Yé Nọte to Jelusalẹm
OTÀN 105
Yé Nọte to Jelusalẹm
HODOTỌ Jesu tọn lẹ wẹ mẹhe tin tofi lẹ. Yé setonuna gbedide etọn bo yì nọte to Jelusalẹm. Whenuena yemẹpo pli dopọ, nudidọ daho de gọ́ ohọ̀ lọ blebu mẹ. E dọnú di jẹhọn sinsinyẹn de. Podọ zòdẹ́ he taidi miyọ́n sọawuhia to ota na dopodopo devi lẹ tọn. Be a mọ miyọ́n lọ to dopodopo yetọn ji ya? Etẹwẹ ehe lẹpo zẹẹmẹdo?
Azọ́njiawu de wẹ! Jesu ko lẹkọyi Otọ́ etọn dè to olọn mẹ, podọ ewọ wẹ kọ̀n gbigbọ wiwe Jiwheyẹwhe tọn do hodotọ etọn lẹ ji. Be hiẹ yọ́n nuhe gbigbọ lọ hẹn yé nado wà ya? Yemẹpo jẹ hodọ ji to ogbè voovo lẹ mẹ.
Mẹsusu wẹ sè nudidọ daho he dọnú di jẹhọn sinsinyẹn lọ to Jelusalẹm, bosọ tọ́n nado wá pọ́n nuhe to jijọ. Delẹ to omẹ lọ lẹ mẹ wá sọn akọta devo lẹ mẹ bosọ tin to hùnwhẹ Pẹntikọsti Islaelivi lẹ tọn lọ tẹnmẹ. Lehe e na ko yin nupaṣamẹ na jonọ enẹlẹ do sọ! Jonọ lọ lẹ sè devi lẹ to hodọ do ogbè yetọn lẹ mẹ gando nujiawu he Jiwheyẹwhe wà lẹ go.
Jonọ lọ lẹ sọ dọmọ: ‘Galili wẹ omẹ ehe lẹpo wá sọn. Naegbọn yé do to hodọ to ogbè voovo he yin otò mítọn tọn lẹ mẹ?’
Pita fọnṣite todin nado basi zẹẹmẹ na yé. E ze ogbè etọn daga bosọ dọna gbẹtọ lẹ lehe yè hù Jesu do podọ lehe Jehovah sọ fọ́n ẹn sọn oṣiọ lẹ mẹ do. ‘Todin Jesu ko tin to olọn mẹ to adusilọ Jiwheyẹwhe tọn mẹ,’ wẹ Pita dọ. ‘Podọ e ko sọ kọ̀n gbigbọ wiwe he e dopagbe etọn lọ jẹgbonu. Enẹ wẹ zọ́n bọ mì do sè bosọ mọ azọ́njiawu ehelẹ.’
To whenuena Pita dọ ohó ehelẹ godo, nuhe yé ko wà na Jesu lẹ vẹna mẹsusu taun. Yé kanse dọmọ: ‘Etẹwẹ mí na wà?’ Pita sọ dọna yé dọmọ: ‘Mì dona diọ aliho gbẹninọ tọn mìtọn bosọ yin bibaptizi.’ Enẹwutu, gbẹtọ diblayi 3 000 wẹ yí baptẹm bosọ lẹzun hodotọ Jesu tọn lẹ to azán enẹ gbè.
A Gán Sọ Pọ́n Hosọ Ehelẹ
JESU—ALIHO LỌ, NUGBO LỌ PO OGBẸ̀ PO
Omẹ Kanweko Susu Mọ Ẹn Jẹnukọnna Pẹntikọsti
To fọnsọnku Jesu tọn godo, whẹpo e nido yì olọn mẹ, whlasusu wẹ e zinnudo nuhe devi etọn lẹ na mọyi po lehe yé na zan ẹn do po ji na yé.
