N’yin jiji to Baku to Azerbaijan. Yẹn wẹ yin ovi awetọ to ovi awe he mẹjitọ ṣie lẹ ji lẹ mẹ. Malenu wẹ otọ́ ṣie yin bọ onọ̀ ṣie yin Ju. Mẹjitọ ṣie lẹ yiwanna yede, podọ depope to yé mẹ ma jẹagọdo sinsẹ̀n omẹ awetọ tọn. Di apajlẹ, to nùbibla Malenu lẹ tọn whenu, Mama nọ nọgodona Papa, podọ eyin Mama jlo na dù Juwayi, Papa lọsu nọ nọgodona ẹn. To whégbè, mí tindo Koran, Torah po Biblu po.

N’nọ pọ́n dee hlan taidi Malenu de. Dile etlẹ yindọ n’yọnẹn dọ Jiwheyẹwhe tin, kanbiọ delẹ gbẹ́ nọ dotukla mi. N’nọ kanse dee dọ ‘Etẹwutu wẹ Jiwheyẹwhe dá gbẹtọvi lẹ, podọ etẹwutu wẹ mí na jiya to whenue mí to ogbẹ̀ bọ to okú godo, mí nasọ yì jiya kakadoi to zòmẹ?’ Eyin nuylankan de jọ, gbẹtọ lẹ nọ dọ dọ ojlo Jiwheyẹwhe tọn wẹ. Enẹwutu, n’nọ kanse dee dọ, ‘Be awuvivinu wẹ e nọ yin na Jiwheyẹwhe nado hẹn yajiji wá gbẹtọvi lẹ ji ya?’

To whenue n’tindo owhe 12, n’jẹ nuki ji whla atọ́n to gbèdopo sọgbe hẹ aṣa Malenu lẹ tọn. Ojlẹ enẹ mẹ wẹ Papa do yẹn po mẹdaho ṣie yọnnu po wehọmẹ Ju lẹ tọn de. To wehọ lọ mẹ, mí nọ plọn Heblugbe, nuplọnmẹ he to Torah mẹ lẹ, po nudevo lẹ po. To azán dopodopo gbè, whẹpo mí nado jẹ nuplọn ji to wehọ lọ mẹ, mí nọ hodẹ̀ dile Ju lẹ nọ wà do. To afọnnu lẹ, n’nọ kinu to whégbè, bọ to wehọmẹ mí nọ hodẹ̀ Ju lẹ tọn.

N’dovivẹnu vẹkuvẹku nado mọ gblọndo he sọgbe na kanbiọ he nọ duahunmẹna mi lẹ, ṣigba to ovọ́ mẹ. To wehọmẹ, whlasusu wẹ n’kanse mẹplọntọ mítọn lẹ dọ, “Etẹwutu wẹ Jiwheyẹwhe dá gbẹtọvi lẹ? Nukun tẹwẹ Jiwheyẹwhe nọ yí do pọ́n otọ́ ṣie he yin Malenu de? Dawe he jọmẹ de wẹ. Nawẹ Jiwheyẹwhe na pọ́n ẹn di gbẹtọ mawénọ gbọn? Etẹwutu wẹ Jiwheyẹwhe do dá ẹ lo?” Nugbo wẹ dọ n’mọ gblọndo delẹ, ṣigba ohó gbẹ́ pò do e go.

Adán he gbò mi to 2002 zọ́n bọ n’masọ tindo yise ba. Mí ṣẹṣẹ sẹtẹn wá Allemagne bọ to osẹ dopo poun godo, otọ́ ṣie bẹ asaku-awàku bo to kúdaa-gbẹ̀daa. N’ko hodẹ̀ gando dagbemẹninọ hagbẹ whẹndo ṣie tọn lẹ tọn go  na owhe susu. Na n’yọnẹn dọ Ganhunupotọ lọ kẹdẹ wẹ tindo aṣẹ do ogbẹ̀ po okú po ji wutu, n’nọ vẹvẹna ẹn egbesọegbesọ na otọ́ ṣie nido gán. N’nọ lẹn to dee mẹ dọ, ‘Nupẹvi wẹ e yin na Jiwheyẹwhe nado hẹn ojlo vivẹ́ yẹn ’vi pẹvi ehe tọn di.’ Enẹ zọ́n bọ n’kudeji dọ Ewọ ma na dike otọ́ ṣie ni kú. Ṣigba, otọ́ ṣie kú.

N’jẹflumẹ petepete, na n’lẹndọ Jiwheyẹwhe wẹ jo otọ́ ṣie do bọ e kú. N’lẹndọ, ‘Vlavo aliho he mẹ n’nọ hodẹ̀ te lọ wẹ ma sọgbe kavi e gán yindọ Jiwheyẹwhe ma tin.’ Ninọmẹ lọ dán mi sọmọ bọ n’masọ nọ kinu ba. Na n’nọ lẹndọ sinsẹ̀n he pò lẹ ma yin dagbe wutu, n’wá tadona lọ kọ̀n dọ Jiwheyẹwhe de ma tin.

To osun ṣidopo godo, Kunnudetọ Jehovah tọn lẹ wá húhúhọ̀n mítọn. Na mí ma nọ yí nukun nujọnu tọn do pọ́n sinsẹ̀n Klistiani tọn wutu, yẹn po nọviyọnnu ṣie po jlo na dohia yé po sisi po dọ nuhe plọnmẹ yé te lẹ ma sọgbe. Mí kanse yé dọ: “Naegbọn Klistiani lẹ do nọ sẹ̀n Jesu, satin, Malia, po boṣiọ devo lẹ po mahopọnna dọ Gbedide Ao lẹ gbẹ́ onú enẹlẹ?” Kunnudetọ lọ lẹ yí Owe-wiwe lẹ zan nado do kunnudenu he dolido lẹ hia mí dọ Klistiani nugbo lẹ ma dona nọ sẹ̀n boṣiọ lẹ, podọ Jiwheyẹwhe kẹdẹ wẹ yé dona nọ hodẹ̀ hlan. Enẹ paṣa mi taun.

Enẹgodo, mí kanbiọ yé dọ: “Bọ Atọ̀n-to-Dopomẹ lo? Eyin Jesu yin Jiwheyẹwhe, be e na yọnbasi dọ ewọ ni nọ aigba ji bo yin hùhù gbọn gbẹtọvi lẹ dali ya?” Whladopo dogọ, yé na gblọndo sọn Biblu mẹ bo basi zẹẹmẹ dọ Jesu ma yin Jiwheyẹwhe, podọ mọjanwẹ e ma sọzẹn hẹ Jiwheyẹwhe do niyẹn. Kunnudetọ lọ lẹ dohia dọ enẹ wẹ zọ́n bọ yewlẹ ma yí Atọ̀n-to-Dopomẹ sè. E paṣa mi sọmọ bọ n’lẹn to dee mẹ dọ, ‘Klistiani wunmẹ tẹwẹ yin omẹ ehelẹ?’

Etomọṣo, n’gbẹ́ jlo na yọ́n nuhewutu gbẹtọ do nọ kú podọ nuhewutu Jiwheyẹwhe do jotẹnna yajiji. Kunnudetọ lọ lẹ do owe Oyọnẹn He Nọ Planmẹ Sọyi Ogbẹ̀ Madopodo Mẹ * hia mi bọ n’mọ weta blebu delẹ he na gblọndo kanbiọ ṣie lẹ tọn. Yé jẹ Biblu plọn hẹ mi ji to afọdopolọji.

To oplọn dopodopo whenu, gblọndo he n’nọ mọ na kanbiọ ṣie lẹ nọ yin gblọndo he sinai do Biblu ji bo dutomẹji lẹ. N’wá yọnẹn dọ Jehovah wẹ oyín Jiwheyẹwhe tọn. (Psalm 83:18) Podọ, owanyi matin ṣejannabi wẹ yin jẹhẹnu titengbe etọn. (1 Johanu 4:8) E dá gbẹtọvi lẹ na e jlo na má nunina ogbẹ̀ tọn hẹ yé. N’wá mọnukunnujẹemẹ dọ dile etlẹ yindọ Jiwheyẹwhe jotẹnna mawadodo, e gbẹwanna mawadodo bo na de e sẹ̀ kakadoi to madẹnmẹ. N’sọ plọn dọ atẹṣiṣi Adam po Evi po tọn wẹ hẹn kọdetọn ylankan lẹ wá na gbẹtọvi lẹ. (Lomunu lẹ 5:12) Dopo to kọdetọn lọ lẹ mẹ wẹ yindọ mẹvivẹ mítọn lẹ nọ kú dile otọ́ ṣie kú do. Ṣigba to aihọn yọyọ lọ mẹ, Jiwheyẹwhe na doalọtena nujijọ awubla tọn lẹ bo na fọ́n mẹhe ko kú lẹ.—Owalọ lẹ 24:15.

Biblu na gblọndo kanbiọ he nọ duahunmẹna mi lẹ tọn. N’sọ wá yise to Jiwheyẹwhe mẹ whladopo dogọ. To whenue n’wá jẹakọ hẹ Kunnudetọ Jehovah tọn lẹ, e wá họnwun na mi dọ pipli mẹmẹsunnu lẹdo aihọn pé tọn de wẹ yé yin. Pọninọ po owanyi he to ṣẹnṣẹn yetọn po yinuwado ji e. (Johanu 13:34, 35) Nuhe n’plọn gando Jehovah go lẹ whàn mi nado sẹ̀n ẹn, podọ n’basi dide nado lẹzun dopo to Kunnudetọ Jehovah tọn lẹ mẹ. N’yin bibaptizi to 8 janvier 2005.

Nuplọnmẹ Biblu tọn lẹ duto ji e bo diọ pọndohlan ṣie gando ogbẹ̀ go. Zẹẹmẹ dejidego he n’mọ gbọn Ohó Jiwheyẹwhe tọn gblamẹ lẹ na mi jijọho ahun mẹ tọn. Todido lọ dọ n’sọgan vọ́ otọ́ ṣie mọ sọgbe hẹ opagbe fọnsọnku tọn he to Ohó Jiwheyẹwhe tọn mẹ nọ yin ayajẹnu po homẹmiọnnamẹnu daho de po na mi.—Johanu 5:28, 29.

E ko pé owhe ṣidopo todin he n’wlealọ hẹ asu ṣie Jonathan. E nọ dibusi Jiwheyẹwhe, podọ mí tindo ayajẹ to alọwle mítọn mẹ. Yẹn po asu ṣie po ko plọn dọ dile etlẹ yindọ nugbo he gando Jiwheyẹwhe go yin adọkunnu vivẹ́ de, e ma dabla, podọ yè sọgan mọnukunnujẹemẹ po awubibọ po. Enẹ wẹ zọ́n bọ e nọ yin ayajẹnu na mí nado plọnnu mẹdevo lẹ gando yise mítọn po todido jiawu mítọn po go. To egbehe, pọndohlan he n’tindo gando Kunnudetọ Jehovah tọn lẹ go ko diọ. N’yọnẹn dọ Klistiani nugbo lẹ wẹ yé yin.