Owanyi sisosiso he Jesu tindo na apọsteli etọn lẹ whàn ẹn nado wleawuna yé na yìyì etọn he to sisẹpọ. Todin, e ze nukun etọn lẹ daga hlan olọn bo hodẹ̀ hlan Otọ́ etọn dọmọ: “Pagigona visunnu towe, na visunnu towe nido sọgan pagigona we, bọ kẹdẹdile hiẹ ko na ẹn aṣẹ do agbasalan lẹpo ji do, ewọ nido sọgan na ogbẹ̀ madopodo mẹhe hiẹ ko na ẹn lẹpo.”—Johanu 17:1, 2.

E họnwun dọ, Jesu yọnẹn dọ onú titengbe hugan lọ wẹ nado na gigo Jiwheyẹwhe. Ṣigba, lehe todido he go Jesu donù lọ—enẹ wẹ ogbẹ̀ madopodo yin homẹmiọnnamẹnu do sọ! Na “aṣẹ [ko yin nina ẹn] do agbasalan lẹpo ji” wutu, Jesu sọgan yí avọ́sinsan ofligọ etọn tọn do hẹn ale wá na gbẹtọvi lẹpo. Etomọṣo, omẹ kleun de poun wẹ na mọ dona enẹ yí. Naegbọn e do yinmọ? Na mẹhe na yinuwa to kọndopọ mẹ hẹ nuhe Jesu dọ bọdego ehelẹ kẹdẹ wẹ ewọ na hẹn ale ofligọ etọn tọn wá na wutu. E dọmọ: “Ehe wẹ ogbẹ̀ madopodo, dọ yé ni wá yọ́n hiẹ Jiwheyẹwhe nugbo dopo kẹdẹ lọ, podọ mẹhe hiẹ dohlan, yèdọ Jesu Klisti.”—Johanu 17:3.

Gbẹtọ lẹ dona wá yọ́n Otọ́ lọ po Visunnu lọ po ganji, bo tindo haṣinṣan pẹkipẹki de hẹ yé. Yé dona wleawuna pọndohlan yetọn nkọ do whẹho lẹ ji. Humọ, yé dona dovivẹnu nado nọ do jẹhẹnu mayọnjlẹ yetọn nkọ lẹ hia to whenue yé to nuyiwa hẹ mẹdevo lẹ. Podọ yé dona mọnukunnujẹemẹ dọ gigopipana Jiwheyẹwhe yin nujọnu hú ogbẹ̀ madopodo mimọyi. Todin, Jesu gọwá hosọ enẹ ji bo dọmọ:

“Yẹn ko pagigona we to aigba ji, na yẹn ko dotana azọ́n he hiẹ na mi nado wà. Enẹwutu, todin, Otọ́ E, yí gigo he yẹn ko tindo to apá towe whẹpo aihọn do wá tintin mẹ lọ do pagigona mi to apá towe.” (Johanu 17:4, 5) Mọwẹ, Jesu biọ nado gọ̀ gigo he e tindo to olọn mẹ mọyi gbọn fọnsọnku gblamẹ.

Ṣigba, Jesu ma wọn nuhe e ko wadotana to lizọnyizọn etọn mẹ lẹ. E hodẹ̀ dọmọ: “Yẹn ko do oyín towe hia mẹhe hiẹ na mi sọn aihọn mẹ lẹ. Towe wẹ yé, bọ hiẹ yí yé na mi, yé ko sọ payi ohó towe go.” (Johanu 17:6) Jesu wà nususu hugan oyín Jiwheyẹwhe tọn, yèdọ Jehovah yiylọ poun to lizọnyizọn etọn mẹ. E gọalọna apọsteli etọn lẹ nado yọ́n nuhe oyín lọ nọtena—enẹ wẹ jẹhẹnu Jiwheyẹwhe tọn lẹ po aliho he mẹ e nọ yinuwa hẹ gbẹtọvi lẹ te po.

Apọsteli lẹ ko wá yọ́n Jehovah, azọngban Visunnu etọn tọn po nuhe Jesu ko plọnmẹ lẹ po. Jesu gbọn whiwhẹ dali dọmọ: “Yẹn ko na yé ohó he hiẹ na mi lẹ, yé sọ kẹalọyi yé bo ko wá yọnẹn na taun tọn dọ yẹn wá taidi afọzedaitọ towe, podọ yé ko yise dọ hiẹ wẹ do mi hlan.”—Johanu 17:8.

Enẹgodo, Jesu do vogbingbọn he tin to hodotọ etọn lẹ po mẹhe to aihọn lọ mẹ to paa mẹ lẹ po ṣẹnṣẹn hia dọmọ: “Yẹn basi obiọ, e ma yin gando aihọn lọ go gba, ṣigba gando mẹhe hiẹ na mi lẹ go; na towe wẹ yé yin wutu . . . Otọ́ Wiwe, họ́ yé na oyín towe he hiẹ ko na mi lọ wutu, na yé nido sọgan yin dopo kẹdẹdile míwlẹ te do. . . . Yẹn ko sọ whlá yé bọ dopo tata to yé mẹ ma yin vivasudo adavo visunnu vasudo tọn lọ,” enẹ wẹ Juda Iskaliọti, yèdọ mẹhe ko dedo nado yì de Jesu hia.—Johanu 17:9-12.

Jesu zindonukọn to odẹ̀ etọn mẹ dọmọ: “Aihọn lọ ko gbẹwanna yé. . . . Yẹn biọ we, e ma yin nado de yé sẹ̀ sọn aihọn lọ mẹ gba, ṣigba nado họ́ yé na mẹylankan lọ tọn wutu. Yé ma yin apadewhe aihọn tọn, kẹdẹdile yẹn ma yin apadewhe aihọn tọn do.” (Johanu 17:14-16) Apọsteli lọ lẹ po devi devo lẹ po tin to aihọn lọ mẹ, enẹ wẹ pipli gbẹtọvi lẹ tọn he Satani to anadena lọ, ṣigba yé dona nọla na ẹn podọ na ylanwiwa etọn. Gbọnna?

Yé dona gbọṣi wiweji, bo yin kinklandovo nado sẹ̀n Jiwheyẹwhe, gbọn nugbo he yé mọ to Owe-wiwe Heblu tọn mẹ lẹ po dehe Jesu lọsu ko plọn  yé lẹ po yíyí do yizan mẹ dali. Jesu hodẹ̀ dọmọ: “Hẹn yé zun wiwe gbọn nugbo lọ gblamẹ; ohó towe wẹ nugbo.” (Johanu 17:17) To nukọn mẹ, delẹ to apọsteli lọ lẹ mẹ na kàn owe gbọdo lẹ he na yin apadewhe “nugbo lọ” tọn he sọgan gọalọ nado hẹn gbẹtọ lẹ zun wiwe.

Ṣigba to nukọn mẹ, mẹdevo lẹ nasọ wá kẹalọyi “nugbo lọ.” Enẹwutu, Jesu hodẹ̀ “e ma yin gando [mẹhe tin to finẹ lẹ] kẹdẹ go, ṣigba gando mẹhe to yise tindo to [ewọ] mẹ gbọn ohó yetọn gblamẹ lẹ go ga.” Etẹwẹ Jesu biọ na yemẹpo? “Na yemẹpo nido sọgan yin dopo, kẹdẹdile hiẹ, Otọ́, tin to kọndopọ mẹ hẹ mi bọ yẹn tin to kọndopọ mẹ hẹ we do, na yelọsu nido sọgan tin to kọndopọ mẹ hẹ mí.” (Johanu 17:20, 21) To paa mẹ, Jesu po Otọ́ etọn po ma yin omẹ dopo. Yé yin dopo to linlẹn lọ mẹ dọ yé nọ kọngbedopọ do onú lẹpo ji. Jesu hodẹ̀ dọ hodotọ etọn lẹ ni duvivi dopo-yinyin enẹ nkọ tọn.

Ojlẹ vude jẹnukọnna ehe, Jesu ko dọna Pita po mẹhe pò lẹ po dọ emi jei nado wleawu otẹn de tọn na yé, enẹ wẹ otẹn de to olọn mẹ. (Johanu 14:2, 3) Todin, Jesu gọwá linlẹn enẹ ji to odẹ̀ mẹ dọmọ: “Otọ́ E, yẹn jlo dọ fihe yẹn te wẹ mẹhe hiẹ na mi lẹ lọsu ni tin te hẹ mi, na yé nido sọgan mọ gigo ṣie he hiẹ ko na mi, na hiẹ ko yiwanna mi jẹnukọnna didá aihọn tọn wutu.” (Johanu 17:24) E gbọnmọ dali dohia dọ ojlẹ susu jẹnukọn—whẹpo Adam po Evi po do jivi—wẹ Jiwheyẹwhe ko yiwanna Visunnu detọ́n dopo akàn etọn he wá lẹzun Jesu Klisti.

Nado dotana odẹ̀ etọn, Jesu vọ́ nùzindo oyín Otọ́ etọn tọn gọna owanyi he Jiwheyẹwhe tindo na apọsteli lọ lẹ po mẹdevo he na wá kẹalọyi “nugbo lọ” lẹ po ji dọmọ: “Yẹn ko sọ hẹn oyín towe zun yinyọnẹn na yé bo nasọ hẹn ẹn zun yinyọnẹn, na owanyi he hiẹ tindo na mi nido sọgan tin to yé mẹ bọ yẹn na tin to kọndopọ mẹ hẹ yé.”—Johanu 17:26.