DON he yin Kunnudetọ Jehovah tọn de to Canada nọ dovivẹnu vonọtaun nado dọhona mẹhe nọ dọ́ alipá lẹ. Don dọ gando dopo to yé mẹ go dọmọ: “Dawe de he ma tindo adọtẹn bo nọ yin Peter yin dopo to mẹhe kudiho hugan he n’ko mọ pọ́n to mẹhe nọ dọ́ alipá lẹ mẹ. Awusọhia etọn hiọawu podọ e nọ kàn ayiha nado yàn gbẹtọ lẹ dogbé. E ko gbẹ́ nuyiwa homẹdagbe tọn gbẹtọ lẹ tọn whlasusu.” Etomọṣo, sọn ojlẹ de mẹ jẹ devo mẹ, Don nọ tẹnpọn nado yinuwa hẹ dawe enẹ po homẹfa po na nuhe hugan owhe 14.

To gbèdopo, Peter kanse Don dọmọ: “Etẹwutu a to tuklajẹ do ota ṣie mẹ? Eyin mẹdevo lẹ wẹ, yé ko jo mi do hoho. Etẹwutu a to tuklajẹ?” Don yí wefọ atọ̀n zan po wuntuntun po nado jẹ ahun Peter tọn mẹ. Tintan, e kanse Peter eyin e yọnẹn dọ Jiwheyẹwhe tindo yinkọ mẹdetiti tọn de bo biọ to e si nado hia yinkọ lọ sọn Biblu mẹ tlọlọ to Salmu lẹ 83:18 mẹ. Enẹgodo, nado do nuhewutu e do to tuklajẹ hia ẹ, Don biọ to Peter si nado hia Lomunu lẹ 10:13, 14, he dohia dọ “mẹdepope he dawhá ylọ oyín Jehovah tọn wẹ na yin whinwhlẹngán.” Podọ nado dotana, Don hia Matiu 9:36 bo biọ to Peter si nado vọ́ ẹ hia na ede. Wefọ lọ dọmọ: “To whenue [Jesu] mọ gbẹtọgun lẹ, onú yetọn wàlẹblanuna ẹn, na yé yin hinhẹn jẹ agbá bosọ yin kọgbẹ́ e go taidi lẹngbọ lẹ he ma tindo lẹngbọhọtọ de wutu.” Po dasin po to nukun mẹ, Peter kanse dọ: “Be n’yin dopo to lẹngbọ enẹlẹ mẹ wẹ ya?”

Peter jẹ didiọ ji. E lawu, bo pà atán etọn yìdo ganji, bosọ do avọ̀ dagbe he Don na ẹn. Sọn whenẹnu, awusọhia Peter tọn nọ mẹ́.

Peter nọ basi kandai do wema de mẹ to azán lẹpo ji. Nuhe e kàn do bẹjẹeji wema enẹ tọn lẹ bẹ nujijọ ylankan lẹ hẹn, ṣigba kandai he e wá basi to godo mẹ lẹ gbọnvo. E kàn do fidopo dọ: “N’plọn oyín Jiwheyẹwhe tọn to egbé. Todin, eyin n’to dẹ̀ho, n’sọgan nọ hodẹ̀ hlan Jehovah. E yọ́n taun nado yọ́n yinkọ etọn. Don dọ dọ Jehovah sọgan yin Họntọn ṣie titi, yèdọ mẹde he do whenu nado dotoaina  mi to whelẹponu, mahopọnna ojlẹ lọ kavi whẹho lọ.”

Hodidọ godo tọn Peter tọn lẹ yin hlan nọvisunnu etọn po mẹdaho etọn yọnnu po. E wlan dọmọ:

“E ma to ninọna mi to egbé. N’lẹndọ mẹhowhe wẹ to tuklado mi. Amọ́, eyin n’tlẹ kú to egbé, n’yọnẹn dọ n’nasọ wá mọ họntọn ṣie [Don] whladopo dogọ to Paladisi mẹ. Eyin mì to ehe hia, mì yọnẹn dọ n’masọ togbẹ̀ ba. Ṣigba, eyin mì mọ dawe de to ṣiọdidi ṣie tẹnmẹ he taidi mẹhe ma do otẹn etọn to finẹ, mì dọnsẹpọ ẹ, podọ mì jaale bo hia owe pẹvi he tindo sinmẹ juju ehe na ẹn [owe Biblu pinplọn tọn lọ “Nugbo he Nọ Planmẹ Sọyi Ogbẹ̀ Mavọmavọ Mẹ” he e ko mọyi to owhe delẹ die wayi wẹ e to alọdlẹndo]. * Wema lọ dohia dọ n’na gọ̀ họntọn ṣie mọ to Paladisi mẹ. N’yí ehe sè po ahun lẹpo po. Nọvisunnu vivẹ́ mìtọn, Peter.”

To ṣiọdidi lọ godo, Ummi he yin mẹdaho yọnnu Peter tọn dọmọ: “Nudi owhe awe die, Peter dọho hẹ mi. Whla tintan he n’mọdọ e do ayajẹ niyẹn. E tlẹ sọ konu.” E dọna Don dọmọ: “N’na hia owe lọ, na nudepope he sọgan jẹ ahun nọvisunnu ṣie tọn mẹ dona yin onú vonọtaun de.” Ummi sọ yigbe nado plọn owe oplọn tọn yọyọ lọ Etẹwẹ Biblu Plọn Mí Taun? hẹ Kunnudetọ Jehovah tọn de.

Mílọsu sọgan nọ mọnú zẹ̀ awusọhia gbonu tọn go, bo nọ do owanyi nujọnu tọn hia bosọ nọ fahomẹ hẹ gbẹtọ wunmẹ lẹpo. (1 Tim. 2:3, 4) Dile mí to mọwà, mí sọgan penugo nado whàn gbẹtọ he taidi Peter nkọ lẹ, yèdọ mẹhe sọgan nọma tindo awusọhia he dọnmẹdogo ṣigba bo tindo ahun dagbe lẹ. Mí sọgan kudeji dọ Jiwheyẹwhe, mẹhe ‘nọ pọ́n ahun mẹ,’ na hẹn nugbo lọ nado whẹ́n to ahun mẹhe tindo ninọmẹ ahun mẹ tọn he jẹ lẹ tọn mẹ.—1 Sam. 16:7; Joh. 6:44.