ADÀ 7

Fọnsọnku Jesu Tọn jẹ Gànpamẹninọ Paulu Tọn

To azán atọ̀ntọ to okú etọn godo, Jesu yin finfọnsọnku. To azán enẹ gbè e sọawuhia hodotọ etọn lẹ whla voovo atọ́n. Jesu zindonukọn nado to awusọhia yé na azán 40. Enẹgodo, dile devi etọn lẹ to pinpọn ẹn, Jesu hẹji yì olọn mẹ. To azán ao godo, Jiwheyẹwhe kọ̀n gbigbọ wiwe etọn do hodotọ Jesu tọn he plido Jelusalẹm lẹ ji.

To nukọn mẹ, kẹntọ Jiwheyẹwhe tọn lẹ wle apọsteli lẹ do gànpamẹ, ṣigba angẹli de tún yé dote. Nukundiọsọmẹtọ lẹ dlan zannu do devi Stefani bo hù i. Ṣigba mí nasọ plọn lehe Jesu de dopo to nukundiọsọmẹtọ ehelẹ mẹ taidi dopo to devizọnwatọ titengbe etọn lẹ mẹ podọ ewọ wẹ wá lẹzun apọsteli Paulu. Enẹgodo, owhe atọ̀n-daa to okú Jesu tọn godo, Jiwheyẹwhe do apọsteli Pita hlan nado yì dọyẹwheho na Kọneliọsi he ma yin Juvi de po whẹndo etọn po.

To nudi owhe 13 godo, Paulu bẹ gbejizọnlin yẹwhehodidọ tọn etọn tintan jẹeji. To gbejizọnlin etọn awetọ whenu Timoti kọnawudopọ hẹ ẹ. Mí na plọn lehe Paulu po gbẹdohẹmẹtọ etọn lẹ po tindo ojlẹ awuvivi tọn susu to sinsẹ̀nzọn Jiwheyẹwhe tọn mẹ to gbejizọnlin yetọn lẹ whenu do. To godo mẹ, Paulu yin zizedo gànpamẹ to Lomu. To owhe awe godo, e yin tuntundote, ṣigba e sọ wá yin zizedo gànpamẹ devo bosọ yin hùhù. Nujijọ ADÀ 7tọ tọn lẹ jọ to ojlẹ owhe 32 tọn gblamẹ.