Be Hiẹ Sọgan Na Avase Mẹsusu Dogọ Ya?

To gbèdopo, sinima dagbedagbe de whàn mẹhe pọ́n ẹn lẹ taun. E do gbẹzan egbesọegbesọ tọn mẹhe nọgbẹ̀ to San Francisco, États-Unis to bẹjẹeji owhe 1900 lẹ tọn hia. Mẹhe basi sinima lọ lẹ ze zomọ fọtodide tọn de do nukọn pinpán pẹvi de tọn, ehe pànta tòhomẹ-liho he mẹsusu nọ gbọn de ji. Yẹdide he yin didohia to sinima lọ mẹ lẹ bẹ osọ́-kẹkẹ po mọto he to zoji to ojlẹ lọ mẹ lẹ po hẹn, gọna ahiwhletọ lẹ po linlinwe-satọ lẹ po.

Nuhe wá blawu taun gando sinima lọ go wẹ yindọ, e sọgan ko yin bibasi to avril 1906, yèdọ ojlẹ vude whẹpo aigba sisọsisọ po miyọ́n he jinu to 18 avril po do wá aimẹ bo hù gbẹtọ fọtọ́n susu lẹ podọ diblayin adà tòdaho lọ tọn enẹ pete wẹ gbakija. Delẹ to mẹhe sọawuhia to sinima lọ mẹ lẹ masọ nọgbẹ̀ na azán kaka de ba. Scott Miles, yèdọ ovivi mẹhe basi sinima lọ lẹ dopo tọn dọmọ: “Omẹ lọ lẹ tin to finẹ poun bo ma tlẹ yọ́n adán he to na gbò yé. Podọ eyin a mọ yẹdide yetọn, onú yetọn na blawuna we janwẹ.”

Mí sọgan yí ninọmẹ yetọn jlẹdo ninọmẹ azán mítọn gbè tọn lẹ go. Ninọmẹ kọmẹnu mítọn lẹ tọn blawu taun. Yé nọ to mahẹ tindo to nuyiwa egbesọegbesọ tọn yetọn lẹ mẹ, bo ma tlẹ yọnẹn dọ nugbajẹmẹji de ja to niyaniya mẹ, yèdọ vasudo titonu ehe po yelọsu po tọn. Ṣigba, to vogbingbọn mẹ na aigba sisọsisọ madonukun de, dotẹnmẹ hundote vude gbẹ́ pò nado na avase kọmẹnu mítọn lẹ gando azán whẹdida tọn Jehovah tọn go. Hiẹ sọgan ko de whenu de dovo to sẹmẹsẹmẹ nado nọ tindo mahẹ to lizọnyizọn họndekọn-jẹ-họndekọn tọn mẹ, ṣigba be hiẹ sọgan wà nususu dogọ nado na avase mẹdevo lẹ ya?

JESU WLEAWUFO NADO DỌYẸWHEHO TO WHEPOPONU

Apajlẹ Jesu tọn jẹna ayidego na e wleawufo nado dọyẹwheho to whepoponu. E nọ dọyẹwheho na mẹhe e dukosọ hẹ lẹpo, vlavo tòkuẹ-ṣinyantọ he e mọ to aliji kavi yọnnu he e mọ to dotọ̀ de tó to gbọjẹ whemẹ tọn whenu. (Luku 19:1-5; Joh. 4:5-10, 21-24) To whenue e tlẹ ko basi tito nado gbọjẹ, e desọn ojlo mẹ bo ze tito enẹ do apadopo nado sọgan plọnnu mẹdevo lẹ. Awuvẹmẹ he e tindo na kọmẹnu etọn lẹ whàn ẹn nado dekunnu mlẹnmlẹn. (Malku 6:30-34) Nawẹ mẹdelẹ to apajlẹ Jesu tọn hodo bo to yẹwhehodọ po niyaniya-yinyin po to egbehe gbọn?

YÉ NỌ YÍ DOTẸNMẸ HUNDOTE LẸPO ZAN GANJI

Melika nọ nọ̀ petlezìn he yin hihọ́-basina taun de ji. Suhugan mẹhe nọ nọ̀ finẹ lẹ tọn yin wehọmẹvi jonọ lẹ podọ sọha alokan yetọn tọn po yinkọ yetọn po ma tin  to owe he mẹ yinkọ lẹ nọ yin sislẹ do mẹ. E yọ́n pinpẹn etọn dọ emi nọ tindo dotẹnmẹ hundote vonọtaun nado bẹ hodọdopọ jẹeji hẹ họ̀hayatọ lẹ do gbigbọnu lẹ ji to agbàsẹnu podọ to whenue emi dukosọ hẹ yé to zomọ he nọ ze mẹ yì petlezìn ji lọ mẹ. E dọmọ: “N’mọdọ aigba-denamẹ ṣie wẹ finẹ yin.” Melika nọ hẹn owe mítọn he tin to ogbè susu mẹ lẹ podọ mẹsusu nọ kẹalọyi alọnuwe pẹvi lẹ po linlinnamẹwe lẹ po. E sọ nọ dọ̀n ayidonugo yetọn yì nọtẹn Intẹnẹt tọn mítọn jw.org ji. Ewọ ko bẹ plọnmẹ Biblu susu jẹeji.

Sonia lọsu nọ tin to aṣeji nado dekunnuna mẹdepope he e dukosọ hẹ. E nọ wazọ́n to dotowhé he ma yin ahọlu tọn, podọ yanwle etọn wẹ nado nọ dekunnu mlẹnmlẹn na azọ́nwatọgbẹ́ etọn lẹ. Jẹnukọn whẹ́, e nọ tẹnpọn nado yọ́n nuhudo po nujlomẹ dopodopo yetọn tọn po. Enẹgodo, e nọ yí ojlẹ gbọjẹ whemẹ tọn etọn zan nado sọgan dọhodopọ hẹ dopodopo yetọn do gbigbọnu lẹ ji. Taidi kọdetọn de, Sonia bẹ plọnmẹ Biblu awe jẹeji. E sọ to tito basi nado nọ yí gbọjẹ whenu etọn lẹ zan to agbàsẹnu dotowhé lọ tọn nado sọgan dọhona mẹhe to tenọpọn doto lẹ.

NỌ YÍ DOTẸNMẸ HUNDOTE LẸ ZAN GANJI

Mẹhe lùn aigba sisọsisọ he wá aimẹ to 1906 lọ tọ́n de ylọ ẹ dọ “nugbajẹmẹji ylankan hugan he nkọ jọ pọ́n to ayimatẹn kavi tòdaho de mẹ.” Ṣigba to madẹnmẹ, nugbajẹmẹji he ko jọ pọ́n lẹpo ma na sọtẹ́n yijlẹdo dehe na wá aimẹ to azán ahọsuyi tọn he ja “mẹhe ma yọ́n Jiwheyẹwhe” lẹpo ji lọ gbè go. (2 Tẹs. 1:8) Ojlo vẹkuvẹku Jehovah tọn wẹ yindọ gbẹtọ lẹ ni diọ ayiha po ahun yetọn po bo yinuwa sọgbe hẹ owẹ̀n avase tọn he Kunnudetọ etọn lẹ to lilá.—2 Pita 3:9; Osọ. 14:6, 7.

Hiẹ tindo lẹblanulọkẹyi lọ nado hùn nukun na gbẹtọ lẹ na yé nido yọ́n nuhewutu ojlẹ he mẹ mí to gbẹnọ te ehelẹ do sinyẹn sọmọ, podọ nado gọalọna yé nado dín Jehovah bo jo yanwle ṣejannabi tọn yetọn lẹ do. (Zẹf. 2:2, 3) Be hiẹ sọgan yí dotẹnmẹ hundote lẹpo zan nado dekunnuna azọ́nwatọgbẹ́ towe lẹ, kọmẹnu towe lẹ, po mẹhe a nọ dukosọ hẹ to nuwiwa egbesọegbesọ tọn towe mẹ lẹ po ya? Be hiẹ sọgan na avase mẹsusu dogọ ya?

[Yẹdide lẹ to weda 31]

Aigba sisọsisọ po miyọ́n he dùnú po to 1906 gbà adà tòdaho San Francisco tọn de pete kija

[Asisa Nudọnamẹ lẹ Tọn]

U.S. National Archives photo

[Yẹdide lẹ to weda 32]

Be hiẹ sọgan yí dotẹnmẹ hundote lẹpo zan nado dekunnu dile hiẹ to mahẹ tindo to nuwiwa egbesọegbesọ tọn towe lẹ mẹ ya?