Odẹ̀

4 Etẹlẹ Ji Wẹ Mí Dona Nọ Hodẹ̀ Do?

TO ODẸ̀ he Klistiani lẹ nọ hò lẹpo mẹ, dopo tin he yé jẹakọ hẹ hugan bo nọ to vivọdọ mapote. Vlavo enẹ yin nugbo kavi lala, odẹ̀ apajlẹ tọn Jesu tọn lọ—he nọ yin yiylọ to whedelẹnu dọ Odẹ̀ Oklunọ tọn kavi Otọ́ Mítọn—yin odẹ̀ de he mẹ mẹsusu ma nọ mọnukunnujẹ. Gbẹtọ livi susu wẹ ko plọn odẹ̀ enẹ do tamẹ bo nọ hò e egbesọegbesọ, etlẹ yin whlasusu to azán dopodopo ji. Amọ́, Jesu ma jlo dọ odẹ̀ ehe ni nọ yin hihò to aliho enẹ mẹ gbede. Nawẹ mí wagbọn do yọnẹn?

Tlolo whẹpo Jesu do plọnmẹ odẹ̀ enẹ, e dọmọ: “Eyin mì to dẹ̀ho, mì dọ dọvọdọ nudopolọ lẹ tọn . . . blo.” (Matiu 6:7) Po ehe po, be Jesu na wanu jẹagọdo nuhe ewọ lọsu dọ, bo ze odẹ̀ he mí dona plọn do tamẹ bosọ dọ dọvọdọ etọn de dai wẹ ya? Lala! Kakatimọ, nuhe ji mí na nọ hodẹ̀ do lẹ plọn mí wẹ Jesu te, podọ e sọ to ayiha mítọn dọ̀n wá onú voovo he mí dona nọ zedo otẹn tintan mẹ to odẹ̀ mítọn lẹ mẹ ji. Mì gbọ mí ni yí sọwhiwhe do gbadopọnna nuhe e dọ lẹ. Odẹ̀ lọ yin kinkandai to Matiu 6:9-13 mẹ.

“Otọ́ mítọn he tin to olọn mẹ, na oyín towe ni yin kinklandowiwe.”

Jesu to nuflin hodotọ etọn lẹ dọ Otọ́ emitọn Jehovah wẹ yé dona nọ hò odẹ̀ lẹpo hlan. Amọ́, be a yọ́n nuhewutu oyín Jiwheyẹwhe tọn do yin nujọnu sọmọ gọna nuhewutu e dona yin kinklandowiwe kavi yin hinhẹn zun wiwe ya?

Sọn bẹjẹeji whenuho gbẹtọvi tọn gbọ́n wẹ yè ko kọnmasin do oyín wiwe Jiwheyẹwhe tọn go. Satani, yèdọ kẹntọ Jiwheyẹwhe tọn ylọ Jehovah dọ Gandutọ lalonọ podọ ṣejannabinọ de, he ma tindo jlọjẹ depope nado paṣẹ do nudida Etọn lẹ ji. (Jenẹsisi 3:1-6) Mẹsusu wẹ kọngbedopọ hẹ Satani bo nọ plọnmẹ dọ Jiwheyẹwhe ma jọmẹ, dọ e yin kanylantọ podọ hùnylantọ bosọ nọ jẹagọdo dọ e ma yin Ewọ wẹ dá nuhe tin lẹ. Mẹdevo lẹ tlẹ diọnukunsọ yinkọ jọnun etọn, bo de yinkọ lọ Jehovah sẹ̀ sọn lẹdogbedevomẹ Biblu tọn lẹ mẹ bosọ dosẹ́n na mẹlẹ ma nado nọ yí yinkọ enẹ zan.

Biblu dohia dọ Jiwheyẹwhe na de whẹdida mawadodo enẹ lẹpo sẹ̀. (Ezekiẹli 39:7) Gbọnmọ dali, ewọ na penukundo nuhudo towe lẹ go bosọ didẹ nuhahun towe lẹpo. Nawẹ e na wàmọ gbọn? Hogbe Jesu tọn he bọdego to odẹ̀ lọ mẹ lẹ na gblọndo lọ.

“Na Ahọluduta towe ni wá.”

To egbehe, nuhe sinsẹ̀ngán voovo lẹ nọ plọnmẹ gando Ahọluduta Jiwheyẹwhe tọn go lẹ nọ sọta yede. Ṣigba, dile hosetọ Jesu tọn lẹ yọnẹn do, yẹwhegán Jiwheyẹwhe tọn lẹ ko dọ sọn ojlẹ dindẹn jẹnukọn dọ Mẹsia lọ, yèdọ Mẹwhlẹngántọ de he Jiwheyẹwhe lọsu ko de, na dugán do Ahọluduta de ji he na diọ aihọn lọ. (Isaia 9:6, 7; Daniẹli 2:44) E na klan oyín Jiwheyẹwhe tọn do wiwe bo na de lalo Satani tọn lẹpo gbà, bo nasọ sukúndona Satani po azọ́n etọn lẹpo po. Ahọluduta Jiwheyẹwhe tọn na de awhàn, azọ̀n, huvẹ podọ etlẹ yin okú lọsu sẹ̀ sọn aimẹ mlẹnmlẹn. (Salmu lẹ 46:9; 72:12-16; Isaia 25:8; 33:24) Eyin a nọ hodẹ̀ dọ Ahọluduta Jiwheyẹwhe tọn ni wá, bibiọ wẹ a te dọ opagbe enẹ lẹpo ni mọ hẹndi.

“Na ojlo towe ni yin wiwà, kẹdẹdi to olọn mẹ, mọdopolọ to aigba ji.”

Hogbe Jesu tọn lẹ dohia dọ ojlo Jiwheyẹwhe tọn na yin wiwà dandan to aigba ji kẹdẹdile e te do to olọn mẹ, fie Jiwheyẹwhe lọsu nọ nọ̀. Nude ma gán doalọtena ojlo Jiwheyẹwhe tọn nado yin wiwà to olọn mẹ; Visunnu Jiwheyẹwhe tọn ko funawhàn sọta Satani po awhànvipẹ etọn lẹ po to dọ́n bo ko yàn yé wá aigba ji. (Osọhia 12:9-12) Kẹdẹdi ovẹ̀ awe he jẹnukọn to odẹ̀ apajlẹ tọn lọ mẹ lẹ, ovẹ̀ atọ̀ntọ ehe lọsu gọalọna mí nado ze ayiha do nujọnu hugan lọ, yèdọ ojlo Jiwheyẹwhe tọn ji, e ma yin do ojlo mítọn lẹ ji. Gbọn ojlo etọn dali wẹ nudida etọn lẹpo nọ mọ ale daho hugan lẹ yí to whepoponu. Abajọ dawe pipé lọ Jesu do dọna Otọ́ etọn dọmọ: “A dike e yin ojlo ṣie blo, ṣigba towe ni yin wiwà.”—Luku 22:42.

“Na núdùdù mítọn egbehe tọn mí to egbé.”

Tofi, Jesu to didohia dọ mí sọgan nọ hodẹ̀ gando ahunmẹdunamẹnu mítọn titi lẹ go ga. Nude ma ylan to e mẹ nado nọ hodẹ̀ hlan Jiwheyẹwhe gando nuhudo dandan tọn egbesọ tọn mítọn lẹ go. Na nugbo tọn, mọwiwà nọ flin mí dọ Jehovah wẹ “nọ na gbẹtọ lẹpo ogbẹ̀, gbọfufu po nulẹpo po.” (Owalọ lẹ 17:25) Biblu dohia dọ ewọ yin mẹjitọ owanyinọ de he nọ yí homẹhunhun do na ovi etọn lẹ nuhe sin hudo yé do lẹ. Ṣigba, dile mẹjitọ dagbe de nọ wà do, e ma na kẹalọyi obiọ he ma na wà dagbe na yé lẹ.

“Jo ahọ́ mítọn lẹ na mí.”

Be a dù ahọ́ de do Jiwheyẹwhe nugbo ya? Be a do hudo jonamẹ etọn tọn ya? To egbehe, mẹsusu ma mọnukunnujẹ nuhe ylando bẹhẹn mẹ gọna obá he mẹ e yin nuylankan jẹ. Ṣigba, Biblu plọnmẹ dọ ylando wẹ adọ̀ nuhahun sinsinyẹn mítọn lẹ tọn, na ylando wẹ yin whẹwhinwhẹ́n tangan he wutu gbẹtọvi lẹ do nọ kú. Ogú ylando tọn he mí dù wẹ zọ́n bọ mímẹpo nọ waylando whẹwhẹ, podọ jonamẹ Jiwheyẹwhe tọn wẹ yin todido dopo gee lọ nado tindo sọgodo nujọnu tọn de. (Lomunu lẹ 3:23; 5:12; 6:23) Homẹmiọnnamẹnu daho de wẹ e yin nado mọdọ Biblu dọ dọ: “Hiẹ yọ́n bo nọ wleawu nado jonamẹ, Jehovah E.”—Salmu lẹ 86:5.

“Whlẹn mí sọn mẹylankan lọ si.”

Be a ma mọdọ a do hudo hihọ́-basinamẹ Jiwheyẹwhe tọn todin hugan gbede pọ́n ya? Mẹsusu lẹ wẹ yise dọ Satani, yèdọ “mẹylankan lọ” ma tin paali. Ṣigba, Jesu plọnmẹ dọ Satani tin nugbonugbo, bo tlẹ ylọ ẹ dọ “ogán aihọn ehe tọn.” (Johanu 12:31; 16:11) Satani ko hẹn aihọn he e to anadena ehe flu, podọ ojlo vẹkuvẹku etọn wẹ nado doyẹklọ hiẹ lọsu, bo glọnalina we ma nado tindo haṣinṣan dagbe de hẹ Otọ́ towe Jehovah. (1 Pita 5:8) Amọ́, Jehovah dohuhlọn taun hugan Satani, podọ homẹ Etọn nọ hùn nado basi hihọ́na mẹhe yiwanna Ẹn lẹ.

Dogbapọn kleun he mí bayi do nuagokun odẹ̀ apajlẹ tọn Jesu tọn ehe ji ma bẹ nuhe go mí sọgan hodẹ̀ gando lẹpo hẹn. Flindọ 1 Johanu 5:14 dọ gando Jiwheyẹwhe go dọmọ: “Nudepope he mí biọ sọgbe hẹ ojlo etọn, ewọ nọ sè mítọn.” Enẹwutu, ma nọ hanú dọ nuhahun towe lẹ ma sọtẹ́n bọ a ma gán hẹn yé wá Jiwheyẹwhe nukọn blo.—1 Pita 5:7.

Todin, etẹwẹ gando ojlẹ he mẹ mí nọ hodẹ̀ te po fie mí nọ wàmọ te po go? Be onú ehelẹ yin nujọnu sọmọ ya?