HOSỌ OPLỌN TỌN 33
“Mẹhe Nọ Dotoaina We lẹ” Na Yin Whinwhlẹngán
“Nọ payi dewe po mẹpinplọn towe po go to whepoponu. Zindonukọn to onú ehelẹ mẹ, na gbọn ehe wiwà dali, hiẹ na whlẹn dewe po mẹhe nọ dotoaina we lẹ po gán.”—1 TIM. 4:16.
OHÀN 67 “Nọ Dọyẹwheho Ohó lọ Tọn”
BLADOPỌ *
1. Etẹwẹ mímẹpo nọ jlo na hẹnnumẹ mítọn lẹ?
“SỌN whenue gbọ́n n’mọ nugbo lọ wẹ n’jlo dọ mẹlẹpo to whẹndo ṣie mẹ ni tin hẹ mi to Paladisi mẹ,” wẹ mẹmẹyọnnu de he nọ yin Pauline * dọ. E yidogọ dọ, “Na taun tọn, n’jlo dọ asu ṣie Wayne po visunnu mítọn po ni hopódona mi to Jehovah sinsẹ̀n mẹ.” Be a tindo hẹnnumẹ he ma ko wá yọ́n Jehovah bosọ yiwanna ewọ lẹ ya? E yọnbasi dọ numọtolanmẹ he Pauline tindo na whẹndo etọn nkọ wẹ a nọ tindo na yé.
2. Kanbiọ tẹlẹ wẹ mí na gbadopọnna to hosọ ehe mẹ?
2 Mí ma sọgan hẹn hẹnnumẹ mítọn lẹ gánnugánnu nado kẹalọyi wẹndagbe lọ, ṣigba mí sọgan na tuli yé nado dike owẹ̀n Biblu tọn ni yinuwado ayiha po ahun yetọn lẹ po ji. (2 Tim. 3:14, 15) Naegbọn mí dona dekunnuna hẹnnumẹ mítọn lẹ? Naegbọn mí dona nọ do mẹtọnhopọn hia? Etẹwẹ mí sọgan wà nado gọalọna hẹnnumẹ mítọn lẹ nado wá yiwanna Jehovah dile mílọsu ko wà do? Podọ, nawẹ mẹhe to agun mítọn mẹ lẹpo sọgan gọalọna mí gbọn?
NAEGBỌN MÍ DONA NỌ DEKUNNUNA HẸNNUMẸ MÍTỌN LẸ?
3. Sọgbe hẹ 2 Pita 3:9, naegbọn mí dona nọ dekunnuna hẹnnumẹ mítọn lẹ?
3 To madẹnmẹ, Jehovah na hẹn titonu ehe wá opodo. Mẹhe tindo “ninọmẹ ahun mẹ tọn he jẹna ogbẹ̀ madopodo” lẹ kẹdẹ wẹ na luntọ́n. (Owalọ 13:48) Mí nọ yí whenu po huhlọn susu po zan nado dọyẹwheho na mẹhe mí ma yọnẹn lẹ to lẹdo mítọn mẹ, enẹwutu e sọgbe dọ mí ni jlo dọ hẹnnumẹ mítọn lẹ lọsu ni sẹ̀n Jehovah dopọ hẹ mí. Otọ́ owanyinọ mítọn Jehovah “ma jlo dọ mẹdepope ni yin vivasudo ṣigba jlo dọ mẹlẹpo ni wá lẹnvọjọ kọ̀n.”—Hia 2 Pita 3:9.
4. Nuṣiwa tẹ mẹ wẹ mí sọgan jai jẹ to whenue mí to kunnudena hẹnnumẹ mítọn lẹ?
4 Mí dona hẹn do ayiha mẹ dọ aliho dagbe de po ylankan de po tin nado lá owẹ̀n whlẹngán tọn lọ. Dile etlẹ yindọ mí sọgan nọ yí zinzin zan to whenue mí to kunnudena mẹhe mí ma yọnẹn de, mí sọgan nọ mọdọ mí gán dọhona hẹnnumẹ mítọn lẹ madoadúdẹji.
5. Etẹwẹ mí dona hẹn do ayiha mẹ to whenue mí to tintẹnpọn nado dọhona hẹnnumẹ mítọn lẹ gando nugbo lọ go?
5 Susu mítọn wẹ aliho he mẹ mí dekunnuna hẹnnumẹ mítọn lẹ te to tintan whenu sọgan nọ wá vẹna, bọ mí nọ mọdọ eyin mí ko yọnẹn wẹ mí na ko yinuwa hẹ yé to aliho he gbọnvo mẹ. Apọsteli Paulu na ayinamẹ Klistiani lẹ dọmọ: “Mì gbọ ohó mìtọn ni nọ gọ́ na ojọmiọn, na ojẹ̀ ni nọ pé e to whepoponu, na mì nido sọgan yọ́n lehe mì na nọ gblọnhona mẹdopodopo do.” (Kol. 4:5, 6) E yọ́n nado nọ flin ayinamẹ ehe whenue mí to hodọna hẹnnumẹ mítọn lẹ. E ma yinmọ, mí sọgan yàn yé dogbé kakati nado diọlinlẹnna yé.
ETẸWẸ MÍ SỌGAN WÀ NADO GỌALỌNA HẸNNUMẸ MÍTỌN LẸ?
Mẹtọnhopọn po walọyizan towe po sọgan dekunnu hugan nudevo depope (Pọ́n hukan 6-8tọ) *
6, 7. Na apajlẹ de he dohia dọ e yin nujọnu nado nọ do mẹtọnhopọn hia alọwlemẹ mayisenọ de.
6 Nọ do mẹtọnhopọn hia. Pauline he go mí donù wayi, dọmọ: “To tintan whenu, n’nọ jlo na dọhona asu ṣie gando gbigbọnu lẹ kẹdẹ go. Mí ma nọ dọhodo onú paa lẹ ji gbede.” Ṣigba, asu Pauline tọn Wayne, ma yọ́n nususu do Biblu ji, podọ e ma nọ mọnukunnujẹ nuhe ji Pauline to hodọdo lẹ mẹ. Na ewọ tọn, e nọ taidi na ẹn dọ nudevo ma nọ duahunmẹna Pauline zẹ̀ sinsẹ̀n etọn go. E nọ hanú dọ asi emitọn to gbẹdo hẹ sinsẹ̀n klandovo owùnọ de he to yẹdoklọ ẹ.
7 Pauline yigbe dọ nugbo wẹ dọ na ojlẹ de, emi yí whenu susu zan to whèjai podọ to sẹfifo lẹ to pọmẹ hẹ mẹmẹsunnu po mẹmẹyọnnu emitọn lẹ po—vlavo na opli lẹ, yẹwhehodidọ po nuwiwa pọmẹ tọn lẹ po. E dọmọ: “Wayne nọ wá whégbè to whedelẹnu bo nọ há whé-vọ́ bosọ nọ mọ ede to ṣokẹdẹ.” E sọgbe dọ Wayne jẹdò asi etọn po visunnu etọn po tọn. Ewọ ma yọ́n mẹhe yé to gbẹdo hẹ lẹ, podọ e nọ taidi na ẹn dọ họntọn yọyọ Pauline tọn lẹ wá yin nujọnu na ẹn hú emi. Wayne gblehomẹ bo sìn-adán nado gbẹ́ Pauline dai. Be a mọ aliho delẹ he mẹ Pauline sọgan ko do mẹtọnhopọn hia dogọ te ya?
8. Sọgbe hẹ 1 Pita 3:1, 2, etẹwẹ sọgan yinuwado hẹnnumẹ mítọn lẹ ji hugan?
8 Dike walọyizan towe ni nọ dekunnuna we. To paa mẹ, nuhe mí nọ wà lẹ nọ yinuwado hẹnnumẹ mítọn lẹ ji hú nuhe mí nọ dọ lẹ. (Hia 1 Pita 3:1, 2.) Nugbo enẹ wá họnwun na Pauline to godo mẹ. E dọmọ: “N’yọnẹn dọ Wayne yiwanna mí bo ma jlo nugbonugbo nado basi gbẹdai. Ṣigba, adánsin-namẹ etọn zọ́n bọ n’mọdọ n’dona jẹ nulẹ wà ji to aliho he Jehovah kẹalọyi mẹ. Kakati nado nọ to ohó susu dọ, n’dona nọ ze apajlẹ dagbe dai gbọn walọyizan ṣie dali.” Pauline masọ nọ gbidikọna Wayne nado dọho hẹ ẹ do Biblu ji ba, podọ e jẹ hodọdopọ hẹ ẹ ji do whẹho paa lẹ ji. Wayne mọdọ ewọ lẹzun gbẹtọ jijọhonọ, podọ dọ walọyizan visunnu yetọn tọn pọnte dogọ. (Howh. 31:18, 27, 28) Whenue Wayne doayi kọdetọn dagbe he owẹ̀n Biblu tọn tindo do whẹndo etọn ji go, ewọ na dotẹnmẹ Ohó Jiwheyẹwhe tọn nado jẹ ahun etọn mẹ.—1 Kọl. 7:12-14, 16.
9. Naegbọn mí dona nọ sinyẹnlin?
9 Nọ sinyẹnlin dile a to tintẹnpọn nado gọalọna hẹnnumẹ towe lẹ. Jehovah ze apajlẹ lọ dai na mí. Ewọ nọ na dotẹnmẹ gbẹtọ lẹ “pludopludo” nado kẹalọyi wẹndagbe lọ bo mọ ogbẹ̀. (Jel. 44:4) Podọ, apọsteli Paulu na tuli Timoti nado sinyẹnlin dile e to alọgọna mẹdevo lẹ. Etẹwutu? Na gbọnmọ dali, ewọ na whlẹn ede po mẹhe nọ dotoaina ẹn lẹ po gán. (1 Tim. 4:16) Na mí yiwanna hẹnnumẹ mítọn lẹ wutu, mí nọ jlo dọ yé ni yọ́n nugbo he tin to Ohó Jiwheyẹwhe tọn mẹ lẹ. Hodidọ po nuyiwa Pauline tọn lẹ po wá yinuwado whẹndo etọn ji to aliho dagbe mẹ. Todin, homẹ etọn hùn nado to Jehovah sẹ̀n to pọmẹ hẹ asu etọn. Yé omẹ awe lẹ yin gbehosọnalitọ, podọ Wayne yin mẹho agun tọn.
10. Naegbọn mí dona nọ fahomẹ?
10 Nọ fahomẹ. Eyin mí nọ nọgbẹ̀ sọgbe hẹ nujinọtedo Jiwheyẹwhe tọn lẹ, e sọgan vẹawuna hẹnnumẹ mítọn lẹ nado diọada sọgbe hẹ nuyise po aliho gbẹninọ tọn yọyọ mítọn po. To paa mẹ, onú tintan he go yé nọ doayi wẹ yindọ mí masọ nọ kọnawudopọ hẹ yé to whedudu lẹ mẹ ba, podọ mí masọ nọ doalọ to tonudidọ mẹ ba. To bẹjẹeji, mẹdelẹ sọgan gblehomẹ do mí go. (Mat. 10:35, 36) Ṣigba, agbọ́ yetọn ma dona pé mí. Eyin mí doalọtena alọgigọna yé nado mọnukunnujẹ nuyise mítọn lẹ mẹ, to linlẹn de mẹ, be whẹdana yé wẹ mí te dọ yé ma jẹna ogbẹ̀ madopodo. Jehovah ma biọ to mí si nado nọ dawhẹnamẹ—e ko deazọ́n enẹ na Jesu. (Joh. 5:22) Eyin mí nọ fahomẹ, hẹnnumẹ mítọn lẹ sọgan wá desọn ojlo mẹ to godo mẹ nado dotoaina owẹ̀n mítọn.—Pọ́n apotin lọ “ Nọ Yí Nọtẹn Intẹnẹt Tọn Mítọn Do Plọnnumẹ.”
11-13. Etẹwẹ a plọn sọn aliho he mẹ Alice yinuwa hẹ mẹjitọ etọn lẹ te mẹ?
11 Nọ yin nujikudonọ ṣogan bo nọ yí zinzin zan. (Howh. 15:2) Lẹnnupọndo apajlẹ Alice tọn ji. Ewọ plọnnu gando Jehovah go to whenue e to fie dẹn do mẹjitọ etọn lẹ, mẹhe ma tindo yise to Jiwheyẹwhe mẹ bosọ yin tonudọtọ akonka lẹ. E wá mọdọ emi dona dọhona yé gando nudagbe he plọn emi te lẹ go, dile e na yawu yọnbasi do. Alice dọmọ: “Eyin a nọte kaka bọ whenu ko fẹ́ whẹpo do dọhona whẹndo towe gando nuyise towe po aliho gbẹninọ tọn yọyọ towe po go, enẹ na gbleawuna yé hú lehe a lẹn do.” Ewọ nọ kanwehlan mẹjitọ etọn lẹ bo nọ kàn linlẹn yetọn sè gando nuhe Biblu plọnmẹ do hosọ he mẹ e lẹndọ yé na tindo ojlo te lẹ ji go, taidi hosọ he dọhodo owanyi ji lẹ. (1 Kọl. 13:1-13) E nọ dopẹna mẹjitọ etọn lẹ dọ yé plọn emi whẹ́n bosọ penukundo emi go, podọ e nọ do nunina lẹ hlan yé. Eyin e dla mẹjitọ etọn lẹ pọ́n, e nọ vánkan taun nado wà whégbè-zọ́n lẹ hẹ onọ̀ etọn. To tintan whenu he Alice dọhona yé gando nuyise yọyọ etọn lẹ go, e ma yì na mẹjitọ etọn lẹ paali.
12 Whenue Alice to whégbè hẹ mẹjitọ etọn lẹ, e ma nọ yí tito Biblu hihia tọn etọn do daihun. Alice dọmọ: “Ehe gọalọna onọ̀ ṣie nado mọnukunnujẹ obá he mẹ Biblu yin nujọnu na mi jẹ mẹ.” To ojlẹ dopolọ mẹ, otọ́ Alice tọn basi dide nado plọnnu vude do Biblu ji, nado sọgan yọ́n nuhewutu pọndohlan viyọnnu etọn tọn do diọ, podọ ojlo etọn wẹ nado mọhodọdo Biblu go. Alice dọmọ: “N’na ẹn Biblu dopo, bo kàn onú kleun de do e mẹ.” Etẹwẹ wá yin kọdetọn lọ? Kakati nado mọhodọ, nuhe otọ́ Alice tọn hia to Ohó Jiwheyẹwhe tọn mẹ lẹ yinuwadeji sisosiso.
13 Mí dona yin nujikudonọ ṣogan bo yí zinzin zan, eyin etlẹ biọ dọ mí ni doakọnna whlepọn lẹ. (1 Kọl. 4:12b) Di apajlẹ, Alice dona doakọnna nukundiọsọmẹ onọ̀ etọn tọn. Alice dọmọ: “Whenue n’yí baptẹm, onọ̀ ṣie zun mi dọ n’yin ‘ovi gbigble.’” Nawẹ Alice yinuwa gbọn? E dọmọ: “Kakati nado dapana hodidọ do whẹho lọ ji, n’yí sisi do basi zẹẹmẹ dọ n’ko basi nudide nado yin Kunnudetọ Jehovah tọn de, podọ n’ma na diọlinlẹn. N’tẹnpọn nado vọ́ jide na onọ̀ ṣie dọ n’yiwanna ẹn nugbonugbo. Mí omẹ awe lẹ viavi, podọ n’dà núdùdù dagbedagbe de na ẹn. Bẹsọn gbenẹgbe, onọ̀ ṣie jẹ alọkẹyi ji dọ Biblu to gbẹtọ-yinyin ṣie hẹn pọnte dogọ.”
14. Naegbọn mí ma dona joawunanu gbede eyin yè to kọgbidina mí nado jo Jehovah sinsẹ̀n do?
14 E sọgan yí whenu susu whẹpo obá he mẹ Jehovah sinsẹ̀n yin nujọnu na mí jẹ nido họnwun na hẹnnumẹ mítọn lẹ hezeheze. Di apajlẹ, whenue Alice basi dide nado yin gbehosọnalitọ kakati nado doafọna agbasazọ́n he mẹjitọ etọn lẹ jlo na ẹn, e vẹna onọ̀ etọn taun bọ ewọ viavi whladopo dogọ. Amọ́, Alice tẹdo gbemima etọn go. E dọmọ: “Eyin a joawuna kọgbidinamẹ to whẹho dopo mẹ, e yọnbasi dọ whẹndo towe nisọ gbidikọna we to whẹho devo lẹ mẹ. Amọ́, eyin a jọmẹ hẹ whẹndo towe, ṣogan bo yin nujikudonọ, delẹ to yé mẹ sọgan wá dotoaina we.” Nuhe jọ to whẹho Alice tọn mẹ niyẹn. Mẹjitọ etọn lẹ yin gbehosọnalitọ todin, podọ otọ́ etọn yin mẹho agun tọn de.
NAWẸ HAGBẸ AGUN TỌN LẸPO SỌGAN GỌALỌ GBỌN?
Nawẹ agun lọ sọgan gọalọna hagbẹ whẹndo tọn mítọn he yin mayisenọ lẹ gbọn? (Pọ́n hukan 15, 16tọ) *
15. Sọgbe hẹ Matiu 5:14-16 po 1 Pita 2:12 po, nawẹ “azọ́n dagbe” he mẹdevo lẹ nọ wà sọgan gọalọna hẹnnumẹ mítọn lẹ gbọn?
15 Jehovah nọ dọ̀n gbẹtọ lẹ wá ede dè gbọn “azọ́n dagbe” he agun Klistiani tọn nọ wà lẹ gblamẹ. (Hia Matiu 5:14-16; 1 Pita 2:12.) Eyin alọwlemẹ towe ma yin Kunnudetọ Jehovah tọn de, be ewọ yọ́n hagbẹ agun tọn towe lẹ ya? Pauline he go mí donù jẹnukọn nọ basi oylọna mẹmẹsunnu po mẹmẹyọnnu lẹ po wá owhé etọn gbè, na asu etọn Wayne nido sọgan jẹakọ hẹ yé. Wayne flin lehe mẹmẹsunnu de gọalọna ẹn nado vọ́ pọndohlan etọn jlado gando Kunnudetọ lẹ go do dọmọ: “E yí gbọjẹ azán dopo blebu tọn to azọ́nmẹ nado pọ́n bọlu hẹ mi to televiziọn ji poun. Podọ, n’dọna dee dọ, ‘Gbẹtọ ganji ka wẹ maa!’”
16. Naegbọn mí dona nọ basi oylọna hẹnnumẹ mítọn lẹ wá opli lẹ?
16 Aliho dagbe hugan dopo nado gọalọna hẹnnumẹ mítọn lẹ wẹ nado basi oylọna yé wá opli agun tọn mítọn lẹ. (1 Kọl. 14:24, 25) Opli tintan he Wayne yì wẹ hùnwhẹ Oflin tọn, na azọ́n godo wẹ, podọ na tito-to-whinnu lọ ma dẹn sọmọ wutu. E dọmọ: “N’ma mọnukunnujẹ nuhe hodidọ lọ bẹhẹn lẹ mẹ ganji, amọ́ aliho he mẹ mẹlọ lẹ yinuwa hẹ mi te wẹ n’flin hugan. Yé dọnsẹpọ mi, dokuavọna mi bosọ na mi alọ po zohunhun po. Nado dọ hójọhó, gbẹtọ ahundoponọ lẹ wẹ yé.” Asu po asi po de ko nọ jọmẹ hẹ Pauline, bo nọ gọalọna ẹn nado hẹn visunnu etọn to opli lẹ ji podọ to lizọnyizọn lọ mẹ. Enẹwutu, whenue Wayne wá basi dide to nukọn mẹ nado mọnukunnujẹ nuyise yọyọ Pauline tọn lẹ mẹ dogọ, ewọ biọ to asu lọ si nado plọn Biblu hẹ emi.
17. Owhẹ̀ tẹwẹ mí ma dona nọ do míde, ṣigba naegbọn mí ma dona hònúpla gbede dile mí to alọgọna hẹnnumẹ mítọn lẹ?
17 Todido mítọn wẹ yindọ hẹnnumẹ mítọn lẹpo ni wá sẹ̀n Jehovah hẹ mí. Ṣigba, mahopọnna vivẹnudido mítọn lẹpo nado gọalọna hẹnnumẹ mítọn lẹ nado lẹzun devizọnwatọ Jiwheyẹwhe tọn, yé sọgan nọma kẹalọyi nugbo lọ. Eyin mọ wẹ, mí ma dona dowhẹ míde na nudide he yé basi. To popolẹpo mẹ, mí ma sọgan hẹn mẹdepope gánnugánnu nado kẹalọyi nuyise mítọn lẹ. Etomọṣo, ma nọ yí nukunpẹvi do pọ́n nuyiwadomẹji he a sọgan tindo do hẹnnumẹ towe lẹ ji blo dile yé to mimọ lehe Jehovah sinsẹ̀n to ayajẹ hẹnwa na we do. Nọ hodẹ̀ do ota yetọn mẹ. Nọ yí zinzin do dọhona yé. Ma hònúpla blo! (Owalọ 20:20) Tindo nujikudo lọ dọ Jehovah na dona vivẹnudido towe lẹ. Podọ, eyin hẹnnumẹ towe lẹ wá basi dide nado dotoaina we, yé na yin whinwhlẹngán!
OHÀN 57 Wẹndagbe Lilá Na Gbẹtọ Wunmẹ Lẹpo
^ huk. 5 Mí nọ jlo dọ hẹnnumẹ mítọn lẹ ni wá yọ́n Jehovah, ṣigba yelọsu wẹ dona de eyin yé na sẹ̀n ewọ kavi lala. To hosọ ehe mẹ, mí na gbadopọnna nuhe mí sọgan wà nado hẹn ẹn bọawuna hẹnnumẹ mítọn lẹ dogọ nado nọ dotoaina mí.
^ huk. 1 Yinkọ delẹ ko yin didiọ. To hosọ ehe mẹ, hogbe lọ “hẹnnumẹ” yin yiyizan nado dlẹnalọdo hagbẹ whẹndo tọn he ma ko to Jehovah sẹ̀n lẹ.
^ huk. 53 ZẸẸMẸ YẸDIDE LẸ TỌN: Mẹmẹsunnu jọja de to alọgọna otọ́ etọn he yin mayisenọ de nado jla mọto etọn do. Podọ, e dín ojlẹ dagbe de nado do video de hia ẹ to jw.org® ji.
^ huk. 55 ZẸẸMẸ YẸDIDE LẸ TỌN: Mẹmẹyọnnu de to todoai po sọwhiwhe po dile asu etọn he yin mayisenọ to hodọna ẹn do lehe azán etọn yì do ji. To godo mẹ, asi lọ to ayidedai hẹ whẹndo etọn.
^ huk. 57 ZẸẸMẸ YẸDIDE LẸ TỌN: Mẹmẹyọnnu lọ basi oylọna hagbẹ agun tọn etọn lẹ wá whégbè. Yé do ojlo nujọnu tọn hia to asu lọ mẹ bo tẹnpọn nado jẹakọ hẹ ẹ. To godo mẹ, asu lọ wá hùnwhẹ Oflin tọn hẹ asi etọn.
