E ko yì owhe dopo nkọ din he Johanu Baptizitọ to gànpamẹ. Ṣogan, e sè gando azọ́njiawu Jesu tọn lẹ go. Yí nukun homẹ do pọ́n nuhe na ko yin numọtolanmẹ Johanu tọn to whenue devi etọn lẹ dọna ẹn dọ Jesu fọ́n visunnu asuṣiọsi de tọn sọnku to Naini. Ṣigba, Johanu jlo na sè nuhe onú ehe lẹpo zẹẹmẹdo sọn Jesu dè tlọlọ. Enẹwutu, Johanu ylọ awe to devi etọn lẹ mẹ. Nado wà etẹ? Yé na yì kanse Jesu dọmọ: “Be hiẹ wẹ Mẹhe ja lọ ya, kavi be mí dona donukun mẹdevo wẹ?”—Luku 7:19.

Be kanbiọ ehe yin nupaṣamẹ de wẹ ya? Johanu yin dawe nugbonọ de he mọ bọ gbigbọ Jiwheyẹwhe tọn jẹte wá Jesu ji bosọ sè ogbè Jiwheyẹwhe tọn he dohia dọ emi kẹalọyi Jesu, to whenue e to baptẹm yí na Jesu to nudi owhe awe die. Mí ma tindo whẹwhinwhẹ́n depope nado lẹndọ yise Johanu tọn ko miọn. Eyin e ma yinmọ, Jesu ma na ko dọho Johanu tọn dagbe, taidi to ojlẹ ehe mẹ. Ṣigba, eyin Johanu ma tindo ayihaawe, naegbọn e do kàn kanbiọ enẹ sè Jesu?

Johanu sọgan ko jlo poun dọ Jesu ni dọ tlọlọ dọ emi wẹ Mẹsia lọ. Ehe na ko hẹn Johanu lodo dile e to awufiẹsa mọ to gànpamẹ. Podọ e sọ taidi dọ kanbiọ Johanu tọn bẹ linlẹn devo hẹn. E jẹakọ hẹ dọdai Biblu tọn lẹ he dohia dọ Mẹyiamisisadode Jiwheyẹwhe tọn na yin ahọlu de podọ mẹwhlẹngántọ de. Ṣogan, osun susu to baptẹm Jesu tọn godo, Johanu to gànpamẹ. Enẹwutu, Johanu to kinkanse eyin mẹdevo na gbẹ́ wá, yèdọ mẹde he na bọdo Jesu go to linlẹn de mẹ, he na dotana hẹndi nuhe dọdai lọ lẹ dọ dọ Mẹsia lọ na wà lẹpo tọn.

Kakati nado dọna devi Johanu tọn lẹ poun dọ, ‘Na nugbo tọn, yẹn wẹ Mẹhe ja lọ,’ Jesu hẹnazọ̀ngbọna mẹsusu he to azọ̀n wunmẹ lẹpo jẹ lẹ bo gbọnmọ dali na kunnudenu lẹ he dohia dọ Jiwheyẹwhe to godona emi. Enẹgodo, e dọna devi lọ lẹ dọmọ: “Mì yì bo dọ nuhe mì to sisè bosọ to mimọ lẹ na Johanu: Nukuntọ́nnọ lẹ to numọ podọ sẹkunọ lẹ to zọnlinzin, pòtọnọ lẹ to yinyin kiklọ́we bọ tókunọ lẹ to núsè, oṣiọ lẹ to yinyin finfọn, podọ wẹndagbe lọ to yinyin lilá hlan wamọnọ lẹ.”—Matiu 11:4, 5.

Kanbiọ Johanu tọn sọgan ko dohia dọ ewọ lẹndọ Jesu na wà nususu hugan nuhe wà e te to ojlẹ enẹ mẹ lẹ bo na tlẹ de Johanu sọn gànpamẹ. Ṣigba, Jesu to didọna Johanu ma nado donukun nususu hú azọ́njiawu he emi to wiwà lẹ.

To whenue devi Johanu tọn lẹ dedo, Jesu hẹn ẹn họnwun na gbẹtọgun lọ dọ Johanu ma yin yẹwhegán de poun. Ewọ wẹ “wẹnsagun” Jehovah tọn he Malaki 3:1 dọ dọdai etọn lọ. Ewọ sọ wẹ yẹwhegán Elija he Malaki 4:5, 6 dọ dọdai etọn. Jesu basi zẹẹmẹ dọmọ: “Nugbo wẹ yẹn dọna mì, to mẹhe yin jiji sọn yọnnu dè lẹ mẹ, depope ma ko sọawuhia he klohu Johanu Baptizitọ, ṣigba mẹhe whè hú to Ahọluduta olọn tọn mẹ klohu ewọ.”—Matiu 11:11.

To whenue Jesu dọ dọ mẹhe whè hú to Ahọluduta olọn tọn mẹ klohu Johanu, ewọ to didohia dọ Johanu ma na tin to Ahọluduta olọn tọn mẹ. Johanu wleawudaina aliho lọ na Jesu, amọ́ ewọ kú whẹpo Klisti do hùn aliho olọn mẹ tọn donuvo. (Heblu lẹ 10:19, 20) Etomọṣo, Johanu yin yẹwhegán nugbonọ Jiwheyẹwhe tọn bo na yin mẹjidugando aigba ji tọn Ahọluduta Jiwheyẹwhe tọn.