Mì Nọ Wlebòna Mẹmẹsunnu po Mẹmẹyọnnu Mìtọn He Yin Tókunọ lẹ Po!

TO EGBEHE, omẹ Jiwheyẹwhe tọn lẹ yin whẹndo daho de he bẹ mẹmẹsunnu po mẹmẹyọnnu gbigbọmẹ tọn lẹ po hẹn, he whenuho yetọn yigodo jẹ Samuẹli, Davidi, Samsọni, Lahabi, Mose, Ablaham, Sala, Noa, po Abẹli po ji. Tókunọ susu tin to hagbẹ whẹndo daho ehe tọn lẹ mẹ. Di apajlẹ, asu po asi po he yin tókunọ wẹ omẹ awe tintan he lẹzun Kunnudetọ Jehovah tọn to Mongolie. Podọ na tenọgligo-hinhẹn yisenọ hatọ mítọn he yin tókunọ to Russie lẹ tọn wutu, mí duto whẹho de ji to Whẹdatẹn Jlọjẹ Gbẹtọvi Europe tọn lẹ tọn.

To ojlẹ mítọn mẹ, “afanumẹ nugbonọ, nuyọnẹntọ” lọ ko wleawuna zinjẹgbonu lẹ to ogbè alọ-yido-dọho tọn mẹ bo ko sọ basi tito opli agun tọn lẹ po plidopọ lẹ po tọn to ogbè lọ mẹ. (Mat. 24:45) Ehelẹ ko hẹn ale susu wá na tókunọ lẹ. a Ṣigba be a ko lẹnnupọndo lehe e na vẹawu na tókunọ lẹ do nado plọnnu gando Jiwheyẹwhe nugbo lọ go bo yinukọn to nugbo mẹ to whenue awuwledainanu ehelẹ ma ko tin ji ya? Etẹwẹ a lẹndọ a sọgan wà nado gọalọna tókunọ he tin to lẹdo towe mẹ lẹ?

Whenue Awuwledainanu Egbezangbe Tọn lẹ Ma Ko Tin

Etẹwẹ a lẹndọ tókunọ mẹhomẹ lẹ na dọ eyin hiẹ kanhose yé do numimọ he yé tindo to whenue yé to nuplọn dogbọn Jiwheyẹwhe dali ji? Yé sọgan dọ numọtolanmẹ he yé tindo to whenue yé sè to tintan whenu dọ Jiwheyẹwhe tindo oyín de—lehe nugbo dopo enẹ diọ gbẹzan yetọn do bo hẹn yé dote to nugbo lọ mẹ na owhe susu whẹpo video po DVD ogbè alọ-yido-dọho tọn he gọalọna yé nado plọn nugbo Owe-wiwe tọn he siso lẹ po wá tin-to-aimẹ. Yé sọgan dọ lehe e vẹawu do to whenue opli Klistiani tọn lẹ ma nọ yin bibasi kavi yin lilẹdo ogbè alọ-yido-dọho tọn mẹ. Kakatimọ, mẹde na sinai to apá yetọn bo basi kandai do wema de ji na yé nido sọgan mọnukunnujẹ nuhe to yinyin didọ mẹ. Mẹmẹsunnu tókunọ de plọn nugbo Biblu tọn lẹ to aliho ehe mẹ na owhe ṣinawe whẹpo mẹhe sọgan lilẹ́ nuhe nọ yin didọ lẹ do ogbè alọ-yido-dọho tọn mẹ do wá tin.

Kunnudetọ mẹhomẹ he yin tókunọ lẹ flin lehe e nọ vẹawu do nado dekunnu na mẹhe nọ sènu lẹ. Nado wà ehe, yé nọ hẹn wema pẹvi de he ji nuzedonukọnnamẹ kleun de yin winwlan do to alọ dopo mẹ bo nọ hẹn Atọ̀họ̀-Nuhihọ́ Lọ Tọn po Réveillez-vous! yọyọ lẹ po to alọ awetọ mẹ. E nọ vẹawu taun na tókunọ de nado deanana plọnmẹ Biblu hẹ tókunọ devo gbọn owe zinjẹgbonu he depope to yé mẹ ma mọnukunnujẹemẹ ganji yiyizan dali. Wẹnlatọ mẹhomẹ he yin tókunọ lẹ sọgan flin lehe yé nọ jẹflumẹ do to whenue gbẹtọ lẹ ma mọnukunnujẹ nuhe dọ yé te mẹ bọ yé ma sọgan dọho yinukọn do nugbo Owe-wiwe tọn lẹ ji. Yé sọ yọ́n lehe e nọ hẹnmẹ gbọjọ do nado tindo owanyi ahundopo tọn na Jehovah ṣogan bo ma sọgan yí adọgbigbo do yí nuhe yé ko plọn lẹ do yizan mẹ. Etẹwutu? Na yé ma kudeji eyin nukunnumọjẹnumẹ yetọn do whẹho tangan de ji sọgbe kavi lala.

Mahopọnna aliglọnnamẹnu ehelẹ, mẹmẹsunnu po mẹmẹyọnnu mítọn tókunọ lẹ po gbẹ́ hẹn walọ pipé kavi tenọgli yetọn go. (Job 2:3) Yé ko yí homẹfa do nọtepọn Jehovah. (Ps. 37:7) Podọ ewọ to didona yé todin zẹ̀ nuhe suhugan yetọn donukun go.

Lẹnnupọndo vivẹnu he mẹmẹsunnu tókunọ de he tindo asi po ovi lẹ po do ji. Whẹpo video lẹ do yin bibasi do ogbè alọ-yido-dọho tọn mẹ, e nọ deanana oplọn whẹndo tọn po nugbonọ-yinyin po. Visunnu etọn flin dọmọ:  “Anadidena oplọn whẹndo tọn ma nọ bọawu na otọ́ ṣie, na owe zinjẹgbonu lẹ kẹdẹ wẹ e sọgan yizan nado plọnnu mí. E ma nọ saba mọnukunnujẹ nuhe yin winwlan do owe lọ lẹ mẹ. Mímẹ ovi lẹ lọsu sọ nọ hẹn onú lẹ vẹawu na ẹn dogọ. Eyin e ma basi zẹẹmẹ lẹ ganji, mí nọ yawu do nuṣiwa lọ hia ẹ. Mahopọnna ehe lẹpo, e nọ basi oplọn whẹndo tọn lọ janwẹ. Dile etlẹ yindọ e ma sè Glẹnsigbe ganji bọ ehe nọ saba hẹn ẹn jẹflumẹ, e mọdọ nuhe yin nujọnu hugan wẹ yindọ mímẹ ovi lẹ ni plọn nude gando Jehovah go.”

Sọ lẹnnupọndo mẹmẹsunnu Richard he tindo owhe 70 linlán ṣigba he yin tókunọ podọ nukuntọ́nnọ bo nọ nọ̀ Brooklyn, New York, to Amelika ji. Mẹlẹpo wẹ yọnẹn dọ Richard nọ yì opli Klistiani tọn lẹ to gbesisọ mẹ. Nado jẹ dọ́n, e nọ dó pinpán na ede bo nọ hia fihe pinpán lọ to tenọ te lẹ dopodopo nado yọ́n whenue e na jẹte. To avivọ-whenu dopo, osin-agó to jijà taun sọmọ mọ opli agun tọn de yin hùzẹdeji. Hagbẹ agun lọ tọn lẹpo wẹ sè gando diọdo ehe go, ṣigba to aliho de mẹ Richard ma sè. To whenuena mẹmẹsunnu lẹ doayi nuhe jọ lọ go bo jẹ dindin in pé ji, yé wá mọ Richard to gbonu Plitẹnhọ Ahọluduta lọ tọn bọ e to tenọpọn whenue ohọ̀n na yin hùnhùn. To whenue yé kanse e nuhewutu e do biọ osin-agó he to jijà sinsinyẹn lọ mẹ, e yigbe dọ, “N’yiwanna Jehovah.”

Etẹwẹ Hiẹ Sọgan Wà?

Be tókunọ lẹ tin to lẹdo towe mẹ ya? Be hiẹ sọgan plọn ogbè alọ-yido-dọho tọn jẹ obá de mẹ nado sọgan dọho hẹ yé ya? To paa mẹ, tókunọ lẹ nọ jọmẹ taun bo nọ whesọ to whenue yé to ogbè yetọn plọn mẹdevo lẹ. Hiẹ sọgan dukosọ hẹ tókunọ de to fide kavi to lizọnyizọn lọ mẹ. Etẹwẹ hiẹ sọgan wà? Tẹnpọn nado dọho hẹ yé. Yí alọ do basi dohia nuhe dọ a te tọn, wlan kavi de yẹdide nuhe a jlo na dọ tọn, kavi yí aliho ehe lẹpo zan to pọmẹ. Eyin tókunọ lọ ma tlẹ do ojlo hia to nugbo lọ mẹ, dọna Kunnudetọ devo he yin tókunọ kavi he plọn ogbè alọ-yido-dọho tọn gando dlapọn towe go. Owẹ̀n lọ sọgan fọnjlodotena tókunọ de dogọ eyin e yin zizedonukọnna ẹn to ogbè alọ-yido-dọho tọn mẹ.

Vlavo hiẹ to ogbè alọ-yido-dọho tọn plọn bo nọ kọnawudopọ hẹ agun he nọ yí ogbè enẹ zan. Nawẹ hiẹ na wagbọn do pegan dogọ bo mọnukunnujẹ ogbè lọ mẹ ganji? Dile etlẹ yindọ wẹnlatọ he nọ sènu taidi hiẹ nkọ lẹ sọgan tin to agun lọ mẹ, naegbọn hiẹ ma nado yí alọ kẹdẹ do nọ dọho hẹ yé? Ehe na gọalọna we nado nọ lẹnnupọn to ogbè alọ-yido-dọho tọn mẹ. To whedelẹnu, hiẹ sọgan jẹ omọ̀ lọ mẹ nado dọho kakati nado yí alọ zan. Ṣigba flindọ ogbè depope pinplọn nọ biọ dọ yè ni sinyẹnlin nado sọgan didẹ́ to ogbè lọ mẹ.

Vivẹnudido nado yí ogbè alọ-yido-dọho tọn zan nọ do owanyi gọna sisi he mí tindo na mẹmẹsunnu po mẹmẹyọnnu mítọn tókunọ lẹ po hia. Yí nukun homẹ tọn do pọ́n flumẹjijẹ he tókunọ lẹ nọ tindo numimọ etọn egbesọegbesọ na yé ma nọ mọnukunnujẹ nuhe dọ gbẹtọ lẹ te mẹ to azọ́nmẹ kavi wehọmẹ wutu. Mẹmẹsunnu tókunọ de dọmọ: “Gbẹtọ lẹ nọ to hodọ to apá ṣie egbesọegbesọ. Yẹn nọ tindo  numọtolanmẹ ṣokẹdẹninọ tọn, podọ yẹn nọ jẹflumẹ bo tlẹ nọ gblehomẹ. N’ma yọ́n lehe n’na basi zẹẹmẹ numọtolanmẹ he n’nọ tindo to whedelẹnu tọn do.” Opli mítọn lẹ dona yin bẹtẹn awumiọnnamẹ tọn fie mẹmẹsunnu po mẹmẹyọnnu mítọn tókunọ lẹ po sọgan mọ núdùdù gbigbọmẹ tọn yí te bo duvivi hodọdopọ po gbẹdohẹmẹ dagbe po tọn te.—Joh. 13:34, 35.

Mí masọ dona wọn pipli kleunkleun tókunọ lẹ tọn he nọ kọnawudopọ hẹ agun he bẹ wẹnlatọ he nọ sènu lẹ hẹn. Tito-to-whinnu opli tọn lẹ nọ yin lilẹdo ogbè alọ-yido-dọho tọn mẹ na yé. Na tókunọ lẹ nido sọgan mọnukunnujẹ nuhe to yinyin didọ mẹ, yé nọ sinai to nukọn to Plitẹnhọ Ahọluduta tọn lọ mẹ. Ehe nọ hẹn yé penugo nado mọ mẹhe to lẹdogbedevomẹ basi lọ po hodọtọ lọ po to ojlẹ dopolọ mẹ. Numimọ dohia dọ hagbẹ agun lọ tọn he pò lẹ nọ yawu jẹakọ hẹ tito ehe, podọ e ma nọ fẹayihasẹna yé. Nudopolọ sọ nọ yin wiwà to plidopọ lẹdo tọn po agbegbe tọn lẹ po ji he tito-to-whinnu yetọn nọ bẹ ogbè alọ-yido-dọho tọn hẹn. Hagbẹ agun lọ tọn he nọ wazọ́n sinsinyẹn nado lilẹ́ hodidọ lẹ do ogbè alọ-yido-dọho tọn mẹ dile tókunọ de nọ dọho do to jọwamọ-liho lẹ jẹna pipà ahundopo tọn.

Vlavo hiẹ nọ kọnawudopọ hẹ agun he nọ penukundo kándo ogbè alọ-yido-dọho tọn de go kavi he tindo pipli tókunọ lẹ tọn kleun de bọ opli lẹ nọ yin lilẹdo ogbè yetọn mẹ na yé. Etẹwẹ hiẹ sọgan wà nado na ayidonugo vonọtaun mẹmẹsunnu tókunọ ehelẹ? Nọ basi oylọna yé wá owhé towe gbè. Eyin e yọnbasi, plọn hogbe taun taun delẹ to ogbè alọ-yido-dọho tọn mẹ. Ma dike aliglọnnamẹnu lọ nado dọhodopọ ni dobuna we blo. Hiẹ na mọ aliho de nado dọho hẹ yé janwẹ, podọ owanyi mọnkọtọn didohia na hẹn ayajẹ dẹn-to-aimẹ wá. (1 Joh. 4:8) Mí sọgan mọ nususu plọn sọn Kunnudetọ hatọ mítọn he yin tókunọ lẹ si. Yé yọ́n hodọhẹmẹ ganji bo nọ yawu mọnukunnujẹnumẹ bosọ nọ yìn aslan taun. Mẹmẹsunnu de he mẹjitọ etọn awe lẹ yin tókunọ dọmọ: “Sọn ovu whenu ṣie gbọ́n wẹ n’ko topọ hẹ tókunọ lẹ, podọ n’ma sọgan suahọ nuhe n’mọyi sọn yé dè lẹ tọn gbede. Mí sọgan plọn nususu sọn mẹmẹsunnu po mẹmẹyọnnu mítọn he yin tókunọ lẹ po dè.”

Jehovah yiwanna sinsẹ̀n-basitọ nugbonọ etọn lẹ, he bẹ tókunọ lẹ hẹn. Apajlẹ yise po akọndonanu yetọn tọn po yin dopo to nuhe hẹn titobasinanu Jehovah tọn gbọnvo lẹ mẹ. Enẹwutu, mì gbọ mí ni nọ wlebòna mẹmẹsunnu po mẹmẹyọnnu mítọn he yin tókunọ lẹ po!

[Nudọnamẹ odò tọn]

[Yẹdide to weda 31]

Owẹ̀n Ahọluduta lọ tọn sọgan fọnjlodotena tókunọ de dogọ eyin e yin zizedonukọnna ẹn to ogbè alọ-yido-dọho tọn mẹ

[Yẹdide to weda 32]

Opli mítọn lẹ dona yin bẹtẹn awumiọnnamẹ tọn fie mẹmẹsunnu po mẹmẹyọnnu mítọn tókunọ lẹ po sọgan mọ tulinamẹ gbigbọmẹ tọn yí te