Dile Jesu po devi etọn ẹnẹ lẹ po to yẹwhehodọ “to sinagọgu . . . lẹ mẹ lẹdo Galili lẹpo pé,” linlin nujiawu he Jesu to wiwà lẹ tọn gbayipe. (Malku 1:39) Nuhe wà e te lẹ yin sisè to tòdaho de mẹ fie dawe he to pòzọ̀n jẹ de nọ nọ̀. Luku dotozọ́nwatọ lọ dohia dọ “pòzọ̀n sinsinyẹn jẹ” wẹ dawe lọ te. (Luku 5:12) Eyin azọ̀n badabada ehe jẹ sinsinyẹn ji, e nọ jẹ agbasa hẹngble ji vudevude.

Ehe dohia dọ ninọmẹ pòtọnọ ehe tọn ylan taun, podọ e biọ dọ ni nọla na mẹdevo lẹ. Humọ, eyin ewọ to fide he sẹpọ gbẹtọ lẹ, e dona nọ dawhá dọ “Mawé, mawé!” nado basi hihọ́na yé, na yé nikaa sẹpọ ẹ gbau bo yin bibẹpla. (Levitiku 13:45, 46) Ṣigba todin, etẹwẹ pòtọnọ ehe wà? E dọnsẹpọ Jesu bo ṣinyọ́n nukunmẹ ai bosọ to vivẹ̀ ẹ dọmọ: “Oklunọ, eyin hiẹ jlo domọ, hiẹ sọgan hẹn mi zun wiwe.”—Matiu 8:2.

Yise nankọ die dawe lọ tindo to Jesu mẹ! Podọ lehe azọ̀n ehe na ko zọ́n bọ onú etọn na wàlẹblanu do sọ! Nawẹ Jesu na yinuwa gbọn? Etẹwẹ hiẹ na ko wà eyin a to finẹ? Jesu vẹawu i bo dlẹnalọ etọn bosọ doalọ dawe lọ go. Jesu dọna ẹn dọmọ: “Yẹn jlo! Yin hinhẹn zun wiwe.” (Matiu 8:3) E sọgan vẹawuna mẹdelẹ nado yise, ṣigba pòzọ̀n lọ busẹ sọn dawe awutunọ lọ go to afọdopolọji.

Be e na jlo we nado tindo ahọlu de he nọ vẹawumẹ bosọ pegan di Jesu ya? Aliho he mẹ Jesu yinuwa hẹ pòtọnọ ehe te hẹn mí deji dọ whenue e na yin Ahọlu do aigba pete ji, dọdai Biblu tọn ehe na mọ hẹndi dọmọ: “Ewọ na nọ wàlẹblanuna agbátọnọ po wamọnọ po, bo nasọ nọ whlẹn ogbẹ̀ wamọnọ lẹ tọn gán.” (Psalm 72:13) Mọwẹ, Jesu na hẹn ojlo ahun etọn mẹ tọn di, enẹ wẹ nado gọalọna agbátọnọ lẹpo.

Flindọ, etlẹ yin jẹnukọnna azọ̀nhẹngbọ ehe, gbẹtọ lẹ ko to jejeji, na lizọnyizọn Jesu tọn wutu. Todin, gbẹtọ lẹ na sè gando nujiawu he e wà ehe go. Ṣigba, Jesu ma jlo dọ gbẹtọ lẹ ni yí emi sè to dodonu linlin he yé sè lẹ tọn poun ji gba. E yọ́n dọdai lọ he dọ dọ “e ma na dike ogbè etọn ni yin sisè to tòhomẹ-liho ji,” kavi to aliho vonọtaun de mẹ gba. (Isaia 42:1, 2) Enẹwutu, Jesu degbena pòtọnọ he yin azọ̀nhẹngbọna lọ dọmọ: “A dike bo dọna mẹde blo, ṣigba yì, bo do dewe hia yẹwhenọ, bosọ na nunina he Mose ko degbe etọn.”—Matiu 8:4.

Etomọṣo, dile a sọgan ko lẹn do, homẹ dawe lọ tọn hùn dọ e ko yin azọ̀nhẹngbọna sọmọ bọ e ma sọgan dava ede. E dedo bo lá owẹ̀n lọ pé gbọn filẹpo. Ehe fọ́n ojlo po tlintlindo dindin gbẹtọ lẹ tọn po dote dogọ. E wá jẹ obá lọ mẹ bọ Jesu masọ sọgan biọ tòdaho de mẹ to gbangba, enẹwutu e gbọṣi fihe to olá bọ mẹde ma te de na ojlẹ de. Ṣogan, gbẹtọ lẹ nọ wá sọn ofi voovo, na e nido plọnnu yé bo hẹnazọ̀ngbọna yé.