu wẹ.’ E dọna yé dọmọ, ‘Mìlọsu, mì yì vẹngle lọ mẹ.’”—Matiu 20:1-7.

Ayiha todoaitọ Jesu tọn lẹ tọn na ko yì Jehovah Jiwheyẹwhe ji to whenue e donù “Ahọluduta olọn tọn” po “klunọ whédo tọn de” po go. Owe-wiwe lẹ dlẹnalọdo Jehovah taidi mẹhe tindo vẹngle de, ehe nọtena akọta Islaeli tọn. (Psalm 80:8, 9; Isaia 5:3, 4) Mẹhe to alẹnu Osẹ́n tọn lọ glọ lẹ sọgan yin yiyijlẹdo pakanọ he to vẹngle lọ mẹ lẹ go. Ṣigba, Jesu ma to apajlẹ na gando nuhe ko wayi lẹ go. Kakatimọ, ninọmẹ he tin-to-aimẹ to ojlẹ etọn mẹ hodọ wẹ e te.

Sinsẹ̀ngán lẹ, he bẹ Falesi he ṣẹṣẹ tẹ́n ẹn pọ́n gando whẹho gbẹdai tọn go lẹ hẹn, sọgan yin pinpọnhlan taidi mẹhe to azọ́nwa whelẹponu to sinsẹ̀nzọn Jiwheyẹwhe tọn mẹ. Yé taidi azọ́nwatọ whenu-gigọ́ tọn lẹ he to nukundo azọ́nkuẹ yetọn pipé, yèdọ azọ́nkuẹ gbèdopo tọn he yin denali dopo.

To pọndohlan yẹwhenọ po omẹ mọnkọtọn devo lẹ po tọn mẹ, Juvi paa lẹ ma to Jiwheyẹwhe sẹ̀n sọmọ, podọ yé taidi pakanọ ojlẹ gli tọn lẹ to vẹngle Jiwheyẹwhe tọn mẹ. To apajlẹ Jesu tọn mẹ, omẹ ehelẹ wẹ yè yí do azọ́nmẹ “to nudi gànhiho atọ̀ntọ mẹ” (ogàn 9 afọnnu tọn) kavi to enẹgodo—yèdọ to gànhiho ṣidopotọ, ṣinẹnẹtọ po widopotọ (ogàn 5 whèjai tọn) po mẹ.

Sunnu po yọnnu po he nọ hodo Jesu lẹ nọ yin pinpọnhlan taidi “mẹhodẹ̀do lẹ.” (Johanu 7:49) Diblayin to gbẹzan yetọn blebu mẹ, whèhutọ kavi pakanọ lẹ wẹ yé. Ṣigba, to vivọnu owhe 29 W.M., “klunọ vẹngle lọ tọn” do Jesu hlan nado ylọ whiwhẹnọ ehelẹ nado wazọ́n na Jiwheyẹwhe taidi devi Klisti tọn lẹ. Yewlẹ wẹ “omẹ godotọ” he go Jesu donù lẹ, yèdọ pakanọ he wá vẹngle lọ mẹ to gànhiho 11tọ mẹ lẹ.

Nado dotana apajlẹ etọn, Jesu dọ nuhe jọ to vivọnu azọ́nzán lọ tọn dọmọ: “To whenuena owhè ko jai, klunọ vẹngle lọ tọn dọna nukunpedonugotọ etọn dọmọ, ‘Ylọ pakanọ lọ lẹ bo sú azọ́nkuẹ yetọn yé, bẹsọn omẹ godotọ lẹ ji yì omẹ tintan lẹ ji.’ To whenue mẹhe bẹ azọ́n to gànhiho 11tọ mẹ lẹ wá, dopodopo yetọn mọ denali dopo yí. Enẹwutu, to whenue omẹ tintan lẹ wá, yé lẹndọ yé na mọyi humọ, ṣigba denali dopodopo wẹ yin súsú yelọsu di azọ́nkuẹ. To whenuena yé mọ ẹn yí, yé jẹ lewu ji gando klunọ whédo tọn lọ go bo dọmọ, ‘Omẹ godotọ ehelẹ wazọ́n na gànhiho dopo poun; ṣogan hiẹ hẹn yé sọzẹn hẹ míwlẹ he ko wazọ́n sinsinyẹn na azán lọ pete to yozò sinsinyẹn nù!’ Ṣigba, e gblọnna dopo to yé mẹ, dọmọ, ‘Dawe, yẹn ma waylan de do we. Hiẹ kọngbedopọ hẹ mi nado yí denali dopo, kavi e ma yin mọ wẹ? Yí nuhe yin towe bo yì. E jlo mi nado na omẹ godotọ ehelẹ nudopolọ he yẹn na we. Be yẹn ma tindo jlọjẹ nado yí onú  ṣie titi do wà nuhe jlo mi ya? Kavi be nukun towe gọ́ na nukunkẹn na yẹn wà dagbe wutu wẹ ya?’ Mọdopolọ, omẹ godotọ lẹ na lẹzun tintan, bọ omẹ tintan lẹ na lẹzun godotọ.”—Matiu 20:8-16.

Devi lẹ sọgan to nulẹnpọn do adà godo tọn apajlẹ Jesu tọn lọ tọn ji. Nawẹ sinsẹ̀ngán Ju lẹ tọn he nọ lẹndọ emi yin omẹ “tintan” lẹ na wá lẹzun “godotọ” gbọn? Podọ nawẹ devi Jesu tọn lẹ na wá lẹzun omẹ “tintan” gbọn?

Devi Jesu tọn lẹ he Falesi lẹ po mẹdevo lẹ po nọ pọnhlan di “godotọ” na yin omẹ “tintan” he na mọ azọ́nkuẹ yetọn pipé yí. Po okú Jesu tọn po, Jelusalẹm aigba ji tọn na yin gbigbẹdai, bọ Jiwheyẹwhe na de akọta yọyọ de, yèdọ “Islaeli Jiwheyẹwhe tọn.” (Galatianu lẹ 6:16; Matiu 23:38) Mẹhe na wleawuna “Islaeli Jiwheyẹwhe tọn” lọ lẹ hodọ wẹ Johanu Baptizitọ lọ te to whenue e dọho gando baptẹm gbigbọ wiwe tọn he ja go. Mẹhe ko yin “godotọ” lẹ wẹ na yin omẹ tintan he na yí baptẹm mọnkọtọn bo na tindo lẹblanulọkẹyi lọ nado dekunnu gando Jesu go “kaka yì awà he dẹn hugan aigba tọn lẹ ji.” (Owalọ lẹ 1:5, 8; Matiu 3:11) Eyin devi lẹ mọnukunnujẹ diọdo ayidego tọn he hodọ Jesu te lọ mẹ, yé sọgan mọhlannukọn dọ sinsẹ̀ngán he lẹzun “godotọ” lẹ na diọnukunsọ yé sinsinyẹn.