1, 2. Etẹwẹ mẹde dona wà whẹpo do yí baptẹm?

 TO OWHE atọ́n he wayi lẹ gblamẹ, hugan gbẹtọ livi dopo wẹ yí baptẹm taidi Kunnudetọ Jehovah tọn lẹ. Susu yetọn wẹ nugbo lọ yin pinplọn “sọn ovu whenu,” dile e yindo na devi owhe kanweko tintan whenu tọn de he nọ yin Timoti. (2 Tim. 3:14, 15) Mẹdevo lẹ plọnnu gando Jehovah go whenue yé ko whẹ́n mẹho, podọ mẹdevo lẹ to yọnhowhe yetọn mẹ. To owhe delẹ die wayi, nawe de he plọn Biblu hẹ Kunnudetọ Jehovah tọn lẹ yí baptẹm to whenue e do owhe 97!

² Eyin Biblu plọntọ de wẹ a yin kavi eyin mẹjitọ towe lẹ yin Kunnudetọ, be a to linlẹn nado yí baptẹm ya? Yanwle dagbe de niyẹn! Amọ́, whẹpo a nido yí baptẹm, a dona klan dewe do wiwe na Jehovah. Hosọ ehe na basi zẹẹmẹ nuhe klandowiwe bẹhẹn tọn. E nasọ gọalọna we nado mọ nuhewutu whẹwhinwhẹ́n depope ma tin nado whleawu nado klan dewe do wiwe bosọ yí baptẹm whenue a wleawufo nado wàmọ.

ETẸWẸ KLANDOWIWE NỌ BẸHẸN?

3. Na apajlẹ mẹhe go Biblu donù delẹ tọn he klan yede do wiwe na Jehovah.

³ To Biblu mẹ, klandowiwe zẹẹmẹdo yinyin didedovo na lẹndai wiwe de. Akọta he yin kinklandowiwe de wẹ Islaelivi lẹ yin na Jehovah. Amọ́, mẹdelẹ to akọta lọ mẹ sọ yin kinklandowiwe na Jehovah to aliho vonọtaun de mẹ. Di apajlẹ, Aalọn nọ do “ohia wiwe klandowiwe tọn” lọ—enẹ wẹ ogàn sisẹ́ plẹ́bẹ́ he yè yí sika do basi de do tabla etọn go to nukọn. Ogàn sisẹ́ plẹ́bẹ́ he yè yí sika do basi enẹ nọ dohia dọ ewọ yin didedovo nado sẹ̀n to azọ́ndenamẹ vonọtaun de mẹ—enẹ wẹ taidi yẹwhenọ daho Islaeli tọn. (Lev. 8:9) Nazili lẹ lọsu yin  kinklandowiwe na Jehovah to aliho vonọtaun mẹ. Hogbe lọ “Nazili” wá sọn hogbe Heblugbe tọn lọ nazirʹ mẹ he zẹẹmẹdo “Mẹhe Yin Kinklandovo,” kavi “Mẹhe Yin Kinklandowiwe.” Nazili lẹ dona nọgbẹ̀ sọgbe hẹ osù he yin dido na yé to Osẹ́n Mose tọn mẹ lẹ.—Sọh. 6:2-8.

4. (a) Aliho tẹ mẹ wẹ mẹhe klan yede do wiwe na Jehovah lẹ nọ yin didedovo na lẹndai wiwe de te? (b) Etẹwẹ e zẹẹmẹdo nado “mọ́n” dewe? (Sọ pọ́n yẹdide lọ.)

⁴ Whenue a klan dewe do wiwe na Jehovah, a de nado lẹzun devi Jesu Klisti tọn, bosọ de nado ze ojlo Jiwheyẹwhe tọn wiwà do otẹn tintan mẹ to gbẹzan towe mẹ. Etẹwẹ klandowiwe Klistiani tọn na biọ to asi we? Jesu dọmọ: “Eyin mẹdepope jlo nado hodo mi, mì gbọ e ni mọ́n ede.” (Mat. 16:24) Hodidọ Glẹkigbe tọn lọ he yin lilẹdo “mì gbọ e ni mọ́n ede” gán sọ yin lilẹdo “e dona nọ dọ lala na ede.” Taidi devizọnwatọ Jehovah tọn he klan ede do wiwe de, a na nọ dọ lala na nudepope he jẹagọdo ojlo etọn. (2 Kọl. 5:14, 15) Enẹ bẹ lala didọna “azọ́n agbasalan tọn lẹ” taidi fẹnnuwiwa zanhẹmẹ tọn hẹn. (Gal. 5:19-21; 1 Kọl. 6:18) Be tonusisena gbedide enẹlẹ na hẹn ogbẹ̀ vẹawuna we wẹ ya? E ma na yinmọ, eyin a yiwanna Jehovah bosọ kudeji dọ osẹ́n etọn lẹ tin na dagbe towe. (Salm. 119:97; Isa. 48:17, 18) Mẹmẹsunnu de he nọ yin Nicholas dọmọ, “A gán nọ pọ́n nujinọtedo Jehovah tọn lẹ hlan vlavo taidi gànja gànpa de tọn he nọ glọnalina we ma nado wà nuhe jlo we, kavi taidi gànja kinnikinni tọn de he nọ basi hihọ́ namẹ sọn owù mẹ.”

5. (a) Nawẹ a na klan dewe do wiwe na Jehovah gbọn? (b) Vogbingbọn tẹwẹ to klandowiwe po baptẹm po ṣẹnṣẹn? (Sọ pọ́n yẹdide lọ.)

⁵ Nawẹ a na klan dewe do wiwe na Jehovah gbọn? A na dopà na ẹn to odẹ̀ mẹ dọ emi jlo na sẹ̀n ewọ kẹdẹ bosọ ze ojlo etọn wiwà do otẹn tintan mẹ to gbẹzan emitọn mẹ.  Gbọnmọ dali, a to opà do na Jehovah dọ emi na zindonukọn nado nọ yiwanna ẹn po “ahun towe lẹpo, alindọn towe lẹpo, ayiha towe lẹpo, podọ huhlọn towe lẹpo” po. (Malku 12:30) Klandowiwe towe nọ yin bibasi to nuglọ, enẹ wẹ to hiẹ po Jehovah po ṣẹnṣẹn. To vogbingbọn mẹ, baptẹm nọ yin bibasi to gbangba; e nọ dohia mẹlẹ dọ a ko basi klandowiwe. Klandowiwe towe yin opà wiwe de, bọ yanwle towe dona yin nado de opà enẹ, podọ Jehovah nọ donukun dọ a ni wàmọ.—Yẹwh. 5:4, 5.

NAEGBỌN A DONA KLAN DEWE DO WIWE NA JEHOVAH?

6. Etẹwẹ nọ whàn mẹde nado klan ede do wiwe na Jehovah?

⁶ Whẹwhinwhẹ́n titengbe he wutu a do klan dewe do wiwe na Jehovah wẹ yindọ a yiwanna ewọ. Owanyi towe ma sinai do numọtolanmẹ kẹdẹ ji. Kakatimọ, e sinai do “oyọnẹn he pegan” po “nukunnumọjẹnumẹ gbigbọmẹ tọn” po ji gligli—enẹ wẹ nuhe a plọn gando Jehovah go he zọ́n bọ owanyi towe na ewọ siso dogọ lẹ. (Kol. 1:9) Ohó Jiwheyẹwhe tọn pinplọn ko hẹn we kudeji dọ (1) Jehovah yin omẹ nujọnu tọn de, (2) Ohó gbọdo etọn wẹ Biblu yin, podọ (3) e nọ yí titobasinanu etọn zan nado hẹn lẹndai etọn di.

7. Etẹwẹ mí dona to wiwà whẹpo do klan míde do wiwe na Jiwheyẹwhe?

⁷ Mẹhe klan yede do wiwe na Jehovah lẹ dona yọ́n nuplọnmẹ dodonu tọn he to Ohó Jiwheyẹwhe tọn mẹ lẹ, podọ yé nọ nọgbẹ̀ sọgbe hẹ nujinọtedo etọn lẹ. Yé nọ má nuyise yetọn lẹ hẹ mẹdevo lẹ jẹ obá he mẹ ninọmẹ yetọn lẹ na dotẹnmẹ etọn jẹ. (Mat. 28:19, 20) Owanyi yetọn na Jehovah ko siso dogọ, podọ ojlo ahun mẹ tọn yetọn wẹ nado ze  yede jo na ewọ petepete. Be e ma yin mọ wẹ e te na hiẹ lọsu ya? Owanyi mọnkọ tintindo na zọ́n bọ a ma na nọ pọ́n klandowiwe po baptẹm po hlan taidi nude he a basi nado hẹn homẹhun mẹhe plọn Biblu hẹ we kavi mẹjitọ towe lẹ poun; mọ a ma na pọ́n ẹn hlan taidi nude he a basi nado biọ ogbẹ́ mẹ.

8. Nawẹ pinpẹn-nutọn-yinyọnẹn na gọalọna we nado basi nudide bo klan dewe do wiwe na Jehovah gbọn? (Salmu lẹ 116:12-14)

⁸ Nudide lọ nado klan dewe do wiwe na Jehovah nọ wá to jọwamọ-liho kiki eyin a lẹnnupọndo nuhe ewọ ko wà na we lẹpo ji. (Hia Salmu lẹ 116:12-14.) Abajọ Biblu ylọ Jehovah dọ Mẹhe Nọ Namẹ “nunina dagbe lẹpo gọna nunina pipé lẹpo.” (Jak. 1:17) Dehe klohugan to nunina enẹlẹ mẹ wẹ avọ́sinsan Visunnu etọn Jesu tọn. Lẹnnupọndo ehe ji! Ofligọ lọ ko hẹn ẹn yọnbasi na we nado tindo haṣinṣan pẹkipẹki de hẹ Jehovah. Podọ, Jehovah ko na we todido lọ nado nọgbẹ̀ kakadoi. (1 Joh. 4:9, 10, 19) Dewe kinklandowiwe na Jehovah yin aliho de nado do pinpẹn nutọn towe hia na dohia owanyi tọn daho hugan lọ, gọna dona devo he Jehovah ko na we lẹpo. (Deut. 16:17; 2 Kọl. 5:15) Pinpẹn nutọn mọnkọ ji wẹ nupinplọn 46​tọ, hóvila 4​tọ owe Duvivi Ogbẹ̀ Tọn Kakadoi! tọn zinnudo, ehe bẹ video nukunwhiwhe atọ̀n tọn de hẹn he hosọ etọn yin Nọ Ze Nunina Towe lẹ Donukọnna Jiwheyẹwhe.

BE A KO WLEAWUFO NA KLANDOWIWE PO BAPTẸM PO YA?

9. Naegbọn mẹde ma dona mọdọ yè to kọgbidina emi nado basi klandowiwe?

⁹ A gán nọ mọdọ emi ma ko wleawufo na klandowiwe po baptẹm po. Vlavo e gbẹ́ biọ dọ a ni basi diọdo lẹ to gbẹzan towe mẹ nado nọgbẹ̀ sọgbe hẹ nujinọtedo Jehovah tọn lẹ, kavi a gbẹ́ dona wà nususu dogọ nado hẹn yise towe lodo. (Kol. 2:6, 7) E ma yin nuplọntọ lẹpo wẹ nọ basi nukọnyiyi to aliho dopolọ mẹ, podọ e ma yin owhe dopolọ wẹ jọja lẹpo nọ do bo do nọ wleawufo na klandowiwe po baptẹm po. Tẹnpọn bo gbeje nukọnyiyi gbigbọmẹ tọn towe pọ́n sọgbe hẹ nuhe a penugo nado wà, e ma yin sọgbe hẹ nukọnyiyi mẹdevo tọn.—Gal. 6:4, 5.

10. Etẹwẹ a gán wà eyin a mọdọ emi ma ko wleawufo na klandowiwe po baptẹm po? (Sọ pọ́n apotin lọ “ Na Mẹhe to Yinyin Pinplọn Whẹ́n to Nugbo mẹ Lẹ.”)

¹⁰ Eyin a tlẹ doayi e go dọ emi ma ko wleawufo nado klan emide do wiwe na Jehovah, zindonukọn nado yí afọdide enẹ do dó yanwle. Nọ hodẹ̀ dọ Jehovah ni dona vivẹnudido towe lẹ nado basi diọdo depope he yin dandan. (Flp. 2:13; 3:16) A gán kudeji dọ e na sè odẹ̀ towe lẹ bosọ na gblọndo yetọn.—1 Joh. 5:14.

NUHEWUTU MẸDELẸ NỌ WHLEAWU

11. Nawẹ Jehovah na gọalọna mí nado to nugbonọ yin na ẹn zọnmii gbọn?

¹¹ Mẹdelẹ he ko wleawufo na klandowiwe po baptẹm po gbẹ́ nọ whleawu. Yé gán nọ dọna yede dọ, ‘Bọ eyin n’ka wá waylando sinsinyẹn de bo yin didesẹ sọn agun mẹ lo?’ Eyin a nọ dibu to aliho enẹ mẹ, kudeji dọ Jehovah na na we nuhe a do hudo etọn lẹpo ‘nado zinzọnlin dile e jẹ do to nukọn etọn nado hẹn homẹ etọn hùn to gigọ́ mẹ.’ (Kol. 1:10) Ewọ nasọ na we huhlọn nado wà nuhe sọgbe. Kunnudenu he do enẹ hia wẹ yindọ e ko gọalọna mẹsusu nado wà nuhe sọgbe. (1 Kọl. 10:13) Enẹ wẹ zọ́n bọ gbẹtọ vude poun wẹ nọ yin didesẹ sọn agun Klistiani tọn mẹ. Jehovah nọ gọalọna omẹ etọn lẹ nado hẹn nugbonọ-yinyin yetọn go.

12. Nawẹ mí gán dapana ylando sinsinyẹn gbọn?

¹² Gbẹtọvi mapenọ lẹpo wẹ nọ yin whiwhlepọn nado wà nuhe ma sọgbe. (Jak. 1:14)  Amọ́, hiẹ lọsu wẹ na de lehe a na yinuwa do whenue a pannukọn mẹtẹnpọn de. Nugbo lọ wẹ yindọ, to popolẹpo mẹ, hiẹ lọsu wẹ na de lehe a na zan ogbẹ̀ towe do. Mẹdelẹ gán jẹagọdo dọ a ma gán deanana numọtolanmẹ towe lẹ po nuhe a nọ wà lẹ po, amọ́ nugbo lọ wẹ yindọ a gán plọn nado nọ dava ojlo agọ̀ towe lẹ. Podọ, eyin ojlo agọ̀ delẹ tlẹ nọ sọawuhia, a gán nọma joawuna yé. Enẹwutu, nọ hodẹ̀ egbesọegbesọ. Hẹn aṣa dagbe Ohó Jiwheyẹwhe tọn pinplọn tọn go. Nọ yì opli agun tọn lẹ. Nọ má nuyise towe lẹ hẹ mẹdevo lẹ. Afọdide ehelẹ zize to gbesisọ mẹ na na we huhlọn nado nọgbẹ̀ sọgbe hẹ opà klandowiwe tọn towe. Podọ, ma wọ̀n gbede blo dọ Jehovah na gọalọna we nado wàmọ.—Gal. 5:16.

13. Apajlẹ dagbe tẹwẹ Josẹfu zedai na mí?

¹³ E na bọawuna we dogọ nado nọgbẹ̀ sọgbe hẹ klandowiwe towe, eyin a basi dide nuhe a na wà tọn jẹnukọn whẹpo do pehẹ mẹtẹnpọn de. Biblu donù mẹdelẹ go he e họnwun dọ yé wàmọ dile etlẹ yindọ yelọsu yin gbẹtọvi mapenọ lẹ. Di apajlẹ, asi Pọtifali tọn tẹnpọn whlasusu nado doyẹklọ Josẹfu. Amọ́, e ma do ayihaawe depope gando lehe e na yinuwa do go. Biblu dọna mí dọ “ewọ nọ gbẹ́” bo nọ dọmọ: “Nawẹ yẹn sọgan waylan daho ehe do bo gbọnmọ dali waylando do Jiwheyẹwhe?” (Jen. 39:8-10) E họnwun dọ Josẹfu yọ́n lehe e na yinuwa do etlẹ yin whẹpo yọnnu lọ nido tẹ́n ẹn pọ́n. Enẹ hẹn nulẹ bọawuna ẹn dogọ whenue e wá pehẹ whlepọn jọ whlepọn lọ.

14. Nawẹ mí gán plọn nado nọ dọ lala na ylanwiwa gbọn?

¹⁴ Nawẹ a gán do gbemima Josẹfu tọn nkọ hia gbọn? A gán basi dide nuhe a na wà tọn todin eyin a wá pannukọn mẹtẹnpọn de. Plọn nado nọ dọ lala to afọdopolọji na nuhe Jehovah gbẹwanna lẹ, bo tlẹ nọ gbẹ́ nado lẹnnupọndo yé ji. (Salm. 97:10; 119:165) Gbọnmọ dali, a ma na waylando whenue a yin whiwhlepọn. A na ko yọ́n lehe a na yinuwa do. A na ko magbe afọdide he a na ze tọn jẹnukọn.

15. Nawẹ mẹde gán dohia Jehovah gbọn dọ emi “to dindin in vẹkuvẹku”? (Heblu lẹ 11:6)

¹⁵ To ninọmẹ towe mẹ, a gán ko mọdọ emi ko mọ nugbo lọ, podọ dọ ojlo emitọn wẹ nado sẹ̀n Jehovah po ahun lẹpo po, amọ́ nude gbẹ́ to aliglọnna we nado klan dewe do wiwe bosọ yí baptẹm. A gán lẹnnupọndo apajlẹ Ahọlu Davidi tọn ji. A gán vẹ̀ Jehovah  dọmọ: “Dindona mi, Jiwheyẹwhe E, bo yọ́n ahun ṣie. Gbeje mi pọ́n bo yọ́n magbọjẹ ṣie lẹ. Pọ́n eyin aliho ylankan de ma to ohò ṣie mẹ, bosọ plan mi gbọn aliho madopodo lọ ji.” (Salm. 139:23, 24) Jehovah nọ dona mẹhe “to dindin in vẹkuvẹku lẹ.” Vivẹnudido nado jẹ yanwle klandowiwe po baptẹm po tọn kọ̀n nọ dohia ẹ dọ nuhe wà a te pẹẹ niyẹn.—Hia Heblu lẹ 11:6.

ZINDONUKỌN NADO NỌ DỌNSẸPỌ JEHOVAH

16, 17. Nawẹ Jehovah gán dọ̀n mẹhe to yinyin pinplọn whẹ́n to nugbo mẹ lẹ gbọn? (Johanu 6:44)

¹⁶ Jesu dọ dọ Jehovah wẹ nọ dọ̀n devi emitọn lẹ. (Hia Johanu 6:44.) Lẹnnupọndo lehe linlẹn enẹ siso do sọ po lehe e gando gowe do po ji. Jehovah nọ mọ nudagbe de to mẹhe e dọ̀n wá ede dè lẹ dopodopo mẹ. E nọ mọ mẹlọ taidi “nutindo vonọtaun” etọn kavi “nutindo họakuẹ” etọn. (Deut. 7:6; Odò.) Nukun he e nọ yí do pọ́n hiẹ lọsu niyẹn.

¹⁷ Amọ́, e gán yindọ jọja de wẹ a yin he to yinyin pinplọn whẹ́n to nugbo lọ mẹ. E gán nọ ṣí na we dọ mẹdevo lẹ hodo wẹ a te poun. Etomọṣo, Biblu dọmọ: ‘Dọnsẹpọ Jiwheyẹwhe, ewọ nasọ dọnsẹpọ we.’ (Jak. 4:8; 1 Otàn. 28:9) Eyin a ze afọdide tintan nado dọnsẹpọ Jehovah, ewọ lọsu nọ yinuwa bo nọ dọnsẹpọ we. Jehovah ma nọ mọ we taidi mẹhe to pipli de mẹ poun. Mẹdopodopo wẹ e nọ dọ̀n, ehe bẹ mẹhe to yinyin pinplọn whẹ́n to nugbo lọ mẹ lẹ dopodopo hẹn ga. Whenue omẹ mọnkọ de ze afọdide tintan nado dọnsẹpọ Jehovah, Ewọ lọsu nọ yinuwa dile mí mọ do to Jakọbu 4:8 mẹ.—Yijlẹdo 2 Tẹsalonikanu lẹ 2:13 go.

18. Etẹwẹ mí na gbadopọnna to hosọ he bọdego mẹ? (Salmu lẹ 40:8)

¹⁸ Whenue a klan dewe do wiwe na Jehovah bo yí baptẹm, pọndohlan Jesu tọn dohia wẹ a te. E desọn ojlo mẹ bo wá Otọ́ etọn nukọn nado wà nudepope he ewọ biọ to e si. (Hia Salmu lẹ 40:8; Heb. 10:7) To hosọ he bọdego mẹ, mí na dọhodo nuhe na gọalọna we nado to Jehovah sẹ̀n po nugbonọ-yinyin po zọnmii to baptẹm towe godo ji.