Plọn Ovi Towe Lẹ

Joaṣi Gbẹ́ Jehovah Dai Na Ogbẹ́ Ylankan Wutu

JELUSALẸM, tòdaho he mẹ tẹmpli Jiwheyẹwhe tọn tin te, to jujugbọn ojlẹ ylankan de mẹ. Ahọlu Ahazia ṣẹṣẹ yin hùhù wẹ. Bọdo enẹ go, Atalia, onọ̀ Ahazia tọn, wà nuhe mẹdepope ma sọgan lẹn do e go de. E hù visunnu Ahazia tọn lẹ—yèdọ ovivi ewọ lọsu titi tọn lẹ! Be a yọ́n nuhe zọ́n ya?— a Na ewọ nido dugán kakati nido yin dopo to ovi lọ lẹ mẹ wutu wẹ.

Ṣigba, dopo to ovivi Atalia tọn lẹ mẹ, yèdọ Joaṣi he gbẹ́ pò to ovu pẹ́nyẹ́npẹ́nyẹ́n, yin whinwhlẹngán bọ onọ̀-daho etọn ma tlẹ yọnẹn. Be hiẹ jlo na yọ́n lehe enẹ jọ gbọn ya?— Joaṣi do tanyin de, he nọ yin Jehọṣabeati, mẹhe ze e whlá do tẹmpli Jiwheyẹwhe tọn mẹ. E penugo nado wà ehe na asu etọn Jehọiada wẹ yin Yẹwhenọ Daho wutu. Gbọnmọ dali, yé omẹ awe lẹ wà nuhe go yé pé lẹpo nado basi hihọ́na Joaṣi.

Joaṣi yin zizewhla do tẹmpli mẹ na owhe ṣidopo. Nulẹpo wẹ e plọn to finẹ gando Jehovah Jiwheyẹwhe po osẹ́n Etọn lẹ po go. To godo mẹ, whenue Joaṣi tindo owhe ṣinawe, Jehọiada yinuwa nado yí Joaṣi do duahọlu. Be hiẹ jlo na yọ́n lehe Jehọiada wà ehe gbọn, po nuhe jọ do onọ̀-daho Joaṣi tọn, yèdọ Ahọsi ylankan Atalia go po ya?—

Jehọiada pli awhànfuntọ vonọtaun he nọ basi hihọ́na ahọlu Jelusalẹm tọn lẹ to ojlẹ enẹ mẹ lẹ do nuglọ. E dọ aliho he mẹ ewọ po asi etọn po basi hihọ́na visunnu pẹvi Ahọlu Ahazia tọn lọ te na yé. Enẹgodo, Jehọiada do Joaṣi hia awhànfuntọ lọ lẹ, bọ yé mọdọ Joaṣi wẹ dona dugán. Podọ yé kàn ayiha de.

Jehọiada de Joaṣi tọ́n bo yí i do duahọlu. To whenuena gbẹtọ lẹ sè, “yé . . . hopẹ́, bo dọmọ, Jiwheyẹwhe ni whlẹn ahọlu lọ.” Awhànfuntọ lọ lẹ lẹdo Joaṣi nado basi hihọ́na ẹn. Whenue Atalia sè awhágbe ayajẹ tọn lọ, e bẹwezun tọ́n bo jẹagọdo nuhe wà yé te. Ṣigba Jehọiada degbena awhànfuntọ lọ lẹ bọ yé hù Atalia.—2 Ahọlu lẹ 11:1-16.

Be a lẹndọ Joaṣi zindonukọn nado to todoaina nuhe Jehọiada dọna ẹn lẹ bosọ wà nuhe sọgbe ya?— E wàmọ to whenuena Jehọiada gbẹ́ pò to ogbẹ̀.  Joaṣi tlẹ wà nuhe go e pé lẹpo nado mọdọ gbẹtọ lẹ na akuẹ nado vọ́ tẹmpli Jiwheyẹwhe tọn he go otọ́ etọn Ahazia, po babadaho etọn Jeholami po, ko gbẹkọ jlado. Ṣigba, gbọ mí ni pọ́n nuhe jọ to whenuena Jehọiada Yẹwhenọ Daho lọ kú.—2 Ahọlu lẹ 12:1-16.

Joaṣi ko tindo nudi owhe 40 to whenẹnu. Kakati Joaṣi nido to gbẹdo hẹ mẹhe nọ sẹ̀n Jehovah lẹ, e lẹzun họntọn mẹhe nọ sẹ̀n yẹwhe lalo lẹ tọn. Zekalia, visunnu Jehọiada tọn wẹ yin yẹwhenọ Jehovah tọn to ojlẹ enẹ mẹ. Etẹwẹ a lẹndọ Zekalia wà to whenuena e sè nuylankan he wà Joaṣi te lẹ?—

Zekalia dọna Joaṣi po gbẹtọ lọ lẹ po dọmọ: “Na mìwlẹ ko gbẹ́ OKLUNỌ dai wutu, ewọ ga ko sọ gbẹ́ mì dai.” Hogbe ehelẹ gblehomẹna Joaṣi sọmọ bọ e degbè dọ yè ni dlan zannu do Zekalia bo hù i. Lẹnnupọndo enẹ ji—Joaṣi yin whinwhlẹn sọn alọ mẹhutọ de tọn mẹ, ṣigba todin, ewọ lọsu wẹ dọ dọ yè ni hù Zekalia!—2 Otannugbo lẹ 24:1-3, 15-22.

Be a yọ́n nuhe mí sọgan plọn sọn otàn ehe mẹ ya?— E ma jẹ dọ mí ni taidi Atalia, mẹhe gbẹwannamẹ bosọ yin kanylantọ. Kakatimọ, mí dona yiwanna yisenọ hatọ mítọn lẹ kakajẹ kẹntọ mítọn lẹ ji, dile Jesu plọn mí nado nọ wà do. (Matiu 5:44; Johanu 13:34, 35) Podọ, eyin mí jẹ nudagbe wà ji taidi Joaṣi, mí dona zindonukọn domọ bo nọ jihọntọn hẹ mẹhe yiwanna Jehovah po mẹhe nọ na mí tuli nado sẹ̀n ẹn lẹ po.

[Nudọnamẹ odò tọn]

Kanbiọ Lẹ:

○ Nawẹ Joaṣi yin whinwhlẹngán gbọn, podọ sọn alọ mẹnu tọn mẹ?

○ Nawẹ Joaṣi lẹzun ahọlu gbọn, podọ onú dagbe tẹwẹ e wà?

○ Etẹwẹ zọ́n bọ Joaṣi do lẹzun mẹylankan, podọ mẹnu wẹ e hù?

○ Etẹwẹ mí sọgan plọn sọn otàn Biblu tọn ehe mẹ?

[Yẹdide to weda 27]

Joaṣi yin hihọ́-basina