Sinsẹ̀n Klistiani tọn “he zẹ̀ alà daho atọ̀n, enẹ wẹ Katoliki Rome tọn, Ṣọṣi Orthodoxe tọn po Plọtestant tọn po, kẹalọyi linlẹn lọ dọ Jiwheyẹwhe dopo wẹ tin bo to omẹ atọ̀n mẹ, enẹ wẹ: Jiwheyẹwhe Otọ́, Jiwheyẹwhe Ovi, podọ Jiwheyẹwhe Gbigbọ Wiwe. Sọgbe hẹ nuplọnmẹ sinsẹ̀n Klistiani tọn, alọkikẹyi linlẹn ehe ma zẹẹmẹdo dọ yè yigbe dọ Jiwheyẹwhe atọ̀n wẹ tin gba, amọ́ dọ yé omẹ atọ̀n lẹpo to pọmẹ yin omẹ dopo na taun tọn.”—Sọn wezẹhomẹ lọ The New Encyclopædia Britannica mẹ.

Jesu, he yin Visunnu Jiwheyẹwhe tọn, ma sọalọakọ́n gbede dọ emi sọzẹn hẹ Otọ́ emitọn kavi dọ emilẹ dopolọ wẹ yin Otọ́ lọ bosọ yin Visunnu lọ. Kakatimọ, e dọmọ: “N’jei Otọ́ dè, na Otọ́ klohugan mi wutu.” (Johanu 14:28) E sọ dọna dopo to hodotọ etọn lẹ mẹ dọmọ: “Yẹn hẹji jei Otọ́ ṣie po Otọ́ mìtọn po dè podọ jei Jiwheyẹwhe ṣie po Jiwheyẹwhe mìtọn po dè.”—Johanu 20:17.

Gbigbọ wiwe ma yin omẹ tangan de. Biblu dọ gando Klistiani dowhenu tọn lẹ go dọ yé “gọ́ na gbigbọ wiwe,” podọ Jehovah dọ dọ: “Yẹn na kọ̀n gbigbọ ṣie do agbasalan wunmẹ lẹpo ji.” (Owalọ lẹ 2:1-4, 17) Enẹwutu, gbigbọ wiwe ma yin apadewhe omẹ Atọ̀n-to-dopomẹ de tọn. Kakatimọ, huhlọn he Jiwheyẹwhe nọ yí do wazọ́n wẹ.

Nuplọnmẹtọ Katoliki tọn lẹ Karl Rahner po Herbert Vorgrimler po basi zẹẹmẹ gando Atọ̀n-to-dopomẹ go dọ, yè “ma gán mọnukunnujẹemẹ matin osọhia (kavi numimọ) de, podọ etlẹ yin to osọhia lọ godo, zẹẹmẹ etọn ma gán họnwun gblegede.” Be a sọgan yiwanna mẹde nugbonugbo eyin e ma yọnbasi nado yọ́n mẹlọ kavi mọnukunnujẹ mẹhe e yin mẹ ya? To aliho dopolọ mẹ, nuplọnmẹ Atọ̀n-to-dopomẹ tọn nọ glọnalinamẹ nado yọ́n Jiwheyẹwhe bosọ yiwanna ẹn.

Marco he yin nùdego to bẹjẹeji hosọ ehe tọn mọdọ Atọ̀n-to-dopomẹ yin aliglọnnamẹnu de. E dọmọ: “N’nọ lẹndọ Jiwheyẹwhe to mẹhe ewọ yin whlá do mi, podọ enẹ zọ́n bọ n’nọ mọdọ e dẹn do mi, bo dablu, bo masọ yọ́n dọnsẹpọ.” Ṣigba, “Jiwheyẹwhe ma yin Jiwheyẹwhe bẹwlu tọn de gba.” (1 Kọlintinu lẹ 14:33) Ewọ ma nọ whlá mẹhe e yin do mí. E jlo dọ mí ni yọ́n emi. Jesu dọmọ: “Míwlẹ to nuhe mí yọnẹn sẹ̀n.”—Johanu 4:22.

Marco dọmọ: “Whenue n’plọn dọ Jiwheyẹwhe ma yin apadewhe omẹ Atọ̀n-to-dopomẹ de tọn godo wẹ n’wá penugo nado tindo haṣinṣan nujọnu tọn de hẹ ẹ.” Eyin mí nọ mọ Jehovah di Omẹ jọnun de kakati ni yin mẹhe dablu bọ yè ma gán yọnẹn de, e nọ bọawu dogọ nado yiwanna ẹn. Biblu dọmọ: “Mẹdepope he ma tindo owanyi ma ko wá yọ́n Jiwheyẹwhe, na Jiwheyẹwhe wẹ owanyi.”—1 Johanu 4:8.