Mẹdatọ He Mí Dona Pà
Dọnsẹpọ Jiwheyẹwhe
Mẹdatọ He Mí Dona Pà
‘ETẸWẸ yin lẹndai ogbẹ̀ tọn?’ Be hiẹ ko kàn kanbiọ ehe sè dewe pọ́n ya? Mẹhe yise dọ mí tin to ogbẹ̀ na onú lẹ wá aimẹ na yede wutu lẹ gbẹ́ to avìdla nado mọ gblọndo kanbiọ ehe tọn. Ṣigba e ma yinmọ na mẹhe kẹalọyi linlẹn he sinai do Biblu ji lọ dọ Jehovah Jiwheyẹwhe wẹ Asisa ogbẹ̀ tọn lẹ gba. (Psalm 36:9) Omẹ ehelẹ yọnẹn dọ Jiwheyẹwhe dá mí na lẹndai de wutu. Mí sọgan mọ lẹndai ehe to Osọhia 4:11 mẹ. Mì gbọ mí ni gbadopọnna lehe hogbe apọsteli Johanu tọn ehelẹ basi zẹẹmẹ nuhewutu mí do tin to ogbẹ̀ tọn do.
Johanu wlanwe gando pipli angẹli he to Jiwheyẹwhe pà to olọn mẹ lẹ tọn go dọmọ: “[Jehovah] mítọn podọ Jiwheyẹwhe mítọn, hiẹ wẹ jẹ nado yí gigo, yẹyi, po huhlọn po: na hiẹ wẹ dá onú popo, podọ to ojlo towe mẹ wẹ yé do tin, bọ yè sọ do dá yé.” Jehovah kẹdẹ wẹ jẹna gbégbò mọnkọtọn. Etẹwutu? Na ewọ “wẹ dá onú popo.” To whelọnu lo, etẹwẹ nudida nuyọnẹntọ etọn lẹ dona yin whinwhàn nado wà?
Jehovah yin alọdlẹndo taidi mẹhe jẹ nado “yí” gigo, yẹyi, po huhlọn po. Matin ayihaawe, ewọ wẹ tindo gigo, yẹyi po huhlọn po hugan to wẹkẹ lọ mẹ. Ṣogan, suhugan gbẹtọvi lẹ tọn ma nọ yigbe dọ ewọ wẹ dá nulẹpo gba. Etomọṣo, mẹdelẹ nọ mọ “onú mamọ” kavi jẹhẹnu mayinukundomọ Jiwheyẹwhe tọn lẹ hezeheze to nuhe e dá lẹ mẹ. (Lomunu lẹ 1:20) Po ahun he gọ́ na pinpẹn-nutọn-yinyọnẹn de po, yé nọ yin whinwhàn nado na gigo po yẹyi po Jehovah. Yé nọ lá kunnudenu he whànmẹ lẹ na mẹhe jlo na sè lẹpo dọ Jehovah wẹ omẹ lọ he dá nulẹpo to aliho he jiawu mẹ bo gbọnmọ dali jẹna osi sisosiso mítọn.—Psalm 19:1, 2; 139:14.
Ṣigba, nawẹ Jehovah nọ mọ huhlọn yí sọn sinsẹ̀n-basitọ etọn lẹ si gbọn? Nugbo wẹ dọ, nudida depope ma sọgan na huhlọn Mẹdatọ huhlọnnọ lọ. (Isaia 40:25, 26) Etomọṣo, na mí yin didá to apajlẹ Jiwheyẹwhe tọn mẹ wutu, mí sọgan do jẹhẹnu Jiwheyẹwhe tọn lẹ hia jẹ obá de mẹ. Huhlọn yin dopo to jẹhẹnu ehelẹ mẹ. (Gẹnẹsisi 1:27) Eyin mí yọ́n pinpẹn nuhe Mẹdatọ mítọn wà na mí tọn nugbonugbo, enẹ na whàn mí nado nọ yí huhlọn po nugopipe mítọn po do gbògbéna ẹn bo pagigona ẹn. Kakati nado yí nugopipe mítọn lẹ do nọgodona ojlo mẹdetiti tọn mítọn lẹ kẹdẹ, mí dona yí huhlọn mítọn lẹpo do sẹ̀n Jehovah Jiwheyẹwhe.—Malku 12:30.
To whelọnu lo, naegbọn mí do tin to ogbẹ̀? Adà godo tọn Osọhia 4:11 tọn na gblọndo dọmọ: “To ojlo towe mẹ wẹ yé [nudida lẹpo] do tin, bọ yè sọ do dá yé.” Mí ma wá gbẹ̀mẹ na míde gba. Mí tin to ogbẹ̀ na Jiwheyẹwhe jlo wutu. Enẹwutu, gbẹzan mítọn na yin ovọ́ bo ma na tindo zẹẹmẹ eyin mí doafọna ojlo mẹdetiti tọn mítọn lẹ kẹdẹ. Nado tindo jijọho ahun mẹ tọn, ayajẹ, po pekọ po, mí dona yọ́n ojlo Jiwheyẹwhe tọn bo yinuwa sọgbe hẹ ẹ. Ehe kẹdẹ wẹ na gọalọna mí nado yọ́n lẹndai he wutu mí do tin to ogbẹ̀.—Psalm 40:8.
[Asisa Yẹdide tọn to weda 19]
NASA, ESA, and A. Nota (STScI)