HOSỌ OPLỌN TỌN 15
OHÀN 30 Otọ́ Ṣie, Họntọn Ṣie, Jiwheyẹwhe Ṣie
‘E Yọ́n Na Mí Nado Dọnsẹpọ Jiwheyẹwhe!’
“Na yẹn tọn, e yọ́n na mi nado dọnsẹpọ Jiwheyẹwhe.”—SALM. 73:28.
NUHE E BẸHẸN
Lehe mí gán dọnsẹpọ Jehovah dogọ do gọna ale he mọwiwà nọ hẹnwa lẹ.
1, 2. (a) Vivẹnu tẹwẹ e nọ biọ nado wleawuna haṣinṣan pẹkipẹki de hẹ mẹde? (b) Etẹ ji wẹ mí na dọhodo to hosọ ehe mẹ?
BE A do họntọn alọmayiemẹ de ya? Nawẹ mì lẹzun họntọn gbọn? Ayihaawe ma tin dọ a yí whenu zan dopọ hẹ ẹ, sèhó gando avùnnukundiọsọmẹnu etọn lẹ go bosọ yọ́n nuhe e yiwanna po nuhe e gbẹwanna lẹ po. A mọdọ e tindo jẹhẹnu dagbedagbe delẹ bọ hiẹ lọsu jlo na wleawuna ga. A wá yiwanna họntọn towe.
2 Họntọnjiji hẹ mẹde nọ biọ whenu po vivẹnudido po. Nudopolọ wẹ gán yin didọ gando awuwiwlena haṣinṣan pẹkipẹki mẹdetiti tọn de hẹ Jehovah Jiwheyẹwhe go. Hosọ ehe na dọhodo lehe mí gán dọnsẹpọ Jiwheyẹwhe mítọn dogọ do ji gọna ale he mọwiwà nọ hẹnwa lẹ. Jẹnukọn whẹ́, lẹnnupọndo nuhewutu e do yọ́n nado dọnsẹpọ Họntọn dagbe hugan mítọn Jehovah ji.
3. Naegbọn mí dona nọ lẹnayihamẹpọn do ale he dindọnsẹpọ Jehovah nọ hẹnwa lẹ ji? Na apajlẹ.
3 Matin ayihaawe, a na kọngbedopọ dọ e yọ́n nado dọnsẹpọ Jehovah. Amọ́, ayihamẹlinlẹnpọn do lehe e yọ́n do ji taun gán whàn mí nado to dindọnsẹpọ ewọ dogọ zọnmii. (Salm. 63:6-8) Di apajlẹ, mí yọnẹn dọ e nọ wà dagbe na mí taun nado nọ hodo aṣa dagbe núdùdù tọn de, nọ daihun lanmẹyiya tọn lẹ, nọ gbọjẹ ganji bosọ nọ nùsin susu. Etomọṣo, mẹsusu ma nọ kiyana onú ehelẹ, podọ yé nọ dovọ́na agbasalilo yetọn. Amọ́, dile mí to nulẹnpọndo lehe nuwiwa he nọ yidogọna agbasalilo lẹ nọ wà dagbe na mí do ji sọ, mọ wẹ e yọnbasi dogọ dọ mí ni tẹdo yé go do niyẹn. Mọdopolọ, mí gán yọnẹn dọ dindọnsẹpọ Jehovah yọ́n na mí, amọ́ ayihamẹlinlẹnpọn do ale he mọwiwà nọ hẹnwa lẹ ji gán whàn mí nado to dindọnsẹpọ Họntọn mítọn dogọ zọnmii.—Salm. 119:27-30.
4. Dile Salmu lẹ 73:28 dohia do, numọtolanmẹ tẹwẹ salmu-kantọ lọ tindo?
4 Hia Salmu lẹ 73:28. Mẹhe kàn Salmu lẹ 73tọ yin Levinu de he yin dide nado sẹ̀n taidi nuhotọ to tẹmpli Jehovah tọn mẹ. Ayihaawe ma tin dọ e ko sẹ̀n Jehovah po nugbonọ-yinyin po na ojlẹ delẹ. Ṣogan, e gbẹ́ mọdọ nujọnu wẹ e yin nado flinnu ede po mẹdevo lẹ po gando lehe e yọ́n na ẹn podọ na yelọsu “nado dọnsẹpọ Jiwheyẹwhe” do go. Etẹwẹ yin delẹ to ale he mọwiwà nọ hẹnwa lẹ mẹ?
“NADO DỌNSẸPỌ JIWHEYẸWHE” NỌ HẸN AYAJẸ WÁ
5. (a) Naegbọn dindọnsẹpọ Jehovah dogọ do nọ na mí ayajẹ? (b) Sọgbe hẹ Howhinwhẹn lẹ 2:6-16, na apajlẹ tangan delẹ he do lehe nuyọnẹn Jehovah tọn gán hẹn ale wá na we bosọ basi hihọ́na we tlọlọ do hia.
5 Lehe mí nọ dọnsẹpọ Jehovah dogọ do sọ, mọ wẹ mí na do ayajẹ dogọ do niyẹn. (Salm. 65:4) Ehe yin nugbo na whẹwhinwhẹ́n susu wutu. Whẹwhinwhẹ́n dopo wẹ yindọ mí nọ mọaleyi eyin mí yí nuyọnẹn he to Ohó etọn Biblu mẹ do yizan mẹ. Nuyọnẹn ehe nọ basi hihọ́na mí sọn nuyiwadomẹji ylankan lẹ si, podọ sọn nuṣiwa sinsinyẹn lẹ mẹ. (Hia Howhinwhẹn lẹ 2:6-16.) Abajọ Biblu do dọmọ: “Ayajẹnọ wẹ mẹlọ he mọ nuyọnẹn, podọ mẹlọ he tindo wuntuntun.”—Howh. 3:13.
6. Etẹwẹ zọ́n bọ salmu-kantọ lọ do hẹn ayajẹ etọn bu?
6 Na nugbo tọn, họntọn Jehovah tọn lẹ lọsu nọ pehẹ ojlẹ awubla tọn lẹ. Mẹhe kàn Salmu lẹ 73tọ hẹn ayajẹ etọn bu whenue e joawuna linlẹn agọ̀ lẹ. E gblehomẹ bosọ jẹ awuwhàn ji, na to pọndohlan etọn mẹ, onú to yinyọ́n na mẹylankan he nọ dovọ́na Jiwheyẹwhe kavi nujinọtedo Etọn lẹ. E gbọn nuṣiwa dali lẹndọ danuwatọ lẹ po goyitọ lẹ po wẹ nọ jẹ adọkun hugan, bo nọ to jogún-jogún bo ma tlẹ nọ jiya depope. (Salm. 73:3-7, 12) Salmu-kantọ lọ jẹflumẹ sọmọ bọ e wá jẹ fide bọ e do ayihaawe eyin vivẹnudido etọn lẹ nado sẹ̀n Jehovah ma yin sin-bado-pápá-nẹgbé. To awubla etọn mẹ, e dọmọ: “E họnwun dọ, ovọ́ mẹ wẹ yẹn hẹn ahun ṣie do wiwe-ṣeke bo klọ́ alọ ṣie lẹ wé to homẹvọ mẹ te.”—Salm. 73:13.
7. Nawẹ mí gán mọ agbọ́ sọn awubla he gán ze ayajẹ mítọn do owù mẹ si gbọn? (Sọ pọ́n yẹdide lọ.)
7 Salmu-kantọ lọ ma na dotẹnmẹ awubla nado hẹn ẹn jẹflumẹ petepete. E yinuwa. E “biọ fiwiwe gigonọ Jiwheyẹwhe tọn,” fie Jehovah jla pọndohlan etọn do te. (Salm. 73:17-19) Whenue mí blawu, Họntọn dagbe hugan mítọn Jehovah nọ yọnẹn. Eyin mí hodẹ̀ hlan ẹn nado biọ anademẹ bo kẹalọyi alọgọ he e nọ na mí gbọn Ohó etọn po agun lọ po gblamẹ, mí na mọ huhlọn yí nado doakọnna awubla. Etlẹ yin whenue magbọjẹ lẹ húagbọ́ mí, Jehovah na miọnhomẹna mí bo hẹn kọgbọ wá na mí.—Salm. 94:19. a
Levinu he kàn Salmu lẹ 73tọ to ote to “fiwiwe gigonọ Jiwheyẹwhe tọn” (Pọ́n hukan 7tọ)
“NADO DỌNSẸPỌ JIWHEYẸWHE” NỌ HẸN OGBẸ̀ MÍTỌN TINDO LẸNDAI BOSỌ NỌ NA MÍ TODIDO
8. Aliho titengbe devo tẹlẹ mẹ wẹ e yọ́n na mí nado dọnsẹpọ Jiwheyẹwhe te?
8 E yọ́n na mí nado dọnsẹpọ Jiwheyẹwhe to aliho titengbe awe devo lẹ mẹ. Tintan, e nọ zọ́n bọ ogbẹ̀ mítọn nọ do lẹndai. Awetọ, e nọ na mí todido dolido de na sọgodo. (Jel. 29:11) Mì gbọ mí ni gbadopọnna ale ehelẹ yinukọn dogọ.
9. Nawẹ dindọnsẹpọ Jehovah nọ zọ́n bọ gbẹzan mítọn nọ do zẹẹmẹ gbọn?
9 Nado dọnsẹpọ Jehovah nọ zọ́n bọ ogbẹ̀ mítọn nọ do lẹndai. Susu mẹhe nọ gbẹ́ dọ Jiwheyẹwhe ma tin lẹ tọn wẹ nọ lẹndọ ogbẹ̀ ma do zẹẹmẹ depope bọ to nukọn mẹ, whẹndo gbẹtọvi tọn ma nasọ tin ba. Amọ́, Ohó Jiwheyẹwhe tọn pinplọn ko hẹn mí kudeji dọ Jiwheyẹwhe “tin podọ ewọ wẹ ahọsumẹtọ mẹhe to dindin in vẹkuvẹku lẹ tọn.” (Heb. 11:6) Etlẹ yin to egbehe, mí nọ zan gbẹzan dagbe hugan lọ na mí to nuhewutu mí do yin didá lọ wà wutu, enẹ wẹ nado sẹ̀n Otọ́ olọn mẹ tọn mítọn Jehovah.—Deut. 10:12, 13.
10. Etẹwẹ yin didehia to Salmu lẹ 37:29 mẹ gando sọgodo mẹhe tindo todido to Jehovah mẹ lẹ tọn go?
10 Na mẹsusu, todido yetọn fó do ogbẹ̀ ehe mẹ. Nuhe nọ duahunmẹna yé lẹpo wẹ nado yì wazọ́n, do whẹndo ai, bosọ sẹ̀ akuẹ do na sọgodo. Yé ma nọ ze Jiwheyẹwhe do tito yetọn mẹ. To alọ devo mẹ, devizọnwatọ Jehovah tọn lẹ nọ ze todido yetọn do ewọ mẹ. (Salm. 25:3-5; 1 Tim. 6:17) Mí nọ dejido Jiwheyẹwhe he mí ko dọnsẹpọ lọ go, podọ do opà he e do na mí lẹ go. Sọgodo mítọn bẹ todido lọ nado sẹ̀n ewọ kakadoi to Paladisi mẹ hẹn.—Hia Salmu lẹ 37:29.
11. Nawẹ dindọnsẹpọ Jiwheyẹwhe nọ yinuwado mí ji gbọn, podọ nawẹ e nọ yinuwado ewọ lọsu ji gbọn?
11 Nado dọnsẹpọ Jiwheyẹwhe yọ́n na mí to aliho susu devo lẹ mẹ. Di apajlẹ, Jehovah dopà nado jo ylando mẹhe lẹnvọjọ bo dọnsẹpọ ewọ lẹ tọn na yé. (Isa. 1:18) Taidi kọdetọn de, mí ma nọ hẹn agbàn ayihadawhẹnamẹnu he nọ gblewhẹdomẹ na ylando he ko wayi lẹ de tọn. (Salm. 32:1-5) Podọ, e nọ vivi na mí nado hẹn homẹ Jehovah tọn hùn. (Howh. 23:15) E họnwun dọ ayiha towe gán ko jẹ dona devo he nọ wá sọn họntọnjiji hẹ Jiwheyẹwhe mẹ lẹ ji. Amọ́, nawẹ a gán to dindọnsẹpọ Jiwheyẹwhe zọnmii gbọn?
LEHE MÍ NỌ “DỌNSẸPỌ JIWHEYẸWHE” ZỌNMII DO
12. Etẹlẹ wẹ a ko wà nado dọnsẹpọ Jiwheyẹwhe dogọ?
12 Eyin Klistiani he ko yí baptẹm de wẹ a yin, be a ko dọnsẹpọ Jehovah jẹ obá he yiaga mẹ. A ko plọn nugbo susu gando Jehovah Jiwheyẹwhe po Klisti Jesu po go, ko lẹnvọjọ sọn ylando towe he wayi lẹ mẹ bo do yise he lodo hia to Jiwheyẹwhe mẹ bosọ dovivẹnu nado yinuwa to kọndopọ mẹ hẹ ojlo etọn. Amọ́ nado dọnsẹpọ Jiwheyẹwhe dogọ, mí dona to onú ehelẹ wà zọnmii.—Kol. 2:6.
13. Onú atọ̀n tẹlẹ wẹ gán gọalọna mí nado to dindọnsẹpọ Jehovah dogọ zọnmii?
13 Etẹwẹ na gọalọna mí nado to dindọnsẹpọ Jehovah dogọ zọnmii? (1) Mí dona zindonukọn nado nọ hia Biblu bosọ nọ plọn ẹn. Dile mí to mọwà, yanwle mítọn ma dona yin nado plọn nugbo dodonu tọn lẹ gando Jiwheyẹwhe go poun. Kakatimọ, mí dona dovivẹnu nado yọ́n ojlo Jiwheyẹwhe tọn na mí bo dike nunọwhinnusẹ́n he e zedai to Ohó etọn mẹ lẹ ni deanana mí. (Efe. 5:15-17) (2) Mí dona hẹn yise mítọn lodo gbọn ayihamẹlinlẹnpọn do kunnudenu susu he dohia dọ ewọ yiwanna mí lẹ ji dali. (3) Mí dona zindonukọn nado gbẹwanna nuhe nọ hẹn homẹgble Jehovah lẹ, bo dapana họntọnjiji hẹ mẹhe nọ wà onú mọnkọ lẹ.—Salm. 1:1; 101:3.
14. To kọndopọ mẹ hẹ nuhe yin didọ to 1 Kọlintinu lẹ 10:31 mẹ, etẹwẹ yin nudelẹ he mí gán wà to gbẹzan egbesọegbesọ tọn mítọn mẹ nado hẹn homẹ Jehovah tọn hùn? (Sọ pọ́n yẹdide lọ lẹ.)
14 Hia 1 Kọlintinu lẹ 10:31. Nujọnu taun wẹ e yin dọ mí ni dovivẹnu vẹkuvẹku nado doafọna nuhe nọ hẹn homẹ Jehovah tọn hùn lẹ. Ehe bẹ nususu hẹn hú nuhe mí nọ wà to lizọnyizọn lọ mẹ podọ to opli agun tọn lẹ ji. Azọ́n dagbe he nọ hẹn homẹ Jehovah tọn hùn lẹ bẹ nuhe mí nọ wà to gbẹzan egbesọegbesọ tọn mítọn mẹ lẹ hẹn. Di apajlẹ, whenue mí yin nugbonọ to nulẹpo mẹ, bosọ má nuhe mí do lẹ hẹ mẹdevo lẹ, mí nọ hẹn homẹ Jehovah tọn hùn. (2 Kọl. 8:21; 9:7) E sọ nọ jlo dọ mí ni yí nukun nujọnu tọn do pọ́n nunina ogbẹ̀ tọn. Mí nọ dọnsẹpọ Ogbẹ̀-namẹtọ lọ dogọ eyin mí nọ nọ̀ jlẹkaji gando dùdù po nùnù po go, podọ eyin mí nọ penukundo agbasalilo mítọn go to aliho he sọgbe hẹ lẹnpọn dagbe devo lẹ mẹ. Vivẹnu depope he mí to dido nado hẹn homẹ Jehovah tọn hùn etlẹ yin to onú flinflin lẹ mẹ na dọ̀n mí sẹpọ ewọ dogọ.—Luku 16:10.
Aṣejininọ to whenue mí to húnkun, nukunpipedo míde go gbọn aihun lanmẹyiya tọn didà po núdùdù hunsindagbe tọn dùdù po dali gọna johẹmẹ yin aliho delẹ he mẹ mí gán hẹn homẹ Jehovah tọn hùn te (Pọ́n hukan 14tọ)
15. Nawẹ Jehovah nọ donukun dọ mí ni yinuwa hẹ mẹdevo lẹ do?
15 Jehovah nọ do homẹdagbe hia dodonọ po mawadodonọ lẹ po. (Mat. 5:45) E nọ donukun dọ mí ni nọ do homẹdagbe mọnkọ hia mẹdevo lẹ. Di apajlẹ, mí nọ tẹnpọn “ma nado nọ dọho ylankan gando mẹdepope go, ma nado yin jlẹwàtọ, . . . bo nọ do walọmimiọn mlẹnmlẹn hia gbẹtọ lẹpo.” (Titu 3:2) Po ehe po to ayiha mẹ, mí ma nọ yí nukunpẹvi do pọ́n mẹdevo lẹ na nuyise yetọn gbọnvona mítọn lẹ poun wutu. (2 Tim. 2:23-25) Mí nọ dọnsẹpọ Jehovah dogọ eyin mí nọ do homẹdagbe hia to whepoponu, podọ eyin mí nọ jọmẹ to whenue mí to nuyiwa hẹ mẹlẹpo.
MÍ GÁN “DỌNSẸPỌ JIWHEYẸWHE” ETLẸ YIN TO WHENUE MÍ DAHLI
16. Numọtolanmẹ tẹwẹ mẹhe kàn Salmu lẹ 73tọ jẹ tintindo ji to ojlẹ delẹ godo?
16 Amọ́ etẹwẹ lo, eyin to ojlẹ delẹ godo, a jẹ mimọ ji dọ a ma jẹna owanyi Jehovah tọn? Dile mí ko mọ do, onú mọnkọ de há mẹhe kàn Salmu lẹ 73tọ. E wule dọmọ: “Afọ ṣie ko dibla fẹ́; afọ ṣie lẹ ko dibla dídí.” (Salm. 73:2) Dile ewọ lọsu yigbe etọn do, e ko “jẹflumẹ,” ‘wuntuntun whèdo e,’ bọ e “taidi kanlin he ma nọ lẹnnupọn de” to Jehovah nukọn.” (Salm. 73:21, 22) Be e wá tadona kọ̀n dọ na nuṣiwa emitọn wutu, emitọn fó ján niyẹn bọ emi ma jẹna owanyi Jehovah tọn wẹ ya?
17. (a) Etẹwẹ salmu-kantọ lọ wà, etlẹ yin to whenue e jẹflumẹ pete? (b) Etẹwẹ mí gán plọn sọn numimọ etọn mẹ? (Sọ pọ́n yẹdide lọ lẹ.)
17 Eyin salmu-kantọ lọ mọdọ Jehovah ko gbẹ́ emi dai, be ojlẹ vude poun wẹ e do numọtolanmẹ ehe na. E taidi dọ e wá jẹ fide bọ e mọdọ emi dona dọnsẹpọ Jiwheyẹwhe dogọ dile nuhe e dọ lẹ dohia do, to whenue e dọmọ: “Ṣigba, yẹn tin to [Jehovah] dè to whepoponu todin; hiẹ ko hẹn adusilọ ṣie go. Hiẹ nọ yí ayinamẹ towe do deanana mi, podọ to godo mẹ, hiẹ na plan mi biọ gigo mẹ.” (Salm. 73:23, 24) Mílọsu dona nọ lẹhlan Jehovah taidi osé gángán de whenue mí jẹflumẹ kavi gbọjọ. (Salm. 73:26; 94:18) Eyin afọ mítọn lẹ tlẹ fẹ́ na ojlẹ de, mí gán lẹkọwa Jehovah dè po jidide lọ po dọ ewọ “nọ wleawu nado jonamẹ.” (Salm. 86:5) Titengbe to whenue mí jẹflumẹ petepete wẹ mí dona dọnsẹpọ Jiwheyẹwhe mítọn dogọ.—Salm. 103:13, 14.
Whenue mí mọdọ mí vọgán to gbigbọ-liho, mí dona dọnsẹpọ Jehovah dogọ gbọn mahẹ tintindo dogọ to sinsẹ̀n-bibasi mítọn hlan ewọ mẹ dali (Pọ́n hukan 17tọ)
“DỌNSẸPỌ JIWHEYẸWHE” KAKADOI
18. Naegbọn dogbó de ma tin nado dọnsẹpọ Jehovah dogọ?
18 Dogbó de ma tin na obá he mẹ mí gán dọnsẹpọ Jehovah jẹ gọna lehe mí gán yọ́n ewọ ganji do sọ. Biblu dọ dọ aliho Jehovah tọn lẹ, nuyọnẹn etọn po oyọnẹn etọn po “ma yọ́n dinmọ.”—Lom. 11:33.
19. Nujikudo tẹwẹ Salmu lẹ na mí?
19 Salmu lẹ 79:13 dọmọ: “Mí omẹ towe lẹ podọ lẹngbọpa kanlindugbo towe tọn, na nọ dopẹna we kakadoi; mí nasọ nọ lá pipà towe sọn whẹndo de mẹ jẹ devo mẹ.” Dile a to dindọnsẹpọ Jiwheyẹwhe sọ, hiẹ lọsu gán kudeji dọ a na mọ dona madopodo lẹ yí bo yí nujikudo do dọmọ: “Jiwheyẹwhe wẹ osé ahun ṣie tọn podọ mimá ṣie kakadoi.”—Salm. 73:26.
OHÀN 32 Nọ Adà Jehovah Tọn Mẹ!
a Mẹdelẹ he to ahidi hẹ magbọjẹ, flumẹjijẹ kavi awubla na whenu dindẹn gán do hudo alọgọ dotozọ́nwatọ azọ́nyọnẹntọ de tọn. Nado mọ nudọnamẹ dogọ, pọ́n Atọ̀họ̀-Nuhihọ́ lọ Tọn Sọha 1 2023 tọn.
