Eyin Mẹde Ko Gbẹ́ Yin Mẹdagbe, Be Sọgodo Etọn Na Yọ́n Ya?
E ko dẹn din bọ mẹsusu nọ lẹndọ eyin emi ko gbẹ́ yin mẹdagbe bo nọ wà nue sọgbe, sọgodo emitọn na yọ́n. Di apajlẹ, mẹhe to otò Arabe tọn mẹ lẹ nọ hodo nuhe mẹplọntọ Confucius he nọgbẹ̀ sọn owhe 551 jẹ 479 jẹnukọnna jiji Jesu Klisti tọn dọ. E dọmọ: “Nuhe a ma jlo dọ ni yin wiwà hlan we, ma wà ẹ hlan mẹdevo lẹ blo.” *
NUHE MẸSUSU YISE
Mẹsusu gbẹ́ yise dọ eyin emi ko gbẹ́ nọ wà nuhe sọgbe, sọgodo emitọn na yọ́n. Enẹwutu, yé nọ namẹ sisi, nọ jọmẹ, nọ yọ́n otẹn yetọn mẹ, bo nọ wà nujijlọ. Nawe de he nọ yin Linh bo nọ nọ̀ Viêt Nam dọmọ: “Sọn odò wẹ n’yise dọ eyin n’nọ wà nue sọgbe, ogbẹ̀ ṣie na yọ́n.”
Sinsẹ̀n he mẹ mẹdelẹ te wẹ nọ plọn yé nado nọ wà dagbe. Dawe de he nọ yin Hsu-Yun bo nọ nọ̀ Taïwan dọmọ: “Nue yè plọn mi wẹ yindọ nue mẹde wà to gbẹwhenu etọn wẹ na dohia eyin onú na yọ́n na ẹn kakadoi to okú etọn godo kavi eyin e na jiya.”
BE E NỌ HẸN ALE WÁ YA?
Nugbo wẹ dọ dagbe wiwà doale. Amọ́, susu mẹhe nọ yí ahundopo do wà dagbe na mẹdevo lẹ tọn wẹ ma nọ wá mọ nue yé donukun. Nawe de he nọ yin Shiu Ping bo nọ nọ̀ Hong Kong dọmọ: “N’plọn sọn nue gbò mi mẹ dọ e ma yin whelẹponu wẹ dagbe wiwà doale. N’nọ jẹtukla nado penukundo whẹndo ṣie go bo nọ wà dagbe. Amọ́, alọwle ṣie wá gbà bọ asu ṣie jo yẹn po visunnu ṣie po do.”
Mẹsusu wẹ wá mọdọ sinsẹ̀n ma nọ gọalọnamẹ to whelẹpọnu nado yin mẹdagbe. Nawe de he nọ yin Etsuko bo nọ nọ̀ Japon dọmọ: “N’yì biọ sinsẹ̀n de mẹ bo lẹzun ogán jọja lẹ tọn. E vẹna mi taun nado mọ walọ gbigble lẹ, lehe mẹlẹ nọ to agbàwhlẹn bosọ nọ ṣì akuẹ ṣọṣi lọ tọn lẹ zan do.”
“N’nọ jẹtukla nado penukundo whẹndo ṣie go bo nọ wà dagbe. Amọ́, alọwle ṣie wá gbà bọ asu ṣie jo yẹn po visunnu ṣie po do.”—SHIU PING, HONG KONG
Sinsẹ̀nnọ akonka delẹ nọ wá jẹflumẹ to whenue yé mọdọ dagbe he wà yé te ma hẹn ale de wá na yé. Nue jọ do nawe de he nọ yin Van bo wá sọn Viêt Nam go niyẹn. E bayi zẹẹmẹ dọ: “Egbesọegbesọ wẹ n’nọ hẹn atin-sinsẹ́n lẹ, vounvoun po núdùdù po yì na tọgbo ṣie he kú lẹ bo nọ lẹndọ onú na yọ́n na mi to gbẹ̀mẹ. Owhe susu wẹ n’yí do jẹtukla bo nọ wà dagbe bosọ nọ hodo aṣa sinsẹ̀n tọn lẹ, ganṣo asu ṣie wá bẹ azọ̀n sinsinyẹn de. Enẹ dọ wẹ n’te bọ viyọnnu ṣie he gbẹ́ yin jọja bo to weplọn to tògodo kú.”
Eyin e ma ko pé nado yin mẹdagbe na sọgodo mẹtọn nido yọ́n, etẹwẹ nọ zọ́n lo? Mí do hudo owe dejidego de tọn he na gọalọna mí bosọ dọ nue mí na wà na sọgodo mítọn nido yọ́n. Owe tẹwẹ?
^ par. 2 Nado mọ nudọnamẹ lẹ gando nuhe Confucius plọnmẹ go, pọ́n owe lọ L’humanité à la recherche de Dieu, weta 7, hukan 31-35. Kunnudetọ Jehovah tọn lẹ wẹ zín owe ehe jẹgbonu bọ e sọ tin-to-aimẹ to www.jw.org ji.
A Gán Sọ Pọ́n Hosọ Ehelẹ
FỌ́N!
Yinyọ́n Nuhe Yin Dagbe po Oylan Po
Nuhe yin dagbe po oylan po pinplọn ovi towe lẹ na zọ́n bọ yé na wleawudai ganji na sọgodo.
GBLỌNDO NA KANBIỌ SINAI DO BIBLU JI LẸ
Etẹwẹ Yin Osẹ́n Sika Tọn?
Whenue Jesu dọhodo Osẹ́n Sika tọn lọ ji, e ma yin lehe mí na yinuwa hẹ gbẹtọ lẹ do to paa mẹ kẹdẹ ji wẹ e to hodọ do, amọ́ do lehe mẹde gán yinuwa hẹ kẹntọ etọn do ji ga.
